• Хәйрихаһлиқ
• 19 Қараша, 2020

Жутдашлири өй селип бәрди

Талғир наһийәсидә истиқамәт қиливатқан қериндашлиримиз дайим хәйрихаһлиқ паалийәтлири билән пәриқлинип кәлгән. Улар қолидин кәлгән ярдимини һечкимдин айиған әмәс. Болупму бийилқи пандемия пәйтидә талғирнаһийәликләрниң өзлириниң инақлиғи билән өмлүгини намайиш қилған һалда, бу җәһәттин карванбеши болуп кәлгәнлиги сөзүмизниң ярқин испатидур.
Һазир улар паалийитини техиму җанландуруп, өй-макансиз қалған яки өйлири яшашқа яримайдиған дәриҗигә йәткән инсанларға қол учини сунуп кәлмәктә. Бизчә болғанда, бу һәқиқий алийҗанап хисләтләрдин болса керәк. Буниңдин бираз вақит илгири Қизил Ғәйрәт йезисиниң бир топ жут активистлири вә һамийлар мошу йезиға қарашлиқ «Арман» микрорайониниң турғуни Гүлчеһрәм Ибдиминованиң кона өйиниң яшашқа хәтәрлик екәнлигидин хәвәр тапиду. Шу-шу болдидә, «Арман» микрорайони ханим-қизлар кеңишиниң рәиси Реһимәм Зәйнавдинованиң тәшәббуси түпәйли барчә бирлишип, икки бөлмилик өй селишниң тәрәддутини башлавәткән еди. Арилиқта икки ай өтмәй, асасий хираҗәтни өз зиммисигә алған Бақиевлар аилисиниң һамийлиғида икки бөлмилик өйниң ачқучи йеқинда өй егисигә тапшурулди. Бу йәрдә мәһәллиниң жут-җамаәтчилигиму чәттә қалмай, қолидин кәлгән ярдимини берип турди.
«Бала-қаза кәлсә, қошлап кәпту» демәкчи, Гүлчеһрәм Ибдиминова бир айниң ичидила аниси билән акисидин айрилип, дәрт-әләм чөмгән мәзлум еди. Униң өйиниң әһвалини көргән жутдашлири уни роһий һәм маддий җәһәттин қоллап, тәсәлла ейтқандин ташқири, өй селип бәргини һәқиқий қәһриманлиққа ятса керәк.
Иминҗан ТОХТАХУНОВ,
Талғир наһийәлик Уйғур этномәдәнийәт мәркизиниң рәиси.