• Тәвәллуд
  • 09 Қыркүйек, 2020

Сәккиз қирлиқ, бир сирлиқ мөтивәр

Сабирәм ӘНВӘРОВА,
“Уйғур авази”

Күздә пишқан алмини йегәндә, әтиязлиқ әмгәкниң тәми сезилгинидәк, бүгүнки күнниң тәрәққиятида өтмүшниң һиди бар. Һә, мана шу өткән күнниң әслимилиридә әмгиги унтулмас шәхсләрниң исми сақлиниду. Улар миңбир җапалар билән бүгүнки парлақ келәчигимизгә йол ачқан әзиз инсанлар... Бүгүнки мақалиниң қәһримани Мусаҗан Мәмировни шуларниң қатаридин десәк, һеч хаталашмаймиз.
Бүгүнки күндә тохсән яшниң даваниға қәдәм ташлиған Мусаҗан Абдуллаоғли узун жиллар мабайнида мал дохтури болуп ишләп, наһийә тәрәққияти үчүн тәр төккәнләрниң бири. Қириқ жиллиқ иш-паалийитидә аддий мал дохтуридин наһийәлик ветсанотрядниң башлиғи лавазимиғичә көтирилгән сабиқ рәһбәрниң адил әмгиги унтулғини йоқ. Тохсән яшлиғи һарписида Чонҗа йезилиқ һакими аппаратиниң бир топ вәкиллири һөрмәтлик дәм елиштики һөрмәтлик инсанни тәвәллуди билән тәбрикләп қайтти. Шу җүмлидин мәнму редакция тәһрирари намидин әлгә әмгиги сиңгән мөтивәрни туғулған күни билән тәбриклигәч, сөһбәтлишип қайттим.
Мусаҗан Мәмиров 1930-жили Чоң Ақсу йезисида туғулған. У икки яшқа толғинида, аилиси чегара атлап өтүп кетип, шу яқта билим алиду. 1953-жили ветеринария-зоотехника институтида тәһсил көриду. 1955-жили аилиси билән киндик қени төкүлгән ана жути Чоң Ақсуға көчүп келип, шу жили йезида мал дохтури болуп ишқа орунлишиду. У йәрдә 1958-жилғичә ишләп, 1958-жилдин 1961-жилғичә Ленин намидики колхозида әмгәк әтсә, 1961-жилдин 1976-жилғичә наһийәлик ветеринария станциясидә мал дохтури болуп хизмәт қилиду. Арилиқта СПТУда муәллим болупму ишләйду. Тиришчанлиғи түпәйли дайим издиниш үстидә жүридиған қабилийәтлик мутәхәссис билимини йетилдүрүш мәхситидә, 1975-жили Алмута зооветеринария институтини пүтириду.
Ишбиләрмәнлиги, әмгәксөйгүчлиги һәм кәспий қабилийити билән көзгә чүшкән Мусаҗан ака 1976-жили вилайәтлик ветсанотрядниң наһийәлик шөбисиниң рәһбири болуп тайинлиниду. Шуниңдин етиварән, та һөрмәтлик дәм елишқа чиққичә рәһбәрлик хизмәттә ишлигән у нурғунлиған утуқларни қолға кәлтүриду. У паалийәт елип барған жиллири, мал сани көпийип, көплигән жуқумлуқ мал ағриқлириниң тарилиши тохтап, наһийә чарвичилиқ бойичә вилайәттә алдиңқи сәпкә чиқиду. 1985-жилдин 1989-жилғичә, төрт жил СССР Хәлиқ егилиги муваппәқийәтлири көргәзмисиниң һәрхил медальлири билән мукапатлиниду. Хулләс, бүгүнки күндә яшанғанниң мәйдисидә парлиған медальлар әйни көпжиллиқ шиҗаәтлик әмгигиниң нәтиҗисидур. Ейтип өтүш керәкки, мана шу медальларниң бирини 1948-жили Ғулҗида йеник атлетикидин өткән спорт мусабиқисидә ғалип чиққан Мусаҗан Мәмировқа хәлқимизниң мунәввәр пәрзәнди Әхмәтҗан Қасимий өз қоли билән тапшурған екән. Қисқиси, һаятидики унтулмас вақиәләрниң ялдамисиға айланған медальларни мәйдисидә, әң ярқин әслимилирини болса, жүрәк қетида сақлаватқан мөтивәр өткән күнләр һәққидә алаһидә тәвриниш илкидә сөз қозғиди.
– У жиллири Сибирь яриси, эмкар, чума қатарлиқ жуқумлуқ мал ағриқлири көп ениқлинатти. Бирақ, бар амалини қилип, ағриқниң тарилишини теҗәп, чиқимниң алдини елиш үчүн күн-түн демәй әмгәк қилаттуқ. У чағларда йеза хәлқиниң асасий турмуш-тирикчилиги һәм бар байлиғи мал болидиған. Шуңа, мал ағриғи мәсилисигә әсла бепәрва қарашқа болматти. Ядимда қалған вақиәләрниң бири, «Қосағаш» участкисидин чума чиқип, иш топи билән хәтәрлик тәвәни дәрру назарәткә алдуқ. Тазилиқ ишлирини вақти-вақтида йолға қоюп, ағриқниң овҗ елишиға йол қоймиған едуқ. Болупму, Свердлов намидики колхозда мал ағриқлири көп ениқлинатти. Бир жили Чаринда жуқумлуқ мал ағриғи тарап, мәсилини һәл қилиш үчүн наһийәдин мени әвәтти. Махтанғиним әмәс, үч күнниң ичидә бар мәсилини йешип, ағриқни йоқатқиним иш бабимдики йәнә бир әстә қаларлиқ вақиәгә айланди. Шу чағда колхоз рәиси Мирзигүл Насиров маңа алаһидә миннәтдарлиқ билдүргән еди, – дәп өткән жилларни чоңқур тәсират илкидә әслиди Мусаҗан ата.
Сәккиз қирлиқ, бир сирлиқ инсан Мусаҗан Абдуллаоғлини көпчилик бағвән, гүлчи, сеһиргәр, шахматчи һәм чақчақчи сүпитидиму яхши тонуйду. Мевилик беғи, бараңлиқ һойлиси һәм у өстәргән рәңму-рәң гүлләргә қарап зоқланмайдиған адәм йоқ. Салаһийәтлик мөтивәр бош вақтида шу сайилик һойлисиға коча балилирини жиғип, шахмат ойнитип, сеһир көрситип, яшларға бар билимини үгитиш билән бәнт. Яшлиғидин спортқа йеқин яшанғанниң иш-һәрикити тимән, гәп-сөзи орнида. Сәрәмҗан һойлисидинла, униң тазилиққа алаһидә етивар беридиған адәмләрдин екәнлиги байқилип туриду.
Бу күнләрдә Мусаҗан Мәмировниң Меһрибан ана билән өй-очақлиқ болғиниға 64 жил толди. Йәттә пәрзәнт сөйгән қәдирдан инсанлар он сәккиз нәврә, жигирмә икки чәврә қучуп, бала-чаққисиниң дөлитидә бәхитлик һаят кәчүрмәктә.

Уйғур наһийәси.

307 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы