• Йеңилиқлар
• 17 Қыркүйек, 2020

Бюрониң новәттики мәҗлиси өтти

Сешәнбә күни җумһурийәтлик Уйғур этномәдәнийәт мәркизи бюросиниң кәңәйтилгән мәҗлиси болуп өтти. Униңға мәркәзниң бюро әзалири, жигитбашлири вә башқиму җәмийәтлик ишларниң активистлири қатнашти. Юмшитилған карантин қаидилиригә толуқ риайә қилинған мәзкүр башқошушқа ҖУЭМниң иҗраий мудири Зихруллам Қурванбақиев риясәтчилик қилди.
Зихруллам Абайоғли бюрониң бу қетимқи мәҗлисидә бирла мәсилиниң – мәркәзниң Алмута шәһири Бостандық наһийәлик шөбисиниң һәм жигитбашлири кеңишиниң рәиси Абдумеҗит Иминовниң, мәлум сәвәпләргә бола, өз вәзиписини атқуралмайдиғанлиғиға мунасивәтлик, униң орниға йеңи рәис сайлаш мәсилисиниң қарилидиғанлиғини ейтти. Новәттики натиқ, ҖУЭМ йенидики Жигитбашлири кеңишиниң рәиси Ярмәһәммәт Кебиров жиғин қатнашқучилириға җәмийитимиздә һәрқандақ вәзийәттә, болупму бүгүнкидәк пүткүл әл-жутниң бешиға кәлгән еғир синақ пәйтидә, бирлик-иттипақлиқниң нәқәдәр муһимлиғини, бирақ, бәхиткә қарши, шуниңға қаримай айрим адәмлиримизниң амма арисида әқилгә сиғмайдиған әпқачти гәпләрни тарқитип, хәлқимизниң қаймақтәк уйиған бирлигини бузушқа интиливатқанлиғини алаһидә ечиниш илкидә тилға алди.
Андин сөз новитини алған бюро әзалири – ҖУЭМ Алмута шәһәрлик шөбиси рәисиниң орунбасари, Қазақстан хәлқи Ассамблеясиниң әзаси Долқунтай Абдухелил, ҖУЭМ Жигитбашлири кеңиши рәисиниң орунбасарлири Сабит Йүсүпов билән Октябрь Қурбанниязов, ҖУЭМ Алмута шәһәрлик шөбиси Жигитбашлири кеңишиниң рәиси Азат Ибрагимов, җамаәтчилик ишлириниң активисти Алмас Ахмоллаев вә башқилар мәркәзниң мустәқил Қазақстанниң һәртәрәплимә тәрәққиятини қолға кәлтүрүш вә миллий мәдәнийитимизни риваҗландуруш, униң үчүн әң асасий васитә болған иттипақлиғимизни көзимизниң қаричуғидәк сақлаш йолидики паалийитини техиму җанландуруш керәклигини, буниңға тосалғу болуш арқилиқ хәлиқни қаймуқтуруватқан иғвагәрләрниң һәрикитигә қәтъий йол қоймаслиқ лазимлиғини тәкитлиди.
Шуниңдин кейин, жиғинниң күн тәртиви бойичә, көпчилик тәрипидин көрситилгән намзат –ҖУЭМ Бостандық наһийәлик Уйғур этномәдәнийәт мәркизи Жигитбашлири кеңиши рәисиниң орунбасари Алимҗан Гайитов авазға селиш нәтиҗисидә бир еғиздин ҖУЭМ Алмута шәһири Бостандық наһийәлик шөбисиниң һәм жигитбашлири кеңишиниң рәиси болуп сайланди.
Мәҗлистә наһийә аһалисиниң вәкиллири – СМУ-15 мәһәллиси жигитбешиниң орунбасари Зихруллам Туқанов, Бағанашил мәһәллисиниң жут активисти Абдурешит Қурбанов, “Орбита” микрорайониниң жигитбеши Әхмәтҗан Исрайилов рәисликкә һәқиқәтәнму җәмийәтлик паалийәттә мол тәҗрибигә егә, көпчиликниң иши десә ичиватқан чейини қоюп жүгрәйдиған инсанниң кәлгәнлигини ейтип, уни һәртәрәплимә қоллап-қувәтләйдиғанлиғини билдүрди.