• Сәнъәт
• 24 Желтоқсан, 2020

Жуқури пәллиләрдин көрүнүшини халаймиз

Алмута шәһиридики П.Чайковский намидики музыка колледжи – елимизниң билим бериш саһасидики дәсләпки кәспий билим дәргаһи.
Мәзкүр билим дәргаһида Евгений Брусиловский билән Латиф Хамиди дәрис бәргән болса, Шабал Бейсекова, Ермек Серкебаев, Сыдық Мухаметжанов, Бақытжан Байқадамов, Әлибек Динишев, Ғазиза Жубанова, Қуддус Ғоҗамияров, Еркеғали Рахмадиев, Нурғиса Тилендиев, Кеңес Дүйсекеев, Арыстанбек Мухамедиулы кәби исим-нәсиби дунияға тонулған мәшһур сәнъәткарлар билим алған. Уларниң исим-шәрипини һәрбир шагирт пәхирлиниш илкидә тилға алиду.
1982-жили бүйүк композитор Қуддус Ғоҗамияровниң тәшәббуси билән колледжда уйғур бөлүми ечилиду. Мана шуниңдин кейин Азитим Бурһанов, Абләһәт Исламов, Нуралим Варисов, Марат Норузов, Дилмурат Баһаров кәби истедатлиқ сәнъәткарлиримиз билән бүгүнки күндә өзлириниң йеқимлиқ саз-нәғмилири арқилиқ тамашибин көңлидин мунасип орун егилигән «Дияр», «Нур», «Тумар» топлириниң әзалири ушбу колледжда тәһсил көрди. Мана мошундақ көрнәклик зиялилар учум болған мәзкүр билим дәргаһида һазир миллитимиз вәкили, талантлиқ сәнъәткар Сабирҗан Манашов оқутқучилиқ қиливатиду.
Сабирҗан 2010-жили мәзкүр билим дәргаһида «Бас равап» бөлүмини ечип, бүгүнки күнгә қәдәр музыкиға иштияқ бағлиған көплигән яш талантларни тәрбийиләшкә күч-ғәйритини сәрип қиливатиду. Шахмурат Баһамов, Сейитҗан Зайитов, Михрат Рәхмәтҗан, Расул Мәрүпов вә «Дилдар», «Достлуқ» топиниң әзалири тоғрилиқ әйнә шундақ дейишкә болиду. 2013-жили Сабирҗанниң «Равап үгиниш мәктиви» намлиқ китави йоруқ көрди. Һазир у «Достлуқ» топиниң бәдиий рәһбири сүпитидә җай-җайларда уюштурулуп келиватқан мәдәний чарә-тәдбирләргә паал қатнишип келиватиду.
«Достлуқ» топи 2010-жили Алмутида уюштурулған «12 муқам дурданиси» намлиқ хәлиқара конкурсида лауреат аталди. Бийил җәнубий пайтәхттә болуп өткән «Дутар садаси» хәлиқара конкурсида Сабирҗан Манашовниң шагирти, колледжниң 3-курс студенти Исрайил Зулқайнар баш мукапат — Гран-Прини елишқа муйәссәр болса, йәнә бир шагирти, 1-курс студенти Сәйдуллам Зунунов 1-орунни егилиди. Ойлаймизки, бу яшлар һәммимизниң үмүтини ақлап, миллий сәнъитимизни дунияға тонутиду.
Тәкитләш лазимки, П.Чайковский намидики музыка колледжиниң йенидики уйғур бөлүмигә сахавәтлик меценант, миллий мәдәнийитимиз билән маарипимизниң һәқиқий җанкөйәри Дилмурат Пирмуһәммәт һаҗим оғли Кузиев миллий кийимләр билән миллий чалғу әсваплирини соға қилип, у йәрдә тәһсил көрүватқан сәнъәтсөйәр яшлиримизниң бешини көккә көтәрди. Җәмләп ейтқанда, Сабирҗан Манашов рәһбәрлик қилип келиватқан «Достлуқ» топиниң миллий сәнъитимизни риваҗландурушқа қошуп келиватқан һәссиси бебаһа. Топ әзалири устазлириниң бәргән билимини әмәлиятта көрситәлиди. Сабирҗанму шагиртлириниң келәчәктә техиму жуқури пәллиләрдин көрүнүшини халайду. Бизниңму тилигимиз шу! Мошундақ көпчиликкә роһий озуқ беғишлап, дилларни тәвритип жүргән сәнъәтсөйәр яшлиримизниң сепи улғийип, тәлийи оңдин кәлгәй, илаһим!

Адилҗан МӘСИМОВ,
Әмгәкчиқазақ наһийәлик Уйғур этномәдәнийәт мәркизиниң Қорам йезисидики шөбисиниң рәиси.

СҮРӘТТӘ: «Достлуқ» топиниң әзалири (оттурида топниң бәдиий рәһбири Сабирҗан Манашов).