• Йеңилиқлар
• 15 Қазан, 2020

Хәлиқ мәнпийитиДИКИ ишлар давамлишиду

Nur Otan партиясиниң Рәиси Нурсултан Назарбаев Бауыржан Байбекни қобул қилди, дәп хәвәрлиди Елбасыниң мәтбуат хизмити.
Учришиш давамида йеқинда өткән праймериз нәтиҗилири муһакимә қилинди.
Партия Рәиси биринчи орунбасариниң әхбаритиға мувапиқ, партия әзалириниң 84,2 пайизи аваз беришкә қатнашти. Униң 88 пайизи онлайн-режимда аваз бәрди. Тиркәлгән 10 073 намзатниң 36 пайиздин ошуғи аяллар, 29 пайизи 35 яшқичә болған яшлар. Ички партиявий таллаш нәтиҗисидә 20 миңдин ошуқ тәклип топланди. Униң ичидә турушлуқ өй мунасивәтлири вә турушлуқ өй-коммуналлиқ егилиги, инфрақурулум вә транспорт, билим бериш вә саламәтликни сақлаш саһалириға мунасивәтлик тәклипләр бар.
Нурсултан Назарбаев праймериз уйғунлуғини сақлап туруп, партия қатарини йеңилашқа имканийәт бәргән иҗтимаий лифтқа айланғанлиғини тәкитлиди.
— Бу бираз адәм қатнашқан партияниң кәңдаирилик чарә-тәдбиригә айланди. Биз уни дәсләпки қетим өткүзүватимиз. Партия диққәт бөлидиған көплигән тәклип вә мәсилиләр көтирилди. Nur Otan – ениқ ишлар партияси. Биз қобул қилған программилар җәзмән орунлиниши керәк, — дәп билдүрди Елбасы. Шуниң билән биллә Қазақстанниң Тунҗа Президенти партияниң сайламалди программисиниң лайиһисигә алаһидә тохталди.
— Сәясий кеңәшниң бюросида җумһурийәтлик сайламалди программиниң лайиһисини муһакимә қилған едуқ. Һазирқи җиддий әһвални нәзәрдә тутқан һалда, программида бизниң мәхсәтлиримиз вә кәңдаирилик вәзипилиримиз бәкитилди. Бу ишқа партияниң барлиқ әзалири җәлип қилиниду. Сәвәви, мошуниң һәммиси хәлиқниң паравәнлигини яхшилашқа қаритилған. Бизниң сайламалди вәдилиримизниң һәммисини орунлаш үчүн һәртәрәплимә тәйярлиниш лазим, — деди партия Рәиси.
Учришиш давамида Елбасы партияға «Bizbirgemiz» фонди билән бирликтә, пүткүл мәмликәт бойичә йәнә 100 миң иҗтимаий тәминати начар аилигә 50 миң тәңгә көләмидә қошумчә төләмләр уюштурушни тапшурди.
— Партияниң мәркизий аппарати билән бизниң активистлиримиз кәңдаирилик ишларни әмәлгә ашурди. Мән уларға җанпидалиқ әмгиги үчүн миннәтдарлиғимни изһар қилимән. Алдимизда атқуридиған ишлар көп. Хәлиқ мәнпийити үчүн қилидиған ишлиримизни давамлаштурушимиз керәк, — деди Қазақстанниң Тунҗа Президенти.