• Йеңилиқлар
• 08 Қазан, 2020

Йеңи кәсип – йеңи цех

Сабирәм ӘНВӘРОВА,

«Уйғур авази»

Президент Қасым-Жомарт Тоқаев өз Мәктүбидә алаһидә қәйт  қилғинидәк, пәқәт бир җайда тохтап турмайдиған вә келәчәккә интилған милләтла, дунияға өз муваппәқийәтлирини көрситәләйду. Болупму, һазирқидәк еғир вәзийәттә алға қарап илгириләш наһайити муһим. Қийинчилиқларниң қаримиғидин қутулушниң әң тоғра йоли – тохтап қалмаслиқ...

Бүгүн бизниң, көпчилик билән бөлүшидиған йеқимлиқ йеңилиғимиз бар. Уйғур наһийәсидә тиҗарәтниң йеңи бир юлтузи парлиди. Йәни, наһийәдә биринчи қетим қәғәз қалдуғини қайтидин ишләш қолға елинип, һаҗәтхана қәғизини ишләпчиқиридиған йеңи цех ишқа қошулди. Хуни 15 миллион тәңгә туридиған ихчам цехни ишқа қошқан йәрлик тиҗарәтчи Серик Супиевтур.

Бүгүнки күндә йеңи цехтин чиққан товарлар базар тәкчилиридин орун елип, аһалиниң пайдилинишиға өтти. Сода-сетиқ мәркәзлиридин йәрлик товарни байқиған турғунларниң хошаллиғида чәк йоқ.

Буниңғичә әхләт төкүш орунлириға әвәтилип, күл болуп иси көккә учуп кәлгән қәғәз қалдуқлири әндиликтә йеңи цехқа өткүзүлүп, аһалиниң һаҗитиға ярамлиқ мәһсулатқа айланмақта.

 Дәрһәқиқәт, елимиздә қалдуқни қайта ишләйдиған завод-фабрикилар йоқниң орнида. Йеқимлиқ йеңилиқтин мәмнун болған Уйғур наһийәсиниң һакими Шөһрәт Нурахунов чоң мәхсәтни көздә тутқан ихчам цехниң иш-җәрияни билән тонушуп, тиҗарәтчи Серик Супиевниң йеңи башланмисиға утуқ тилиди.