- Йеңилиқлар
- 29 Қазан, 2012
Мал беқишму билимни тәләп қилиду
Җумһурийәттә йеза егилиги қайта тиклинип, йетиштүрүлгән мәһсулат көләми, сезиләрлик дәриҗидә өссиму, бүгүнки таңда мәзкүр саһаларда заманивий технология усуллирини кәңирәк қоллинишни йолға қоюш тәләп қилиниватиду. Бу йосунда дехан билән чарвичиға йөнилиш көрситип, һаҗәт болғанда, әмәлий җәһәттин қоллаватқан йетәкчи мутәхәссисләрму лазим дәриҗидә билимгә егә болуши керәк. Мошу мәсилини һәл қилиш мәхситидә дөләтниң қоллап-қувәтлиши билән «Казагромаркетинг» акционерлиқ җәмийити елимизниң җай-җайлирида семинар-оқутуш ишлирини уюштурмақта. Җүмлидин бу хил иш-чарә мәзкүр җәмийәтниң вилайәтлик шөбиси тәрипидин Уйғур наһийәсидиму уюштурулуп, униңға «Казагромаркетинг» акционерлиқ җәмийитиниң баш эксперти, ветеринария пәнлириниң доктори Бауржан Қурманов, вилайәтлик шөбә мудири Оразбай Бекенов, акционерлиқ җәмийәтниң чарвичилиқ консалтинги департаментиниң менеджери Борис Ширухин, вилайәтлик ветеринариялик тәкшүрүш вә назарәт инспекцияси башлиғиниң орунбасари Серик Қабдолданов вә вилайәтлик ветеринария бөлүминиң башлиғи Әдилбек Далғабаев қатнашти. Наһийә һакими аппаратиниң башлиғи Султан Исламовниң риясәтчилигидә өткән мәзкүр семинар-оқутушқа Уйғур, Райымбек вә Әмгәкчиқазақ наһийәлириниң ветеринариялик станциялириниң мудирлири, ветеринариялик станцияләр билән регионлуқ ветеринария инспекциялириниң хадимлири, ветеринариялик бөлүмләр башлиқлири билән эпизоотолог-мутәхәссислири, ветеринариялик пунктлар йетәкчилири вә ветеринар дохтурлар иштрак қилип, шөбә мудири Оразбай Бекенов семинар қатнашчилириға чарвичилиқ консалтинги вә мал көпәйтишни башқуруш мәркизи һәм «Экспорт қилинидиған қара мал гөшиниң ихтидарини яхшилаш» лаһийиси бойичә әхбарат бәрди.
Андин ветеринария пәнлириниң доктори Бауржан Қурманов жуқумлуқ мал ағриқлириға қарши ветеринариялик иш-чариләр һәққидә әтраплиқ чүшәнчә бәрди. Мәлум болушичә, чәт әлләрдә биздә көп учришидиған мал ағриқлири чоң ховуп туғдурмайдекән. Чүнки төл елиниши биләнла уни һәр хил жуқумлуқ ағриқларға қарши дорилап, бу ишни улар турақлиқ рәвиштә, һәр пәсилдә жүргүзүп туридекән. Мабада, арилиқта үзүлүш болуп қалса, ағриқ мални давалап, андин вакцинация ишлирини қайтидин башлайду. Елимиз фермерлирида көпирәк қизиқиш һасил қиливатқан Ангус вә Герофорд нәсиллик қара маллардиму жуқумлуқ ағриқлар учришиду. Уни лабораториялик тәкшүрүш арқилиқ ениқлап, давалаш чарилиригә көңүл бөлүш керәк. Вируслуқ диарея, сальмонеллез, калибактериоза, инфекционлуқ ринотрахеит, парагрипп, кейинки жиллири көп учришиватқан ящур, сибирь язвиси, эмфизематозлуқ карбункул, бруцеллез вә башқиму жуқумлуқ ағриқларға қарши вакцинация чарилирини жүргүзгәндә, чәт әлләрдә ишләнгән вакцинилардин пайдиланған тоғра. У вакциниларниң бири онға йеқин ағриққа дава болиду.
Сөз новитини алған вилайәтлик ветеринария бөлүминиң башлиғи Әдилбек Далғабаев, асасән, мални тоғра вә өз вақтида давалаш чарилиригә әмәл қилиш, фермерлар билән аһали қолидики малниң нәқ санини компьютерлиқ мәлуматлар базисиға киргүзүш мәсилилиригә алаһидә тохталди. Мәлуматлар базисиға киргүзүлмигән мал үчүн дөләт тәрипидин вакцина бөлүнмәйдиғанлиғиму агаһландурулди.
Семинарниң давами әмәлий мәшғулатларға улашти. «Арман Батур» дехан егилигидә «Казагромаркетинг» акционерлиқ җәмийитиниң баш эксперти Бауржан Қурманов билән чарвичилиқ консалтинги департаментиниң менеджери Борис Ширухин ветеринария мутәхәссислиригә қара малниң анилиқ әзалири кесәлликлирини ультрасонограф аппарати арқилиқ диагностика қилиш вә фармакологиялик васитиләр арқилиқ давалаш бойичә мастер-класс өткүзди. Андин семинарниң йәкүни чиқирилип, униң иштракчилириға сертификатлар тапшурулди. Бу һөҗҗәтниң мал дохтурлириға жуқури җавапкәрликни жүкләйдиғанлиғи талашсиз.
Махмут ИСРАПИЛОВ.
Уйғур наһийәси.
564 рет
көрсетілді0
пікір
