• Йеңилиқлар
• 24 Қыркүйек, 2020

Омск шәһиридә Кемел Тоқаевқа беғишланған мемориал тахта орнитилди

Йеқинда Омск шәһиридә Қазақстанниң Президенти Қ.Тоқаевниң дадиси Кемел Тоқаевқа беғишлинип орнитилған мемориал тахта тәнтәнилик рәвиштә ечилди. Бу һәққидә Омск шәһәрлик мәмурийити рәсмий сайтида елан қилинди.
Мәзкүр тәнтәнигә губернатор Александр Бурков, Омск шәһириниң мэри Оксана Фадина, Қазақстанниң Россиядики әлчиси Ермек Көшербаев вә җамаәтчилик вәкиллири қатнашти.
Омск вилайитиниң губернатори А.Бурков вә Қазақстан әлчиси Е.Көшербаев мемориал тахтиға гүлчәмбәрләрни қойди. Шуниңдин кейин Е.Көшербаев уруш ветеранлири госпиталиниң баш врачи Евгений Захаровқа диагноз қоюш лабораторияси үчүн җабдуқларға сертификат тапшурди.
Тәкитләш лазимки, Омск шәһәрлик кеңиши шаир, язғучи вә Улуқ Вәтән урушиниң қатнашқучиси Кемел Тоқаевқа мемориал тахта орнитиш тоғрилиқ қарарни март ейида қобул қилған еди. Уни орнитиш тәшәббусини Ч.Валиханов намидики рус-қазақ достлуғи мәркизи вә һәрбий күчләр ветеранлириниң җәмийәтлик тәшкилати көтәргән. Мәзкүр идеяни шәһәрлик мәмурийәт йенидики топонимикилиқ комиссия қоллап-қувәтлиди.
Кемел Тоқаев (1923-1986) Қазақстан Президенти Қасым-Жомарт Тоқаевниң дадиси, Улуқ Вәтән урушиниң қатнашқучиси, бирнәччә орден вә медальлар билән мукапатланған. 1945-жили январь ейида путидин еғир җараһәтлиниду. 1494-госпиталь (һазирқи Омсктики уруш ветеранлири госпитали) врачлири униң путини сақлап қалиду. К.Тоқаев қазақ әдәбиятида детектив жанриниң асасчиси болуп һесаплиниду.