• Йеңилиқлар
• 27 Қараша, 2020

Хошна вә шерик

Қазақстан Һөкүмитиниң рәһбири Асқар Мамин Өзбәкстан Премьер-министри Абдулла Арипов билән учрашти.
Түркстан шәһиридә өткән учришишта һөкүмәт рәһбәрлири сода-ихтисадий, инвестиция, йеза егилиги, су-энергетика, транспорт-логистика, бажхана саһалиридики һәмкарлиқ, шундақла санаәт кооперацияси вә регионларара өзара һәрикәт мәсилилирини муһакимә қилди.
Қазақстан Җумһурийити вә Өзбәкстан Җумһурийити оттурисидики һәмкарлиқни кәңәйтиш вә чоңқурлитиш бойичә 2020 – 2022-жилларға бәлгүләнгән Әмәлий чариләр планиниң әмәлгә ашурулушиға, регионлуқ товар ишләпчиқириш системисини вуҗутқа кәлтүрүш, Қазақстан-Өзбәкстан чегарисида Хәлиқара сода-ихтисадий һәмкарлиқ мәркизиниң иши, чегара йенидики өткүзүш пунктлирини йеңилаш мәсилилиригә алаһидә диққәт ағдурулди.
Өзбәкстан – Қазақстанниң региондики асасий сода шериги. 2019-жилниң йәкүни бойичә иккитәрәплимә товар муамилиси 21,2 пайиз өсүп, 4,5 миллиард долларға йәтти. Тәрәпләр уни 10 миллиард долларғичә йәткүзүшни көздә тутуватиду.
Һөкүмәт рәһбәрлири шундақла Түркстан шәһиридә тоқума буюмлар ишләпчиқириш бойичә Turkistan Textile Қазақстан — Өзбәкстан бирләшкән карханисини ечиш мәрасимиға қатнашти.
Тикинчилик фабрикиси Turkistan индустриал зонисида икки гектар йәргә орунлашти. Инвестиция миқдари – 700 миллион тәңгә. Карханиниң лайиһидики қувити – ейиға 13 миң тоқума буюмини ишләпчиқириш. Кархана аяллар үчүн миңдин ошуқ йеңи иш орнини вуҗутқа кәлтүрүш имканийитини бериду.
Асқар Мамин Абдулла Ариповни Түркстанниң иҗтимаий, спорт, транспорт вә туристик инфрақурулумлириниң йеңи объектлири – хәлиқара аэропорт, конгресс-холл, «Ұлы Дала Елі» мәркизи, «Туркестан Арена» стадиони, Мәктәп оқуғучилириниң сарийи, Rixos Turkistan меһманханиси, шундақла қурулуши кетип барған “Караван-сарай» көпсаһалиқ туристик комплекс вә бәш миң орунлуқ мечит билән тонуштурди.
Һөкүмәт рәһбәрлири Ғоҗа Әхмәт Йәссавий мәқбәрисини, «Әзрет-Султан» мәдәний-тарихий музейини зиярәт қилди, шундақла Абай ядикарлиғиға гүлдәстилирини қойди.