• Йеңилиқлар
• 09 Қыркүйек, 2020

Министрға ениқ вәзипиләрни жүклиди

Дөләт рәһбири Қасым-Жомарт Тоқаев Ички ишлар министри Ерлан Турғумбаевни қобул қилди, дәп хәвәрлиди Президентниң мәтбуат хизмити.
Қасым-Жомарт Тоқаевқа Президентниң бийил Қазақстан хәлқигә йоллиған «Қазақстан йеңи реаллиқта: иш-һәрикәт вақти» намлиқ Мәктүбини әмәлгә ашуруш, җүмлидин Пәвқулладә әһваллар комитетини Ички ишлар министрлиги тәркивидин чиқириш ишлири тоғрилиқ һесават берилди. Министрниң ейтишичә, һазир мәхсус комиссия қурулуп, келәчәктә Пәвқулладә әһваллар бойичә министрликниң тәркивидә хизмәт қилидиған 25 миңға йеқин адәмниң тизими ениқлинип, һаҗәт болған техника вә қурал-җабдуқлар бөлүниду. Бу ишларниң һәммиси бир ай ичидә аяқлишиду.
Шуниң билән биллә Ерлан Турғумбаев «полиция қәдәмлик қолйетимликтә» қаидиси бойичә ислаһатниң җәрияни һәққидә ейтип өтти. Министр мәзкүр қаидә бойичә, йәрлик полиция хадимлири маддий җәһәттин толуқ тәминлинип, уларниң җумһурийәтниң барлиқ регионлирида хәлиқ билән зич мунасивәттә ишлиши үчүн қолайлиқ шараит яритилидиғанлиғини тәкитлиди. Мошу мәхсәт үчүн участкилиқ полиция хадимлириниң мәртивиси қанун билән бәкитилип, улар транспорт, фото-видеоназарәт васитлири вә электронлуқ планшетлар билән тәминлиниду.
Униңдин ташқири, учришишта Ички ишлар министрлигиниң ишини рәқәмләндүрүш мәсилисиму қозғалди. Һазирниң өзидә министрлик ишиниң 83 пайизи электронлуқ шәкилгә көчкән. Жил ахириғичә буни 91 пайизғичә йәткүзүш мәхсәт қилинмақта.
Учришиш ахирида Президент Қасым-Жомарт Тоқаев Ерлан Турғумбаевқа қолға елинған ислаһатларни нәтиҗидар әмәлгә ашруш керәклигини ейтип,министрликниң алдиға ениқ вәзипиләрни қойди.