• Хәйрихаһлиқ
• 27 Қараша, 2020

Ақнийәтлик «Назугум»

Мәшүр САСИҚОВ,
«Уйғур авази»

Талғир наһийәси Гүлдала йезисиниң турғунлири хәйрихаһлиққа толиму майил. Улар бу ишниң қир-сирини убдан үгинип, хелила бай тәҗрибә топлиған. Һәтта гүлдалалиқларға җумһурийәт Президенти Қасым-Жомарт Тоқаевниң өзи алаһидә миннәтдарлиғини билдүрүп, Тәшәккүрнамисиниму әвәткән еди.
Гүлдала йезисиниң жут-җамаәтчилиги башқилардин мана мошундақ өзлириниң хәйри-сахавәтлик вә бешиға күн чүшкән һәрқандақ қериндаш-жутдишини чәттә қалдурмайдиған хислити билән пәриқлиниду. Әлвәттә, бу — жуттики инақлиқ-бирликниң испати.
Әнди биз бүгүн мошу йезида паалийәт елип бериватқан Ханим-қизлар кеңиши йенида қурулған, йәни бир топ мәрт-мәрданә вә милләтпәрвәр һәм вәтәнпәрвәр қизлардин тәркип тапқан «Назугум» топиниң атқуруватқан ишлириға тохталмақчимиз. «Назугум» топиниң әзалири иҗил-инақлиғи, һәрқандақ чарә-тәдбирни уюштуруш яки уни жуқури дәриҗидә өткүзүш алдида чоңлар билән мәслиһәтлишип иш тутуши түпәйли көпчиликниң алқишиға сазавәр болуп кәлмәктә. Улар жут мөтивәрлири билән нураний аниларға һөрмәт көрситиш вә ана тилимизда нәшир қиливатқан мәтбуат васитилиригә, болупму хәлқимизниң мәдәний һаятини йорутушта муһим роль атқуруватқан «Уйғур авази» гезитиниң муштирилириниң санини ашурушқа көп күч чиқириватиду. «Назугум» топи жут активистлири билән бирликтә миллий қәдрийәтлиримизни сақлаш билән биллә, асасән жуттики житим-йесир вә имканийити чәкләнгән инсанларға қол учини сунушни әнъәнигә айландурған.
Йеқинда улар йәнә бир яхшилиқни әмәлгә ашурди. Йезидики тәғдир тәқәзаси билән тәңтушлири охшаш халиғиничә дунияниң раһитидин бәһримән болуштин айрилған 20 балини өйлиригә йоқлап барди. Әлвәттә, улар қуруқ қол барғини йоқ. Бири каривәткә, бири накалар һарвусиға бағланған бу балилар «Назугум» топиниң әзалирини көргәндә, хошаллиғида чәк болмиди. Саламәтлигигә бола, күлкисидин муң-зари тола бу инсанларниң көңлини елип, уларға мәнивий вә роһий озуқ беғишлиған «Назугум» топиниң әзалириға һәммә апирин ейтишти. Һә, улар бүгүнгә қәдәр, шундақ инсанларниң талийиниң дуасини алди вә өзлириниң паалийитини буниңдин кейинму давамлаштурушқа тиришиватиду.
Хәйрият, ахирида ейтмақчи болғинимиз, мошундақ ишларниң талийини әмәлгә ашуруш қолидин келип турсиму, ундақ қилиш ухлиса чүшигә кирип чиқмайдиған қериндашлиримизниң инсави қозғилип, «Назугум» топиниң әзалиридин үлгә алсекән демәкчимиз.