• Йеңилиқлар
• 22 Қазан, 2020

Җәмийәт пайдиси үчүн

Әхбарат вә җәмийәтлик тәрәққият министри Аида Балаева йеқинда Алмута шәһири Җәмийәтлик кеңишиниң әзалири билән учрашти.
Дөләт рәһбириниң «Қазақстан йеңи реаллиқта: иш-һәрикәт вақти» Мәктүбидә әкис әткән «Җәмийәтлик назарәт тоғрилиқ» Қанунни ишләп чиқиш вә қобул қилиш тапшурмисини әмәлгә ашуруш - учришишниң асасий мавзуси болди. Униңға қатнашқучилар җәмийәтлик назарәтни қануний бәкитиш вә җәмийәтлик кеңәшләр институтини мукәммәлләштүрүш мәсилилирини муһакимә қилди.
– Дөләт рәһбири дөләт вә җәмийәтниң өзара һәрикәт қилиш шәкиллирини техиму тәрәққий әткүзүшниң, дөләт қобул қиливатқан қарарларни җәмийәтлик мониторинг вә назарәт қилишниң зөрүр екәнлигини тәкитлиди. «Җәмийәтлик назарәт тоғрилиқ» Қанун әйнә шуниңға қаритилған, – дәп тәкитлиди Аида Балаева.
Әмәлият җәмийәттә мундақ җәмийәтлик институтларниң жуқури еһтияҗға егә болуватқанлиғини тәстиқлимәктә. Қазақстанда җәмийәтлик назарәт мәсилилирини у яки бу дәриҗидә тәртипкә кәлтүрүватқан нормативлиқ-һоқуқ һөҗҗәтлириниң чоң түркүми бар. Әнди униң түрлүк шәкиллири, өз новитидә, җәмийәтлик кеңәшләр, дөләт хизмәтлири тоғрилиқ, экология, йәр асти байлиқлирини пайдилиниш саһалиридики бирқатар қанун һөҗҗәтлири билән тәртипкә кәлтүрүлиду. Тәбиийки, министрниң тәкитлишичә, җәмийәтлик назарәт объектлири вә субъектлири, шәкиллиридә пәриқләр моҗут.
Аида Балаева һазир «йол хәритисиниң» ишлинип чиққанлиғини, иш топи қурулуп, униң тәркивигә экспертларниң, Миллий җәмийәтлик ишәнчә кеңиши әзалириниң, һөкүмәтлик әмәс тәшкилатлар вә дөләт органлири вәкиллириниң киргәнлигини хәвәр қилди. Һазир Әхбарат вә җәмийәтлик тәрәққият министрлиги түрлүк мәйданларда гражданлиқ секторни кәң җәлип қилип, қанун лайиһисини муһакимидин өткүзүватиду. Қанун лайиһисиниң асасий қаидилирини муһакимә қилиш бойичә учришишлар, «дүгләк үстәлләр» уюштурулуватиду.
Министрниң тәкитлишичә, «Җәмийәтлик назарәт тоғрилиқ» Қанун лайиһиси концепциясиниң лайиһисини Һөкүмәт йенидики Қанун лайиһиси паалийити мәсилилири бойичә идариләрара комиссияниң қарап чиқишиға тәвсийә қилиш ноябрь ейиға бәлгүләнди.
– «100 ениқ қәдәм» Милләт планиниң 99-қәдимини әмәлгә ашуруш даирисидә дөләт органлирида қурулған җәмийәтлик кеңәшләрниң ролини күчәйтиш бойичә ишлар жүргүзүлүватиду. 234 җәмийәтлик кеңәш тәркивидә төрт миңға йеқин паалийәтчан граждан җәмийәтлик назарәтни әмәлгә ашуруватиду. Җәмийәтлик кеңәшләр паалийәт елип барған вақитта бирқатар сезиләрлик нәтиҗиләр қолға кәлтүрүлди, – дәп тәкитлиди Аида Балаева.
Министр биринчи новәттә җәмийәтлик кеңәшләрдә барлиқ дәриҗиләрдики дөләт органлири рәһбәрлириниң һесавитини тиңшаш әмәлиятиниң орун алғанлиғини әслитип өтти. Әнди нормативлиқ-һоқуқ һөҗҗәтлириниң лайиһилирини келишиш болса, җамаәтчиликниң қарарларни қобул қилишқа болған тәсирини ашуруш имканийитини бәрди. Төрт жилда җәмийәтлик кеңәшләр 19 миңдин ошуқ нормативлиқ-һоқуқ һөҗҗәтлириниң лайиһисини қарап чиққан.
Учришишта шундақла Алмута шәһири Җәмийәтлик кеңишиниң әзаси, «KAZBREND» җәмийәтлик фонди башқармисиниң рәиси Нурлан Жазылбеков, «КазРЕНА» Қазақстан илим-билим компьютерлиқ тармақлирини пайдилиниш ассоциациясиниң баш мудири, шәһәр Җәмийәтлик кеңишиниң әзаси Борис Жаппаров вә башқилар сөзгә чиқип, муһакимә қилинған мәсилә бойичә пикирлирини ейтип, бирқатар тәклипләрни оттуриға қойди.
– Бүгүнки таңда җәмийәтлик кеңәшләр институти гражданларниң түрлүк мәсилиләр бойичә өз пикирлирини изһар қилиш мәйданиға айланди вә дөләт органлири паалийитиниң очуқ болушини тәминлимәктә, – деди Аида Балаева учришишни йәкүнләп.