• Йеңилиқлар
• 10 Желтоқсан, 2020

Лауреатлар ениқланди

Аммибаплиғи вә салаһийәтлиги үчүн тапшурулидиған «Халықтың сүйіктісі – Народный любимец года» мукапитиниң юбилейлиқ 10-мәвсүминиң лауреатлири мәлум болди. Аваз беришниң ахирқи басқучи мукапатниң рәсмий lubimec.kz. сайтида өтти.
Икки номинациядә – «Жил муәллими» вә «Блогосфера лидери» номинациялиридә лидерлар арисидики аваз бериш пәрқиниң аз болғанлиғи һесапқа елинип, уларниң һәрбиридә иккидин лауреат аталди.
«Жилниң әң яхши муәллими» номинациясидә Нур-Султан шәһири 17-мәктәп-гимназияниң география пәниниң муәллими Төлеген Абдраисов вә нәй синипи бойичә оқутқучи, Қазақ миллий сәнъәт институти пүвдәп вә уруп чалидиған саз әсваплири кафедрисиниң доценти Нина Григорьева ғалип аталди.
Қизилорда вилайәтлик инфекциялик ағриқханиси реанимация вә интенсивлиқ терапия бөлүминиң башлиғи Болат Асанбаев «Жилниң әң яхши врачи» аталди.
UFCтики қазақстанлиқ файтер Шафкат Рахмонов «Жилниң әң яхши спортчиси» болди.
«Ақ көңүллүкләр» клубиниң асасини салғучи Гүлмира Абдрашева «Жилниң әң яхши җәмийәт әрбаби» аталди.
«Хабар» телеканилиниң тележүргүзгүчиси Дмитрий Олейников «Жилниң әң яхши тележүргүзгүчиси» дәп етирап қилинди.
«Жилниң мәдәнийәт әрбаби» номинациясидә Қазақстан сәнъәт әрбаби, улуқ нахшичи, пүткүл дуния бойичә миллионлиған адәмниң мухлиси Димаш Қудайберген ғалип чиқти.
Қазақстан Җумһурийити Парламенти Мәҗлисиниң рәиси Нурлан Ниғматуллин «Жилниң әң яхши парламентарийи» аталди.
«Жилниң әң яхши публицисти» болуп журналист, публицист Михаил Козачков етирап қилинди.
«Жилниң блогосфера лидери» номинациясидә Насима Қорғанбекова билән Казбек Майгелдинов ғалип чиқти.
Azattyq Ryhy “Жилниң әң яхши әхбарат интернет-нәшри» аталди.
Униңдин ташқири медицина хадимлири билән пидаийларниң таҗсиман вирус пандемияси вақтида чоң роль ойниғанлиғи һесапқа елинип, мукапатни уюштурғучилар вә жюри саламәтликни сақлаш системисиниң вәкиллири билән келишкән һалда бирқатар пәхрий номинацияләр бойичә мукапат тапшуруш қарар қилинди. 
Шундақ қилип, «Жилниң әң яхши һәмшириси» номинациясидә Маңғыстав вилайәтлик ағриқханисиниң чоң һәмшириси Айнур Батырбекова лауреат аталди.
«Санитарлиқ-эпидемиологиялик хизмәтниң әң яхши хадими» номинациясидә Ақмола вилайити Бурабай наһийәлик башқармисиниң департамент башлиғи Сералы Жолдасбаев ғалип чиқти.
Қариғанда вилайити профессор Х.Мақажанов намидики көпсаһалиқ ағриқхана «Әң яхши медицина стационари» дәп етирап қилинди.
Пидаий, «Җәмийәтлик назарәт» лайиһисиниң уйғунлаштурғучиси Саида Тәуекелова «Әң яхши пидаий» номинациясидә ғалип чиқти.
Шундақла әнъәнивий пәхрий номинацияләр бойичиму мукапатлар тапшурулди.
Мәсилән, «Жил бизнеси» – Нур-Султан шәһири «ORKIN» ҖЧЙниң мудири Талғат Дүйсековқа, «Жил меценати» – тиҗарәтчи, Қизилорда вилайити «Жан-Арай» ҖЧЙниң мудири Бағдаулет Махашовқа тапшурулди.