- Әхбаратлар еқими
- 15 Қазан, 2020
100 күн: утуқ көп, камчилиқму йоқ әмәс
Әмгәкчиқазақ наһийәсиниң һакими Қуанышбек Қашқымбаев ушбу хизмәткә киришкинигә 100 күн толуши мунасивити билән бир топ журналистларни қобул қилди. Униңға мәзкүр қурларниң муәллипи, йәни “Уйғур авази” гезитиниң Әмгәкчиқазақ наһийәси бойичә өз мухбири Рашидәм Рәһманова, Алмута вилайәтлик «Жетісу» вә «Огни Алатау» гезитлириниң Әмгәкчиқазақ наһийәсидики мәхсус мухбирлири Болат Мәжитулы билән Ерғанат Оралбаев, Әмгәкчиқазақ наһийәлик «Еңбекшіқазақ» гезитиниң баш муһәррири Хайролла Ахметжанов, наһийәлик «Иссык» гезитиниң мухбири Алишер Матхалықов, «ЮТ» радиокомпаниясиниң баш муһәррири Айгүл Ғабсаттарова-Эм, наһийә һакиминиң мәтбуат кативи Динара Төлемисова, шундақла Әмгәкчиқазақ наһийәси һакиминиң орунбасари Айбек Бидаев һәм наһийәлик ички сәясәт бөлүминиң башлиғи Мөмүнҗан Исламов қатнашти.
Рашидәм РӘҺМАНОВА,
«Уйғур авази»
– 100 күнниң ичидә барлиқ йеза округлирини арилап, турғунларниң иҗтимаий турмуши билән йеқиндин тонуштум, – дәп сөзини башлиди наһийә һакими. – Турғунлар билән болған учришишлардин алған тәсиратлиримни силәр билән бөлүшүшни тоғра көрдүм. Баштила шуни ейтқум келидуки, наһийәниң келәчиги зор, йери мол, адәмлири ишләмчан. Буниңға мән 100 күнниң ичидә йәнә бир қетим көз йәткүздүм.
Әмгәкчиқазақ наһийәсидә 79 йеза бар. Униң һәрбиридә проблема бар, болупму наһийәдики таза су мәсилиси мени көп ойландурди. Ғәйрәт, Сазы, Көкпек, Ачисай, Таусүгүр, Торғайбаза, Сарытав вә Сарыбулақ йезилири мошу кәмгичә мәркизий су системисиға қетилмиған. 21 йезисидики су трубилири җиддий җөндәшни яки қайта селишни тәләп қилиду. Умумән, наһийәниң пүткүл су трубилири махтиғидәк әмәс. 100 күнниң ичидә Бөлек, Қараторуқ вә Челәк йеза округлириниң суға мунасивәтлик бираз мәсилиләрни һәл қилишқа тириштим.
Шундақла Қуанышбек Қашқымбаев йеза егилиги саһасидики камчилиқларғиму тохтилип өтти. Бу саһадиму гәп йәнә шу судин башланди. Бийил суниң йетишмәслигигә бағлиқ наһийә деханлири етиз-ериқлириниң қуруп кетишигә дуч кәпту. Бу камчилиқларниң алдини елиш, суғириш системисини қайта тикләш мәхситидә наһийәдә ПУИД-2 вә ПУИД-3 программилири әмәлгә ашидиған болди. ПУИД-2 программиси бойичә Балтабай йеза округида 67 чақирим каналниң қайта тартилиши башланди. Бу мәхсәттә җумһурийәтлик бюджеттин 2,6 миллиард тәңгә бөлүнди. ПУИД-3 программиси бойичә Қараторуқ йеза округида 150 чақирим канални қелипиға кәлтүрүш реҗиләнгән. Мабада, мошу программилар әмәлгә ашса, наһийәниң терилғу мәйданини бәш миң гектарға йәткүзүшкә мүмкинчилик туғулиду. Бу мәхсәттә Чоң Алмута канилиниң, Бартоғай су қоймисиниң, 14 су егилиги кооперативиниң рәһбәрлири, йеза округлириниң һакимлири билән учришиш көздә тутулмақта.
– Йезилар билән Ишиктә шәһириниң тазилиғиму – муһим мәсилә. Үч айниң ичидә наһийә бойичә 97 әхләтхана, қанунсиз қалдуқ сақлайдиған 19 полигон йепилип, 950 тонна әхләт чиқирилди. 190 қанунсиз ечилған сода-сетиқ орни йепилди, – деди һаким тазилиқ һәққидә гәп қозғап.
Әгәр ихтисадий көрсәткүчләр һәққидә ейтсақ, 2019-жилқи вә бийилқи тоққуз айниң көрсәткүчлири бойичә ишләп чиқирилған йеза егилиги мәһсулатиниң көләми 3,2 миллиард тәңгигә өскән. Йәни, 2019-жили – 79,8 миллиард тәңгә болса, бийилқи көрсәткүч – 83 миллиард тәңгә.
Ишләпчиқириш мәһсулатлири 3 миллиард тәңгигә көпәйгән. Кичик вә оттура тиҗарәт субъектлириниң ишләп чиқарған мәһсулат көләми билән көрсәткән хизмәт мөлчәри 3,5 миллиард тәңгигә өсүпту. Ихтисадий өсүмгә бағлиқ дөләт бюджетиға чүшидиған селиқму көпәйди. Өткән жилқи 9 ай билән селиштурсақ, бийилқи 9 айда селиқ 1 миллиард тәңгигә өскән.
