• Йеңилиқлар
• 01 Қазан, 2020

Елбасы Түркстан билән Чимкәнтни зиярәт қилди

Қазақстанниң Тунҗа Президенти — Елбасы Нурсултан Назарбаев Түркстан шәһиригә болған сәпири давамида бир қатар йеңи объектларни арилиди.

Мәркизий Азия вә туран даласидики қедимий шәһәр – Түркстан өз вақтида Қазақ ханлиғиниң пайтәхти болғанлиғи мәлум. Тарихий һөҗҗәтләргә көз ташлисақ, мошу йәрдә хәлиқниң тәғдири муһакимә қилинип, һәрхил қарарлар қобул қилинған еди. Һазирму Түркстан – елимиз тарихи билән мәдәнийитиниң бай ғәзниси, адәмләр мәнивий күч жиғишқа келидиған җай.
Н.Назарбаев Түркстанға сәпири даирисидә дәсләп хәлиқара аэропортниң ечилиш тәнтәнисигә қатнашти. Вилайәт мәркизидин 16 километр жирақлиқта орунлашқан аэропорт заманивий технологияләрни қоллинип, хәлиқара стандартларға мувапиқ селинған. Мәзкүр аэропортниң туризмни тәрәққий әткүзүшкә тәсир қилидиғини ениқ.
Шундақла Елбасы сәпәр давамида «Самурық-Қазына» акционерлиқ җәмийитиниң қоллиши билән селинған «Түркстан-арена» спорткомплексини зиярәт қилди. Стадионниң трибунилири йәттә миң адәмгә молҗаланған. Н.Назарбаев зиярәт қилған объектларниң бири – Rіxos Turkіstan вәтәнлик инвестор мәблиғиғә селинған меһманхана. 120 орунға беғишланған меһманханада 3 ресторан, кинотеатр, бизнес-мәркәзләр вә башқилар бар.
Журналистларға бәргән сөһбити давамида барлиқ вилайәт һакимлириға, ширкәтләргә берилгән тапшурмиларниң һәммиси орунлиниватқанлиғини тәкитләп, мошу ишларға қатнашқан барлиқ гражданларға миннәтдарлиқ изһар қилди.

Ахирида Қазақстанниң Тунҗа Президенти Түркстанда саммит, музыкилиқ фестиваль вә яшлар форумлирини өткүзүш керәклигини тәкитлиди. «Бүгүн биз Түркстандики йеңи объектлар билән тонуштуқ. Улар шәһәрниң гөзәл җайлириға айлинип, шәһәр турғунлирини, қазақстанлиқларни һәм дуниядин туристларни җәлип қилишқа имканийәт бериду. Түркстандики кәңдаирилик қурулуш регионниң тәрәққиятиға йеңи сүръәт бериду. Шәһәрниң 163 чоң объектиниң қурулушиға 450 миллиард тәңгә беваситә инвестиция җәлип қилинди. Келәчәктә Түркстанни дунияға тонутушимиз керәк. Бу – тарихий шәһәр, түркийтиллиқ хәлиқләр шәһири», деди Н.Назарбаев.

***
Қазақстанниң Тунҗа Президенти Чимкәнт шәһиридики медицинилиқ қурал-җабдуқлар, медицинилиқ җиһазлар вә медицинилиқ транспорт чиқиридиған карханида болди, дәп хәвәрлиди Елбасыниң мәтбуат хизмити.
2013-башлап һазирқи вақитқичә «Қазмедприбор» ҖЧЙ 15 миңдин ошуқ медицинилиқ қурал-җабдуқ, 120 миңдин ошуқ медицинилиқ җиһаз, 742 медицинилиқ тез ярдәм транспортини чиқарди. Кархана 2005-жили қурулған.
Чимкәнт шәһириниң һакими Мурат Әйтенов Елбасыға шәхсий инвесторларниң мәблиғигә селинидиған 1000 орунлуқ көпсаһалиқ университетлиқ ағриқхана қурулуши тоғрилиқ әхбарат бәрди. Йеңи медицинилиқ мәһкимидә ана вә бала мәркизи, хирургиялик, терапевтлиқ мәркәзләр, шуниң билән биллә бир сменида 700 адәмгә хизмәт көрситидиған клиникилиқ-диагностикилиқ мәркәз ишләйдиған болиду дәп планланмақта.
Шундақла, «Самұрық-Қазына» акционерлиқ җәмийитиниң башқарма рәиси А.Есимов пандемия пәйтидә миллий паравәнлик фонди тәрипидин саламәтлик сақлаш системиси вә вәтәнлик ишләпчиқарғучиларни қоллаш үчүн қобул қилинған чариләр һәққидә ейтип өтти. Шуниң билән биллә Н.Назарбаевқа пайтәхт билән Алмутида медицинилиқ мәркәзләрни селиш бойичә тапшурмиларниң орунлиниши бойичә һесават берилди.
А. Есимов Елбасыға 3000 данә көләмидә «Авифавир» дорисини сетивелиш вә таҗсиман вирусқа қарши вакцина йәткүзүш бойичә имзаланған шәртнамә һәққидә мәлумат бәрди.
Шундақла Н.Назарбаев Қазақстанниң қедимий тарихий җайлириниң бири һесаплинидиған «Шымкент ескі қалашығы» тарихий-мәдәний мирас ядикарлиғиға барди.
Қедимий шәһәрчини арилап көрүш пәйтидә Тунҗа Президент археологиялик ишларниң нәтиҗилири вә мәдәний комплексни тәрәққий әткүзүш ишлири билән тонушти.
Тәвсийә қилинған әхбаратлар бойичә, 2021-жили комплекс территориясида оттура әсирлик мирасгаһ билән 500 орунлуқ амфитеатрниң қурулуши башлиниду.
Шундақла чарә-тәдбир даирисидә шәһәр һакими М.Әйтенов Чимкәнтниң туристлиқ иқтидари вә униң тәрәққият истиқбали һәққидә ейтип өтти.