• Мукапат мубарәк!
• 03 Желтоқсан, 2020

Паалийәтчанларға мукапатлар тапшурулди

Маңғистав вилайитидә 22 этномәдәнийәт бирләшмиси бар. Уларниң арисида җумһурийәтлик Уйғур этномәдәнийәт мәркизиниң Маңғистав вилайәтлик шөбиси тәвәдики әң паалийәтчан җәмийәтлик тәшкилатларниң бири болуп һесаплиниду.
Вилайәттики «әң яш» җәмийәтлик бирләшмә санилидиған Маңғистав вилайәтлик Уйғур этномәдәнийәт мәркизи тәвәдикила әмәс, җумһурийәт даирисидики муһим паалийәтләрдин чәттә қалмай, өзиниң бөләкчә активлиғини намайиш қилип кәлмәктә. Чоң сәнәләр билән мәйрәмләргә мунасивәтлик чарә-тәдбирләр, хәйрихаһлиқ ишлар шулар җүмлисидиндур. Буниңдин ташқири йәрлик аммивий әхбарат васитилири арқилиқ миллий урпи-адәт, әнъәнилиримизни өзгиләргә тонутушқиму һәрикәт қиливатиду. Мана шундақ нәмунилик ишларда мәркәзниң Румиләм Өмәрова, Қуяш вә Айтунәм Әсмәтовлар, Муратҗан Мәшүров, Наргизәм Мәшүрова, Рустәм Баратов, Гөзәл Азнибақиева, Руслан Назмәтов, Динмуһәмәт Турдахунов, Алик Молотов вә Турсун Әкбәрһаҗиев қатарлиқ жүригидә оти бар әзалириға алаһидә миннәтдарлиқ билдүрүшкә әрзийду.
Йеқинда Маңғистав вилайәтлик һакимийитидә Тунҗа Президент күнигә беғишланған тәнтәнилик жиғин өткүзүлүп, униңда вилайәт һакими Серикбай Трумов этномәдәнийәт бирләшмилириниң җанпидалиқ көрсәткән биртүркүм вәкиллиригә мукапатлар тапшурди. Шуларниң қатарида Маңғыстав вилайәтлик Уйғур этномәдәнийәт мәркизиниң рәиси Адилҗан Алимҗанов (сүрәттә оңда) «Қазақстан халқы Ассамблеясына — 25 жыл» тәвәллудлуқ медали билән тәғдирләнди. Биз уни ушбу хошаллиғи билән сәмимий тәбрикләп, кәлгүси паалийитигә утуқ тиләймиз.
Ясмина ТЕЛЬМАНОВА.
Маңғыстав вилайити.