• Йеңилиқлар
  • 22 Қазан, 2020

Хәлиқара конференция Абайға беғишланди

Қазақстан, Қирғизстан вә Таҗикстан алимлири улуқ қазақ шаири вә мутәпәккүри Абай Қунанбаевниң 175 жиллиғиға беғишланған хәлиқара илмий-әмәлий онлайн-конференция өткүзди.

Қазақстанниң тарихий тәрәққият җәриянидики Абайниң орни, роли вә роһий мирасини ениқлаш – болуп өткән форумниң мәхсити әйнә шундақ.
– Абай Қунанбаев хәлиқ маарипи, цивилизациялик җәмийәт қурулуши дәвриниң башлинишиға асас салди, – деди Ч.Вәлиханов намидики Тарих вә этнология институти мудириниң мәслиһәтчиси, педагогика пәнлириниң доктори Сайин Борбасов конференцияни ечип. – Абай билим, тәрбийә вә әхлақ тарқатқучи болған. У исламни үгинишкиму хелә жилларни беғишлиди. Абай мунасип җәмийәт муһәббәтниң үч түригә – Аллаһқа болған муһәббәткә, пүткүл инсанийәткә болған муһәббәткә, адаләтликкә болған муһәббәткә асаслиниши керәк, дәп һесаплиған. Әйнә шу муһәббәт түрлириниң бири совуса, җәмийәтму аҗизлишиду.
Мәлумки, Абай дуния тонушиниң шәкиллинишидә Шәриқ шаирлири билән алимлири, рус вә Европа классиклири – Пушкин, Лермонтов, Гёте, Байрон – чоң роль ойниди.
Конференциядә доклад билән сөзгә чиққучилар Абай дәвридики рус-қазақ роһий-мәдәний алақилири, шаир вә мутәпәккүрниң тәрәққий әткән ғәрип цивилизациясигә мураҗиәт қилиши охшаш мавзуларни көтәрди, Абай Қунанбаевниң роһий мирасини пайдилиниш вә тәрәққий әткүзүшкә болған йеңичә яндишишлар вә аспектлар қаралди.
Тарихчи, Тарих вә этнология институти этнология вә антропология бөлүминиң башлиғи Ақсуңқар Абдулина өз докладида Абайниң теги-тәкти арқилиқ, йәни атиси Қунанбай арқилиқ, шаирниң шәхсини ечишқа тиришти.
– Кеңәш вақтида көп әһвалларда Абайни атиси Қунанбайға қарши қоятти. Һазир болса, алимлар ата билән бала оттурисида низа-адавәт болмиған, дегән пикирдә болуватиду, – деди алимә. – Униңдин ташқири Абай көп җәһәттин Қунанбайға охшатти – әқил вә пәм-парасәт, өткүр зеһин, хәлиқ иҗадийитигә болған қизиқиш, чечәнлик, һоқуқ-қанунларни, шәриәтни билиш, һәтта Россия империясиниң қанунлирини Абай атисидин сиңдүргән. Қунанбайдин пәриқләнгән һалда Абай иҗадий, қәлби назук адәм еди.
Л.Н. Гумилев намидики Евразия миллий университети йенидики «Абай академияси» илмий тәтқиқат институтиниң мудири Ерлан Сайлаубай «Абай вә қазақ җәмийити» мавзусида доклад билән сөзгә чиқти.
– Һәрқандақ мәмликәтниң, һәрқандақ этносниң риқабәткә тақабиллиғи униң инсанийәт тәрәққиятиға қошқан әқлий һәссиси билән ениқлиниду. Абайму қазақ хәлқиниң өзгиришини, мукәммәллишишини, вақитқа һәмнәпәс қәдәм ташлишини арман қилған, – деди Ерлан Ерназароғли. – Абай өз хәлқи вәкиллириниң билим вә кәсип егилигәнләр қатарида болушини халиған. Һазир Швеция вә Норвегия аһалисиниң 70 пайизини оттура синип шәкилләндүриду. Улар неминиң һесавиға шундақ көрсәткүчләргә йәтти? Өз билимини ашуруш, өзлүгидин мукәммәллишиш арқилиқ. Абайниң «мукәммәл адәм» формулиси адәм балисиниң билимгә, изгүлүккә, бәрпакарлиққа интилишини билдүриду.
Вақитниң көрситиватқинидәк, Абайниң мираси - өзиниң көпқирлиқлиғи, роһий вә әқлий чоңқурлуғи бойичә пүтмәс-түгимәс байлиқ. Шуңлашқа конференция йәкүни бойичә Абай мирасини комплекслиқ тәтқиқ қилиш, Ч.Вәлиханов намидики Тарих вә этнология инсититути коллективиниң Қазақстан университетлири йенидики «Абайшунаслиқ» мәркәзлири билән бирләшкән илмий тәтқиқатларни жүргүзүши тоғрилиқ тәклипләр қобул қилинди.

514 рет

көрсетілді

4

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы