• Дөләт рәһбири Қасым-Жомарт Тоқаевниң Қазақстан хәлқигә Мәктүби
• 17 Қыркүйек, 2020

35-өй чаринлиқ аниға буйриди

Сабирәм ӘНВӘРОВА,
«Уйғур авази»

Җумһурийәтлик Уйғур этномәдәнийәт мәркизи йенидики Нураний Анилар кеңишиниң рәиси, тонулған меценат Гүлҗаһан Муратованиң исми көпчиликкә мәлум. Шуни тәкитләш лазимки, җәмийитимиздә барини бөлүшүп, ярдәмгә муһтаҗ инсанларға қол учини созидиған кишиләр камдин-кам. Амма аримизда Гүлҗаһан Муратовадәк мәрт-мәрданә инсанларму йоқ әмәс.

Йеқинда Гүлҗаһан Муратова йәнә бир аилини шатлиққа бөлиди. Сехижүрәклик инсанниң хәйрихаһлиғи билән бу новәт оттуз бәшинчи аилә өйлүк болди. Йеңи өйниң ачқучи Чарин йезисиниң турғуни, бәш балиниң аниси Саҗидәм Һасановаға буйриди. Йолдишидин айрилған көпбалилиқ ана турмушниң қийинчилиқлириға баш әгмәй, пәрзәнтлирини бир өзи асраветипту. Мүшкүл әһвалда қалсиму, һечкимниң алдиға ярдәм сорап бармиған аниниң мошу күнгичә тартқан җапаси бир өзигила аян, әлвәттә. Йолдиши вапат болғандин бери иҗаригә өй яллап яшаватқан Саҗидәм Һасанованиң әһвалиға бепәрва қарап туралмиған Гүлҗаһан ана йәнә бир соваплиқ ишни әмәлгә ашурди.
Шундақ қилип, Чарин йезисидики көпбалилиқ аилә өйлүк болуп, «бисмилла» дәп йеңи өйиниң босуғисидин атлиди. Өз өйиниң ачқучини қолиға алған Саҗидәм Һасанованиң хошаллиғида чәк болмиди. Һә, ушбу изгү ишқа гува чаринлиқлар алтунжүрәклик аниға жут намидин миннәтдарлиғини билдүрди. Буни көпчилик елимиз Президентиниң бийил қазақстанлиқларға йоллиған Мәктүбигә ениқ җавап сүпитидә қобул қилди.