• Муштири  топлаш – 2021
• 26 Қараша, 2020

Бизгә планниң немә кериги бар?

Бәхтишат СОПИЕВ,
«Уйғур авази»

Өткәндә муштирилиримиз билән болған бир учришишта жигитбеши: «Йезимиздики мәктәптә уйғур муәллимлири көп, амма улар «Уйғур авазиға» йезилмайду. «Немишкә? десәңлар, уларға һакимийәттикиләр план бәрмәйдекән” деди.
Жигитбеши тилға алған нәрсә, әсли «разнарядка». Уйғурчиси - бөлүп бериш. Буму шу кеңәш дәвридин келиватқан иш. Мәсилән, бир наһийәгә гезит-журналларға қанчә адәм муштири болуши керәклигини аһалиниң саниға қарап бөлүп берәтти. Активистлиримиз «бизгә гезитқа паланчә план бәрди» дәп шуниңға қарап иш тутидиған. Ахирқи жиллири бу “тәхсиматтин” қутулдуқ, әйтәвир. Буниңдин кейин һечкимни мәҗбурлашқа болмайду. Буни аңлап, бизниң хошал болғинимиз раст. Чүнки әнди дөләт хизмитидикиләр, шундақла муәллимләр өзлири халиған гезит-журналларға йезилидиған болди. Уйғур мәктәплириниң муәллимлири, әлвәттә, баһаси әрзән, амма өзи қиммәт ана тилидики гезитқа йезилиду. Бирақ җүҗини күздә саниведуқ, биз күткәндәк болмиди. Мүмкин, башқа нәширләрни оқуп үгинипму қалғанду, дәп йәнә шу яхшилиққа җоридуқ. Илаһим, шундақ болғай.
– Ака, бизгә планниң немә кериги бар? «Гезитқа йезил», «Уйғур мәктивигә балаңни бәр», «театрға билет ал» дәп қачанғичә план билән иш қилимиз. Мана алдиңларға келиватимиз, йезида 400 аилә баркән, униң 300 йезилсиму аз әмәс. Мана сизгә план,–дәп жигитбешиға лохма салғанларму болди.
Раст, жигитбешиниң муәллим охшаш алий билими йоқ болғини билән, жүригидә оти бар. Уйғур үчүн отқиму, суғиму кириду. Улар бизниң һәқиқий җанкөйәрлиримиз.