Әлвәттә, таҗсиман вирус пандемияси наһийә ихтисадиниң тәрәққиятиға өз тәсирини йәткүзмәй қоймиди. Мәсилән, чегариларниң йепилишиға бағлиқ, товар сетиш, сетивелиш, инвесторларни җәлип қилиш охшаш мәсилиләрдә қийинчилиқлар йүз бәрди. Бу өз новитидә йеза егилиги саһасини тәрәққий әткүзүштә бәзибир проблемиларни пәйда қилди. Ушбу камчилиқларниң орнини толтуруш үчүн һазир йеза егилиги мәһсулатлирини өстүрүшкә лайиқ бош йәрләр ениқлинип, улардин үнүмлүк пайдилиниш үчүн йәрлик инвесторларни җәлип қилиш қолға елинди. Тиҗарәтчиликни риваҗландуруш мәхситидә бәзи тосалғулуқларни елип ташлаш вә қисқартиш ишлири кетип бариду.
– Қазақстан Җумһурийитиниң Президенти Қасым-Жомарт Тоқаевниң рәһбәрлигидә әмәлгә ешиватқан «Жұмыспен қамтудың жол картасы» программиси нурғун мүмкинчиликләрни бәрди. Бу йөнилиштә наһийә даирисидә 106 бенаниң қурулуши билән җөндәш ишлириға 11, 5 миллиард тәңгә бөлүнди. Җүмлидин маарип саһасида – 47 бена, мәдәнийәт саһасида – икки бена, спорт саһасида – бир бена, турушлуқ өй коммуналлиқ егилигидә сәккиз бена, медицина саһасида икки бена, 46 һәрхил дәриҗидики йолларниң қурулуши вә җөндәш ишлири әмәлгә ашти. Уларниң ичидә 80 бена пайдилинишқа берилди, – дәп сөзини давамлаштурди наһийә һакими. – Наһийәдә йешилишини тәләп қилған мәсиләрниң бири – үчсменилиқ мәктәпләр. Наһийә бойичә Рахат йеза округида 1200 орунлуқ, Түргүн йезисидики Қонаев намидики мәктәп йенида, Достлуқ йезисидики А.Бертаева намидики мәктәп йенида, Тәшкәнсаздики Һ.Абдуллин намидики мәктәп йенида вә Қазақстан йезисиниң Қайипов намидики мәктәп йенида 300 орунлуқ қошумчә беналарниң қурулуши реҗиләнди. Пайдилиниш қәрәли аллиқачан өтүп кәткән мәктәп беналириниң орниға 150 — 300 орунлуқ йеңи беналирини вә 19 мәктәпни җиддий җөндәштин өткүзүш һаҗәт. Бу мәхсәттә 17 — 19 миллиард тәңгигә йеқин мәбләғ һаҗәт екән. Алмута вилайитиниң һакими Амандық Баталов бу лайиһиләрни қоллап, һазирчә Төле би вә Тәшкәнсаз йезилиридики ихчам вә Ишиктә шәһиридики 1500 орунлуқ мәктәп беналириниң қурулушиға мәбләғ бөлүнди. Һазир Бижанов йезисидики қурулуш баһаси 369 миллион тәңгилик спорт комплексиниң қурулуши аяқлишип қалди, – деди һаким сөзини давамлаштуруп.
Андин наһийә һакими жилниң ахириғичә 30 миллиард тәңгә инвестиция җәлип қилип, тәвәдә бирнәччә ишләпчиқириш орунлирини ечиш, инвестициялик лайиһиләрни орунлаш керәклиги һәққидә тәпсилий ейтип өтти.
Мәсилән, Қирбалтабайда «Жетысу Соя» җавапкәрлиги чәкләнгән ширкитиниң сояни қайта ишләш заводи ишқа қошулуп, 78 адәм иш билән тәминлиниду.
Ақши йезисида елимиздики тәңдиши йоқ, ахирқи үлгидики «Фроско» ширкитиниң 4000 тонна көктат вә йәл-йемиш сақлайдиған вә уларни қайта ишләйдиған цехи ишқа қошулиду. Бу йәрдә халиғучиларни 82 иш орни күтмәктә.
Ахирида журналистлар өзлири һәм гезит оқурмәнлирини қизиқтуридиған соалларни қоюп, уларға қанаәтлинәрлик җаваплар алди. Мәсилән, соалларниң нурғуни 1997-жили икки наһийә қошулғандин кейин нәзәрдин сирт қалған Челәк региониға бағлиқ болди. Җүмлидин наһийә һакими «Челәк мәркизий ағриқханиси қачан регионниң турғунлириға һәқсиз хизмәт қилишқа башлайду?», «Челәк автостанциясини қелипиға кәлтүрүшкә боламду?», «Челәк водоканилини наһийәлик су тармиғидин айрип, мустәқил егилик ретидә қайта ечиш мүмкинму?», «Наһийәгә газ тартиштики баһалар билән униң сүпитигә ким җавапкәр?», «Тәбиий мәнзириләргә бай наһийәдики, Алтун Адәмниң вәтини – Ишиктә шәһиридики туризмни тәрәққий әткүзүштики реҗиләр қандақ?» кәби соалларға тәпсилий җавап бәрди.
– Мән һәрқачан хәлиқ билән йеқин болушқа тиришимән. Үч айда 238 адәмни қобул қилдим. Көпчиликниң 9061 мураҗиитини қарап чиқтим. Шундақла турғунларниң бәзи соаллириға иҗтимаий торлар арқилиқму җавап берип туримән.
Қуанышбек Қалиулы журналистларға наһийә йеңилиқлирини гезит бәтлиридә хәлиққә тоғра вә оператив түрдә йәткүзүп, җәмийәтлик пикир һасил қилиш охшаш қийин ишиға утуқ тилиди вә наһийәниң абройини ашурушта җанпидалиқ билән әмгәк қилишқа чақирди.
Әмгәкчиқазақ наһийәси.
528 рет
көрсетілді0
пікір