• Һекайә
  • 17 Қыркүйек, 2020

Бир күни болған икки иш

Саһит Садиқ

(Һекайә)

Ишханида һөҗҗәт көрүп олтираттим. Тосаттин телефон җириңлап кәтти. Мән трубкини қолумға алдим:
– Алло, һә, мән... өзиңиз ким?
– Мән зиялилар сәяситини әмәлийләштүрүш ишханисидики Қадир. Әнди әслиригә кәлгәнду? Һи... һи... қандақ, саламәт турдилиму? Йеңи хизмәт орниға көнүп қалдилиму? Өзлириниң маарип идарисигә башлиқ болуп тайинланғанлиғиңизни аңлап, бәк хошал болдум. Силини тәбрикләймән!
– Рәхмәт, маңа дәйдиған бирәр гепиңиз бармеди?
– Шундақ, шундақ. Һелиқи ишни бәҗирип қойғандим. Шуни өзлиригә...
– Қайси иш дәйсиз?
– Һәй, унтуп қалдилиму немә, дадилириниң йезидики нопусини шәһәргә йөткәп бериш һәққидики язған илтимаслиричу?!
– Һә... Раст, мундин үч жил илгири шундақ мәзмунда бир парчә илтимас язғанлиғим әнди есимға кәлди.
– Һә, бәлли! Шуни бүгүн тәстиқлидуқ. Әнди хатирҗәм болсила.
– Вай-вуй, немиләрни дәп жүридиғансиз? Бу...
– Раст дәймән, гепимгә ишәнсилә. – Қарши тәрәпниң авазида мәмәданлиқ билән хошамәтчилик бар еди. Мунчилик иш дегән қолумиздин келиду, башлиқ. Биз сиздәк билим әһли, жуқури зиялиларниң турмушиға көңүл бөлмисәк боламду?! Алло башлиқ, гәп қилмайсизғу? Пәрәзимчә, шу тапта һаяҗанлиниватисизғу дәймән. Шундақ, қәдирдан дада билән җәм болуш хәвирини аңлиғанда, кимму һаяҗанланмисун! Силиниң бу йәргә келип, нопус рәсмийитини бәҗиришкә вақитлири яр бәрмисә, мән өзәмла елип барсамму болиду.
– Һаҗити йоқ.
– Немә? Һаҗити йоқ дәмдила? Бу немә дегәнлири? Һазирқи вақитта йеза нопусни шәһәргә йөткимәк бәк мүшкүл иш турса...
– Дадамниң нопуси аллиқачан йөткилип болған.
– Немә? Йөткилип болған? Қачан, қәйәргә, қайси усул билән йөткигән? Мән һәҗәп билмәймәна?
– Әнди уқуп қелиң, дадам икки жил илгири бақи аләмгә кәткән.
– Һә?!

***
Бая телефонда болған гәпләр билән дадам рәмәтликниң нопус мәсилисигә мунасивәтлик бурунқи бәзи ишларни әсләп олтираттим. Туюқсиз ишхана ишиги йеник чекилди:
Ток-ток-ток.
– Кириң!
– Һи...Һи... – ишиктин гоя алий илтипатқа муйәссәр болғандәк интайин тәвәззу билән һеҗийип кирип кәлгән бу адәм оттура бой, 45 яшлар чамисида болуп, униң гөшлүк қовзи үстидә яғ салған чайдәк пақирап турған бир җүп сариғуч көзи маңа тонуштәкла билинди. Мән уни орундуққа тәклип қилдим:
– Қени, бу йәрдә олтарсила.
– Убдан, убдан.
У қолашмиған һәрикәтләрни қилип, мән көрсәткән орундуққа келип, қорунупирақ олтарди.
– Һә, бирәр иш билән киргәнмитилә?
– Шундақ, һи...һи... Пеқир өзлириниң алдида бәк хиҗил, һәқиқәтәнму көп хиҗилмән. Һелиқи ишни көңүллиригә алмисила...
– Қайси ишни? Униң баш-айиғи йоқ гәплиридин һечнәрсә аңқиралмай, һәйран болуп соридим.
– Һелиқи бир чағдики каривәт ишичу?
– Каривәт иши?
– Сили Жайтерәк кәнтидә нуқтида турған мәзгилдә, бизниң мәктәптин арийәт елип ишләткән һелиқи яғач каривәтни дәватимән.
– Һә... Тоғра, әнди есимгә кәлди. Өзлири Жайтрәк башланғуч мәктәпниң мудириғу дәймән.
– Шундақ, унтуп қалмаптила. Силиниң әстә тутуш иқтидарлири немә дегән күчлүк! Бир қетим көргән адәмни һәргиз унтуп қалмайдекәнла. Иккимиз көрүшмигили он жилдин ешипту, һи...һи...һи!..
– У каривәтни өз вақтида өзлиригә қайтуруп бәргәндимғу дәймән.
– Уғу шундақ. Лекин шу чағда, сили бирнәччә күн тәхир қилип туруңлар десилиму унимай, қопаллиқ қилип йотқан-көрпилирини чүшириветипла, каривәтни елип чиққанлиғимни ойлисам, һәй...
– Керәк йоқ. Сили есимгә салмиған болсила, унтуп кетиптекәнмән у ишни.
– Шундақму?! Һи...Һи... Кишиләр ейтқандәк, сили растинла көңүллиридә ғум сақлимайдиған есил пәзиләтлик адәм екәнла. Һи...Һи... «Мени кәчүрәрму?» дегән ғәм-әндишә ичидә келиведим қашлириға, мана қарни-көксилири океандәк кәң, чоңқур екән әмәсму!
– Шунчә жирақ йәрдин шу иш үчүнла кәлгәнмидилә?
– Шундақ. Һи...Һи...
– Бекар аварә болуптила.
– Йоғуси, башлиқ, мән өзлирини аварә қилдим.
– Хош, йәнә башқа гәп барму?
– Йоғуси, шу гәпти. Һи...Һи...
– Ундақ болса қайтип кетәмдила?!
– Хош, мән қайтай.
– Хош...
У чиқип кәтти. Мән наһийәлик маарип идарисигә башлиқ болуп ишқа чүшкинимгә үч күн болғанда йүз бәргән бу икки иштин күлүшүмни яки жиғлишимни биләлмәй, чоңқур ойға чөкүп олтирип қалдим.

220 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы