• Йеңилиқлар
• 17 Қыркүйек, 2020

Һәмкарлиққа асас болған тәшкилат

Сешәнбә күни пайтәхттә Қазақстан хәлқи Ассамблеясиниң чарәк әсирлик тәвәллудиға беғишланған «Қазақстан хәлқи Ассамблеясигә - 25 жил: ховуп-хәтәрләр, утуқлар, тәҗрибиләр» намлиқ хәлиқара илмий-әмәлий әнҗуман болуп өтти. Униңға Қазақстан хәлқи Ассамблеяси Рәисиниң орунбасари – Кативат рәһбири Жансейит Түймебаев, ҚХА әзалири, җәмийәт әрбаплири, Парламент депутатлири вә зиялилар қатнашти.
Әнҗуманда һазирқи этномәдәнийәт саһасидики, мәдәнийәт вә аләмшумуллаштуруш дәвридә толерантлиқ мәсилилирини қелиплаштуруш бойичә хәлиқара паалийәтләрниң муһим мәсилилири, ҚХАниң 25 жиллиқ ишиниң нәтиҗилири билән 2025-жилғичә Ассамблеяниң тәрәққият концепциясини әмәлгә ашуруштики истиқбаллар муһакимә қилинди.
Ассамблея паалийитигә мунасивәтлик пикир билдүргәнләр арисида Түркийтиллиқ дөләтләр һәмкарлиқ кеңиши баш кативиниң орунбасари, Қирғизстан хәлиқ язғучиси С.Раев, Қазақстан Җумһурийити Парламенти Мәҗлисиниң депутати С.Абдрахманов, ҚХА Рәисиниң орунбасари, «Астана шәһәрлик өзбәк әтномәдәнийәт мәркизи» җәмийәтлик бирләшмисиниң рәиси Ш.Полатов, Россия хәлиқлири Ассамблеяси Кеңишиниң рәиси С.Смирнова, Қазақстанниң Җәнубий Африка Җумһурийитидики Пәвқулладә вә Толуқһоқуқлуқ әлчиси Қ. Тумыш болди.
Жансейит Қансейитоғли өзиниң киришмә сөзидә Қазақстан Җумһурийитиниң Тунҗа Президенти - Елбасы Н.Назарбаевниң «Бизниң утуқлиримиз билән ғалибийитимизниң мустәһкәм һули – инақлиқ билән разимәнлик. Һәрхил милләт вәкиллири бир чаңирақниң, бир байрақниң астида иҗил-инақ һаят кәчүрүп, дунияға тонулған мәмликәт аталдуқ» дегән сөзини мисалға кәлтүрүп, мәмликитимизниң пүтүнлүги билән турақлиқлиғини сақлап, иҗтимаий-ихтисадий тәрәққият җәһәттин егиз чоққиларға көтирилгәнлигини, әнҗуманниң шанлиқ сәнә - Қазақстан хәлқи Ассамблеяниң 25 жиллиғи даирисидә өтүватқанлиғини тәкитлиди.
Көпмилләтлик Қазақстан үчүн хәлиқләр достлуғи билән милләтләрара разимәнликни тәминләш муһим әвзәлликләрниң биригә айланди. Биринчидин, елимиз Конституциясидә этносларара вә конфессияләрара мунасивәтләрни рәтләйдиған асаслиқ нормилар бар. Бизниң елимиз илгиридинла мәдәнийәтләрниң, тилларниң, әнъәниләрниң һәрхиллиғини етирап қилип, гражданлиқ җәмийәт қуруш йолини таллиди.
Дөләт миллий сәясәтниң ойлаштурулған стратегиясини әмәлгә ашуруп, этносара мунасивәтләр саһасидики турақлиқлиқниң капалити сүпитидә изчиллиқ билән һәрикәт қилиду. Мустәқиллик жиллирида «Қазақстан хәлқи Ассамблеяси тоғрилиқ» қанун, Қазақстан хәлқи Ассамблеясиниң 2025-жилғичә тәрәққият концепцияси вә башқиму муһим һөҗҗәтләр қобул қилинди.
ҚХА қурулған күнидин башлап муһим җәмийәтлик инфрақурулумни қелиплаштурди. Этносларниң мәдәнийитини, тиллири билән әнъәнилирини тәрәққий әткүзүш үчүн һәртәрәплимә шараит яритилди. Елимиздә миллий театрлар, миллий аммивий әхбарат васитилири паалийәт паалийәт елип бериватиду. Қазақстанлиқ этносларниң мәдәнийитини, әнъәнилирини вә тиллирини тәрәққий әткүзүшни қоллап-қувәтләш мәхситидә дөләтлик иҗтимаий буйрутма бөлүнди», деди у.
Ж.Түймебаев Қазақстанда этносларара разимәнликни тәминләшниң нәтиҗидар сәясий-һоқуқлуқ вә институционаллиқ башқуруш системисиниң қелиплашқанлиғини тәкитләп, Ассамблеяниң тәшәббуси билән әмәлгә ашқан программиларға тохталди.
«Тунҗа Президент – Елбасы Н.Ә.Назарбаевниң җәмийәтлик разимәнлик вә умуммиллий бирликниң қазақстанлиқ үлгисини қелиплаштуруштики вә бирпүтүн институт – Қазақстан хәлқи Ассамблеясини қуруштики роли», «Биз – Қазақстан хәлқи» (этносларара саһадики дөләт сәяситиниң асасидики «Бирлик - һәрхиллиқта» қаидиси) вә «Тәқипкә учриған, Қазақстанға йәр авдурулған хәлиқләрниң тәғдири» мавзулирини өз ичигә алған әнҗуманда тарихчилар, яш алимлар докладлар оқуп, этносларара мунасивәт вә сәясәт әтрапида өз ой-пикирлирини оттуриға салди.