• Асасий мақалилар
• 01 Қазан, 2020

Елимиз үчүн муһим шәһәр

Өткән һәптидә Дөләт рәһбири Қасым-Жомарт Тоқаевниң Алмутиға болған иш бабидики сәпири И.Жекенов намидики шәһәрлик клиникилиқ жуқумлуқ ағриқлар ағриқханисиниң йеңи шөбисини зиярәт қилиштин башланди, дәп хәвәрлиди Президентниң мәтбуат хизмити.
Қасым-Жомарт Тоқаев 500 адәмгә станционарлиқ медицинилиқ ярдәм беришкә беғишланған вә заманивий әсвап-үскиниләр билән җабдуқланған палатиларни арилап чиқти.
Дөләт рәһбиригә шәһәрдики медицинилиқ-демографиялик әһвал вә COVІD-19 вирусиға қарши күрәш үчүн қобул қилинған чариләр, шундақла медицинилиқ тез ярдәм хизмитиниң иши һәққидә һесават берилди. Президент медицина хадимлири билән болған сөһбити давамида миллий саламәтлик сақлаш саһасини тәрәққий әткүзүш, медицинилиқ мәһкимиләрни һаҗәт болған қурал, орун-көрпә билән тәминләш, шундақла дохтурларниң маашини ашуруш мәсилилиригә тохталди.
– 2023-жилғичә медицина хадимлириниң маашини пүткүл ихтисаттики оттура мааштин икки һәссә жуқури дәриҗигә йәткүзүш вәзиписи қоюлиду. Дәсләпки медицинилиқ санитарлиқ ярдәм бериш ишини тәрәққий әткүзүшкә алаһидә әһмийәт берилиду. Әпсус, өз вақтида бу саһаға мунасип диққәт бөләлмидуқ. Эпидемия мошундақ иш-һәрикәтләрниң хата екәнлигини көрсәтти. Һазир әвәтилгән хаталиқларға дурус көңүл бөлүп, уларни түзитишимиз лазим, – деди Қасым-Жомарт Тоқаев.
Дөләт рәһбири таҗсиман вирусниң еһтимал йеңи долқуниға тәйяр болушниң муһим екәнлигини тәкитлиди. Мошу пәйттә гражданлиримизниң һаяти вә саламәтлигини сақлаш үчүн барлиқ ресурсларни тәминләш һаҗәтлигини ейтти.
Учришиш ахирида Дөләт рәһбири пандемиягә қарши күрәштә пидакаранә әмгиги үчүн дохтурларға миннәтдарлиқ изһар қилди.
Қасым-Жомарт Тоқаев Алмутиға болған иш бабидики сәпири даирисидә шәһәрниң Индустриялик территориясидә орунлашқан Энергия ихтисат қилидиған шолилиқ панельлар заводиниң иши билән тонушти.
Президентқа заводниң мәһсулатлири тонуштурулуп, қурулуш материаллири санаитиниң технологиялик җәрияни намайиш қилинди. Бу йәрдә 250тин ошуқ адәм ишләйду. Ширкәтниң лайиһәгә салған шәхсий инвестицияси – 3,8 миллиард тәңгә. Заводниң қувити жилиға 475 миң квадрат метр әйнәк пакет чиқиришқа йетиду.
Шундақла Дөләт рәһбиригә Алмута индустриялик территорияниң бүгүнки әһвали, тәрәққият истиқбали һәққидә һесават берилди. Мошу йәрдә жилниң ахириғичә хуни 85 миллиард тәңгә болидиған 10 лайиһәни әмәлгә ашуруш мәхсәт қилинмақта.
Президент шу күни йеник автомобильларни чиқиридиған Hyundaі Trans Kazakhstan заводиниң ишқа қошулуш тәйярлиғини тәкшүрди. Дөләт рәһбиригә лайиһәниң Алмута шәһириниң индустриялик территориясидики дөләтлик қурулумларниң қоллиши билән әмәлгә ашурулуватқанлиғи һәққидә ейтилди. Кархана ишқа қошулғандин кейин униң қувити биринчи басқучта жилиға 30 миң машина, иккинчи басқучта 45 миң машина чиқиришқа йетиду. Инвестицияниң умумий көләми 28 миллиард тәңгидин ошуқ, униң 30 пайизи – ширкәт мәблиғи. Завод 700гә йеқин иш орнини ачиду. Инвесторлар келәчәктә автоқисимлар чиқиридиған завод селишни планлаватиду.
Президент объектларни арилап чиққандин кейин индустриялик территория резидентлири билән шәхсий тиҗарәтни қоллаш вә санаәт орниниң саһалирини тәрәққий әткүзүш мәсилилири муһакимә қилинди.
– Мән Мәктүбимдә елимиздики тиҗарәтни тәрәққий әткүзүшкә алаһидә әһмийәт бәрдим. Болупму, бизнесниң, тиҗарәтчиликниң тәрәққиятиға дөләт органлири тәрипидин кәлтүрүлидиған тосалғуларниң елимизгә қилинған җинайәт сүпитидә қарилидиғанлиғини ейттим. Йәни, башқичә ейтқанда, йәрлик иҗраий органлар тиҗарәтчиликни тәрәққий әткүзүшни һәртәрәплимә қоллиши лазим. Бу – ихтисадий сәяситимизниң асасий йөнилиши. Базарни монополистлардин тазилаш керәк. Барлиқ тиҗарәтчиләрниң базарға кирип, әркин ишлишигә имканийәт бериш һаҗәт. Шу вақиттила ихтисат әркин тәрәққий етиду. Мошуниң һәммиси йеңи тәшкилий чариләрни қобул қилишни тәләп қилиду. Бу чариләр нәтиҗидар болиду дәп үмүт қилимән,– деди Президент.
Сәпәр давамида Президент «SEN» музыкилиқ мәркизини зиярәт қилди. Мәркәзни зиярәт қилиш давамида Қазақстан Президентиға мегаполистики қошумчә билим бериш инфрақурулумини тәрәққий әткүзүш, сүпитини ашуруш вә уларға баридиған балилар санини көпәйтиш ишлири бойичә һесават берилди. Йеқин арида Алмутида икки көпсаһалиқ оқуғучилар сарийини, бирнәччә тән-тәрбийә вә сағламлаштуруш комплексилирини селиш планлиниватиду.
Дөләт рәһбири көпфункциялик мәркәзниң иши билән тонушуп, кәспий музыкилиқ әсваплар билән җабдуқланған аваз язидиған студиялар билән оқуш синиплирини көздин кәчүрди.