• Йеңилиқлар
• 17 Қыркүйек, 2020

Йеңи автобуслар билән тәминлиниду

Рашидәм РӘҺМАНОВА,
«Уйғур авази»

Маарип саһасиниң мәлуматлири бойичә Қазақстанда мәктиви йоқ 1580 йеза бар екән. Уларда мәктәпкә тошушни тәләп қилидиған 27 243 бала яшайдекән. Уларниң ичидә 26 551 (97,4%) оқуғучиниң билим елиши үчүн мүмкинчиликләр яритилған. Җүмлидин, 23 197 бала мәктәпкә һәқсиз тошуш автобуслири билән тәминлинип, 3 354 бала мәктәп йенидики интернатларда туриду. 814 (2,6%) оқуғучи ундақ имканийәтләргә егә әмәс, йәни өзлири берип-келиду яки ата-аниси тошуйду. Бәзилири пәтирләрдә, йәнә бирлири уруқ-туққанлириниң өйлиридә туруп, оқуйду.
ҚазақстанҖумһурийитиниң«Билим һәққидә» қануниға бенаән мәктиви йоқ йезилардин билим алғучиларни жирақтики мәктәпләргә тошушни уюштуруш йәрлик иҗраий органлириниң вәзиписи болуп тепилиду.
Әмгәкчиқазақ наһийәсидә 50 миңдин ошуқ оқуғучи бар. Улар 86 оттура, толуқсиз оттура вә башланғуч мәктәплиридә билим алиду. Сөзсизки, кичик йезилардики башланғуч вә толуқсиз оттура мәктәпләрни тамамлиған яки тамамән мәктиви йоқ йезилардики балиларни хошна йезилардики оттура билим дәргаһлириға йәткүзүш үчүн дөләт тәрипидин автобуслар қараштурулған. Бу мәхсәттә наһийәдә мошу күнгичә 41 транспорт болуп, униң 16-си наһийәлик билим бериш бөлүминиң, қалғини автопаркларниң шәхсий балансида еди. Вақит өтүп, йезидин йезиға қатнап оқуйдиған балилар сани өсти. Шундақла транспортларниң конириған әһвалиму байқалған еди. Мана мошу камчилиқларниң орнини толтириш мәхситидә Әмгәкчиқазақ наһийәлик билим бериш бөлүми өз мәблиғи һесавиға 118 миллион тәңгигә 10 йеңи автобус сетивалди. Атап кетиш керәкки, 20 орунлуқ бу автобуслар балиниң оқушиға аман-есән берип-қайтиши үчүн барлиқ бехәтәрлик тәләплиригә риайә қилиду. Орундуқлири юмшақ, ичидә кондиционер вә бехәтәрлик люклири орнитилған.
Бирақ, һазирчә ушбу автобусларниң қайси йезиларға бөлүнүп беридиғанлиғи ениқланмиди. «Әлвәттә, улар муһтаҗ йезиларға берилип, балилиримизниң тосалғулуқларсиз билим елиши үчүн имканийәт яритилидиған болиду» дәйду наһийәлик маарип бөлүминиң хадимлири. Шундақ екән, өсүп келиватқан әвлатниң ғемини йәп, ғәмхорлуқ қиливатқан елимизниң келәчәк егилири – яшлиримиз һәртәрәплимә билимлик вә инсаплиқ болуп йетилгәй!

Әмгәкчиқазақ наһийәси.