• Муштири  топлаш – 2021
• 26 Қараша, 2020

Сиз «Уйғур авазиға» йезилдиңизму?

Қазақстан маарип әлачиси Пәйзуллам ӘКРӘМОВ:

«У мениң 63 жиллиқ қәдинас достум»

Сабирәм ӘНВӘРОВА,

«Уйғур авази»        

– Һелиму ядимда, бу - мениң һаятимдики әстин чиқмас вақиәләрниң бири. У чағда мән КазПИниң студенти едим. Хаталашмисам, 1956 — 1957-жиллар... КазПИда уйғур бөлүми йеңидин ечилип, униңда 25 студент билим алатти. Мән вә маңа охшаш 4 уйғур жигити қазақ топида оқаттуқ. Улар шеирийәт сәрдари Илия Бәхтия, атақлиқ язғучи Муңлуқ Бақиев, Мустапа Низамов вә Әхмәт Савутов. Мошу бәшимиз бир топта оқуп, йеқин арилашқан. «Коммунизм туғи» (һазирқи «Уйғур авази») гезити йеңидин ечилған жили шу вақитлардики гезитниң баш муһәррири Абдулла Мәшүров бизниң институтқа келип, КазПИниң (һазирқи Абай намидики Қазақ миллий педагогика университети) ректори хизмитини атқуруватқан Мәлик Ғабдуллинға йолуқиду. А.Мәшүров «Коммунизм туғи» гезитиға муштири топлаш мәсилиси бойичә кәлгән екән. Хулләс, оқуш орниниң рәһбәрлиги униң билим дәргаһидики уйғур студентлар билән учришиш тәливини рәт қилмай, уйғур бөлүмидики 25 студент билән қазақ топида билим еливатқан бәшимизни чақиртип, учришиш уюштуруп бәрди.

 Абдулла Мәшүров интайин салаһийәтлик шәхс еди. Қисқиғина учришишта у бизгә өмүрлүк савақ болидиған гәпләрни қилип, гезитниң җәмийәттики роли, ана тилимизниң тәғдири һәққидә мәзмунлуқ сөһбити билән бизниң миллий ғуруримизни ойғатқан еди десәм, мубалиғә болмас. Уйғурниң қаракөз яшлири бир еғиздин «Коммунизм туғиға» муштири болушқа келиштуқ. У чағда гезитқа йезилиш баһаси 31-32 сом болидиған. Һә биз, бари-йоқи 28 сом стипендия алаттуқ. Бизниң чирайимиздинла миллий роһни байқиған ректоримиз бу мәсилиниму һәл қилип бәрди. Һәр айда студент һәққимиздин икки сомни гезитқа дәп тутуп қалидиған болди. А.Мәшүров гезитқа оттуз оқурмән тапқини үчүн, һә биз анатиллиқ әңгүштәримиз «Коммунизм туғиға» муштири болғанлиғимиз үчүн хуш болдуқ. Мана шуниңдин бери мән «Уйғур авазиниң» турақлиқ оқурмәни. У мениң 63 жиллиқ қәдинас достум.

Студентлиқ чағлиримдин тартип гезитқа мақалә йезишқа һәвәс бағлидим. Мошу кәмгичә «Уйғур авазиға» жигирмидин ошуқ мақаләм бесилди. Бу гезит - мениң үчүн бебаһа. У - мениң авазим. У - хәлқимниң авази! Һәр қетим «Уйғур авазини» варақлиғанда, студентлиқ дәвримни, Илия Бәхтия, Муңлуқ Бақиевтәк есил инсанлар билән достлуғимиз ярашқан яшлиғимни әсләп, худди қолумда шулардин қалған аманәт турғандәк, һиссиятта болимән... Институтни пүтирип, наһийәлик билим бөлүмигә келип, ишқа орунлаштим. Бир жилдин кейин ана жутум Чариндики мәктәпкә авуштум. Махтанғиним әмәс, та әмгәк дәм елишиға чиққичә, 42 жил мабайнида Чариндики билим юртида муәллимдин мудирлиқ лавазимғичә көтирилдим. Мана бүгүн һөрмәтлик дәм елишта, меһнитимгә чушлуқ һалавәт көрүп яшимақтимән. Көзүм бурунқидәк яхши көрмигәчкә, гезитни нәврилирим оқуп бериду. Бари-йоқи төрт миң тәңгигә дунияни төрт айлансамму тапалмайдиған гезитимизға йезилип, жилларни жилларға улап, өмрүм бәхтияр өтмәктә.

 Чарин йезиси,

Уйғур наһийәси.