• Йеңилиқлар
• 03 Желтоқсан, 2020

Хәлиқара “дүгләк үстәл” өтти

«Рухани жаңғыру» Қазақстан җәмийәтлик тәрәққият институти «Қазақстан Җумһурийитиниң Тунҗа Президенти: бәрпакарлиқта вә изчил тәрәққиятта өткән 30 жил» мавзусида хәлиқара «дүгләк үстәл» уюштурди.
Тунҗа Президент күнигә беғишланған чарә-тәдбир даирисидә қазақстанлиқ вә хәлиқара экспертлар, җәмийәт әрбаплири, дипломатлар һәм алимлар Елбасыниң мустәқил Қазақстанни тәрәққий әткүзүштики ролини муһакимә қилди.
Әхбарат вә җәмийәтлик тәрәққият министри Аида Балаева өз сөзидә қазақстанлиқлар үчүн Тунҗа Президент күниниң пәқәт «календарьдики қизил күнла» әмәс екәнлигини тәкитлиди. Бу – мустәқиллик, күчлүк роһ, утуқ вә турақлиқ келәчәккә интилиш рәмзи болған пүтүнсүрүк дәвир. Бу – әҗдатларниң қедимий йеридә вә әнъәнилири асасида урушхумар әмәс, бәлки течлиқпәрвәр, вәйран қилғучи әмәс, бәлки бәрпакар милләтниң, өз утуқ-муваппәқийитини билимдә вә әмгәктә көрүватқан, һазирқи дунияда өзиниң мунасип орнини билидиған милләтниң сүпәт җәһәттин йеңи қияпити барлиққа кәлгән тарихий вақит.
– Мошу барлиқ қәдрийәтләр вә сүпәтләрниң Қазақстанниң Тунҗа Президенти – Елбасы Нурсултан Әбишоғли Назарбаевқа хас екәнлигини чүшиниш-биливелиш қийин әмәс. Бу пүтүнләй қанунлуқ, чүнки пәқәт ички дунияси шунчилик бай вә шунчилик тәбиий әвзәлликләргә егә адәмла өз хәлқи алдида шундақ тарихий җасарәткә қабилдур. Әнди мустәқилликниң өткән мурәккәп жиллирида җасарәт-қәһриманлиқлар аз болмиди, – деди Аида Балаева.
Министрниң тәкитлишичә, Шәмәй ядро полигонини йепиш вә Вәтән тенидики көпжиллиқ ярини сақайтиш. Дөләт мустәқиллигини елан қилиш вә өз хәлқиниң хошаллиқ-шатлиғини көрүш. Чегариларни бәкитиш вә барлиқ даваларни өз мәмликитиниң пайдисиға һәл қилиш. Хәлиқләрни бирләштүрүш вә һәрбир өйдә течлиқ орнитиш үчүн Қазақстан хәлқи Ассамблеясини башқуруш. Пайтәхтни бәрпа қилиш вә мәмликәтниң көпжиллиқ утуқ-муваппәқийитини тәминләш... Бу - Милләт Лидериниң бүгүнки бәхит-саадәткә болған йолидики пәқәт асасий ғалибийәтлири.
– Бүгүнки Қазақстан – пүткүл дуния етирап қилған дөләт. 2010-жилда Европидики Бехәтәрлик вә һәмкарлиқ тәшкилатиға рәислик қилиш, нәқ мошу йәрдә униң хуласә саммитиниң өтүши мәмликитимиз тарихида айрим сәһипә болуп һесаплиниду. Әнди 2017-жилда дуния бирләшмиси Қазақстанға БМТ Бехәтәрлик кеңишиниң турақлиқ әмәс әзаси болушқа ишәнчә билдүрди. Сөзсизки, мошу барлиқ утуқ-муваппәқийәтләр – Қазақстанниң Тунҗа Президентиниң бәрпакарлиқ, сәясий вә иҗтимаий йолиниң нәтиҗиси, – дәп әслитип өтти Аида Балаева.
«Дүгләк үстәл» мәҗлисидә шундақла дөләт әрбаби, Қазақстан Җумһурийитиниң биринчи ташқи ишлар министри Төлетай Сүлейменов, Россия дөләт гуманитарлиқ университетиниң президенти Ефим Пивоваров, «Рухани жаңғыру» Қазақстан җәмийәтлик тәрәққият институти» йепиқ акционерлиқ җәмийити башқармисиниң рәиси Данияр Есин, Парламент Мәҗлисиниң депутати Нурлан Әлимжанов, Европа һоқуқ вә инсан һоқуқи экспертлиқ институтиниң мудири Марат Башимов, Өзбәкстан Миллий университетиниң профессори Нигинахан Шермухамедова, Қазақстан Җумһурийитиниң Президенти йенидики Қазақстан стратегиялик тәтқиқатлар институти мудириниң орунбасари Санат Қушқумбаев, Л.Гумилев намидики Евразия Миллий университети ҚХА кафедрилири ассоциациялириниң рәиси Наталья Калашникова сөзгә чиқип, Елбасы сәясий һаятиниң айрим сәһипилири, униң дунияда течлиқ мунасивәтләрни орнитишқа, интеграция җәриянлириға вә Қазақстанниң ролини күчәйтишкә қошқан бебаһа һәссиси тоғрилиқ пикирлири билән ортақлашти.