Асасий мақалилар
04 Қараша, 2020

Сәясий хаһиш-ирадә вә ихтисадий даналиқ

Қазақстан Президенти Шималий ихтисадий һәмкарлиқ бойичә хәлиқара форумда сөзгә чиқти.

Қасым-Жомарт Тоқаев Шималий ихтисадий һәмкарлиқ-2020 хәлиқара форумда видеомураҗиәт билән сөзгә чиқти. “COVID-19” инфекциясидин кейинки аләмшумул өзгиришләр вә шималий ихтисадий һәмкарлиқниң келәчиги” шиари астида уюштурулған мәзкүр чарә-тәдбир Сеулда өткүзүлди.
Дөләт рәһбири Корея Җумһурийитиниң Президенти Мун Чжэ Ин тәшәббус қилған вә кейинки үч жилда өзиниң актуаллиғини бирнәччә қетим испатлиған “Йеңи Шималий сәясәт” стратегиясини жуқури баһалап, Җәнубий Корея лидериниң гүлләнгән, өзара алақиси мәккәм вә турақлиқ Евразияни қуруш бойичә жирақни көзләйдиған сәяситини жуқури баһалиди.
Қазақстан Президентиниң пикричә, дуния таҗсиман вирус пандемиясиниң мисли көрүлмигән синақлириға дуч кәлгән һазирқи вақитта сәясий хаһиш-ирадә вә ихтисадий даналиқ һәл қилғучи әһмийәткә егә болуватиду.
Қасым-Жомарт Тоқаев Қазақстанда яшап, икки мәмликәт хәлиқлири оттурисидики достлуқниң “алтун көрүги” болуп хизмәт қиливатқан йүз миң корей миллити вәкилиниң Қазақстан билән Җәнубий Кореяниң умумий қәдрийәтләргә, өзара қоллап-қувәтләшкә вә адәмләр оттурисидики қоюқ алақиларға асасланған стратегиялик шериклигигә һәссә қошуватқанлиғини тәкитлиди.
– Кореяниң Қазақстан ихтисадиға бөлгән инвестицияси йәттә миллиард доллардин ешип кәтти. Аләмшумул тәртипсизликләргә қаримай, иккитәрәплимә товар обороти өсти. Тәкитләш керәкки, Мәркизий Азияниң барлиқ бәш дөлитиниң түгәл ички умумий мәһсулатиниң 70 пайизи Қазақстан әнчисигә тоғра келиду. Корея йетәкчи инвесторларниң арисида онинчи орунни егиләйду. Шундақ қилип, өзара пайдилиқ һәмкарлиғимизни техиму күчәйтиш үчүн пайдилинилмайватқан чоң иқтидар бар, – дәп тәкитлиди Дөләт рәһбири.
Қазақстан Президенти Мун Чжэ Инниң 2019-жили апрельда мәмликитимизгә қилған тарихий сәпириниң иккитәрәплимә мунасивәтләрдә йеңи сәһипә ачқанлиғини тилға алди. Мошу сәпәр вақтида имзаланған “Йеңи саба” программиси иккитәрәплимә Қазақстан – Корея ихтисадий, сода вә мәдәний мунасивәтлирини җанландурушқа қаритилған.
Қасым-Жомарт Тоқаев буниңға мунасивәтлик “Йеңи саба” программисиниң вә “Йеңи Шималий сәясәт” стратегиясиниң миллий программиларда, җүмлидин “Рәқәмлик Қазақстан” вә “Нұрлы жол” программилирида көздә тутулған стратегиялик вәзипиләргә мувапиқ келидиғанлиғини атап көрсәтти.
Дөләт рәһбири шундақла инглиз һоқуқида ишләватқан “Астана” Хәлиқара малийә мәркизиниң иқтидариға тохтилип, чәт әл бизнеси үчүн униң экосистемисиниң надир екәнлигини тәкитлиди.
Қасым-Жомарт Тоқаев сөзиниң ахирида форум қатнашқучилириға үнүмлүк иш, Җәнубий Корея Президенти вә Һөкүмитигә уларниң алийҗанап башланмилирида утуқ-муваппәқийәт тилиди.