• Җәмийәтлик тәшкилатларда
• 03 Желтоқсан, 2020

Жут анилириға һөрмәт көрситилди

Әмгәкчиқазақ наһийәси Рахат йезисиниң турғуни Қарихан Азнибақиеваниң җәмийәтлик ишларға арилишип, йезиниң ханим-қизлар кеңишини башқуруватқиниға бийил 15 жил болди.

Рашидәм РӘҺМАНОВА, 
«Уйғур авази»

Мошу жиллар мабайнида Қарихан һәдә вә униң орунбасарлири Перизәм Әйсарова, Зорәм Ибрагимова, Рабийәм Мусаева, Светлана Үмбәтова вә Зулфия Җәлилова пәқәт өз йезисида өткән ишларғила әмәс, бәлки наһийә, вилайәт, һәтта җумһурийәт даирисидә уюштурулуватқан чарә-тәдбирләргиму паал арилашти. Ундақ болғини, өз вақтида наһийәниң чоң жигитбеши хизмитини атқурған рахатлиқ Турсунмәһәмәт Абдусемәтов жутдашлирини өзи билән биллә елип жүрәтти. Рахат йеза округидики мәктәпләрдә уйғур синиплири болмисиму, ана тилимиздики мәтбуатимиз билән театримизниң тәрәққий етиши, мәдәнийитимизниң риваҗлиниши йолида һармай-талмай әмгәк қилди. Нәтиҗисидә рахатлиқ анилар кәң аммиға тонулди. Елбасы Н.Назарбаевниң вә ҚҖ Президенти Қасым-Жомарт Тоқаевниң дана сәяситини аһали арисида тәрғип қилишта, округ вә наһийәдә яшаватқан милләтләр арисидики разимәнликни техиму риваҗландурушта, бай урпи-адитимизни яшларға тонуштурушта вә башқиму җәмийәтлик ишларда ушбу аниларниң төһписи нурғун.
Йеқинда Қарихан ана вә кеңәш әзалири өз хизмитини йеза яшлириға тапшуруп бәрди. Атап кетиш керәкки, Рахат Ханим-қизлар кеңишиниң рәиси хизмитигә киришкән Зулфия Мәсимова вә униң орунбасарлири Реһимәм Һошурова, Хеличәм Ахмоллаева, Гүлзарәм Һакимахунова вә Зәйтүнәм Җаппарова жуқурида исимлири аталған анилардин үлгә елип, әл хизмитидә жүргән қизлардин екән. Шуңлашқиму улар жут вә милләт хизмитини шәхсий тирикчилигидин үстүн көрүп, барлиқ бош вақтини жут ишлириға беғишлиған аниларниң әмгигини орунлуқ баһалашни билди. Яшлар чоңларға һөрмәт көрситип, дәстихан яйди. Жут намидин соғилар тәғдим қилип, көңлини алди. Баш қошушқа Әмгәкчиқазақ наһийәлик Уйғур этномәдәнийәт мәркизи рәисиниң орунбасари, наһийәлик Ханим-қизлар кеңишиниң рәиси Нурбүви Насирова қатнишип, әл хизмитидә болған әзиз инсанларға мәркәз намидин миннәтдарлиқ билдүрүп, уларниң буниңдин кейинму яшларға йол-йоруқ көрситип турушини сориди, йезида анилар кеңишини қуруп, җәмийәтлик ишлардин қол үзмәслигини илтимас қилди.

Әмгәкчиқазақ наһийәси.