• Әхбаратлар еқими
• 07 Қаңтар, 2021

Ана бәхти

Бүгүн мән биз бала чағлиримизда бова-момилиримизға хошна олтарған Турсунай һаҗим һәққидә мақалә йезип, уни гезит оқурмәнлиригә тонуштурмақчимән. Турсунай – Барат қазиниң оттуранчи оғли Мирғияс һаҗимниң рәпиқиси.
Бизниң аилә 1970-жили Маливайға көчүп кәлди. Мирғияс вә Турсунай Баратовларниң қизи Саламәт мениң синипимда оқуйдиған. Бәзидә муәллимгә бәлгүлүк сәвәпләр билән оқуғучиларниң өйлиригә беришқа тоғра келидиғу. Мабада, Турсунай һаҗимларниң өйигә берип қалғидәк болсам, у мени хушчирай қарши елип, унумиғинимға қоймай, дәрру чай қоятти. Қанчә алдирисамму, қоюп бәрмәй, җоза раслатти. Иккимиз узақ олтирип, параңлишаттуқ. Бу вақитларда улар Ғулҗидин йеңи чиқип, Маливайға орунлашқан еди. Анисидин кичик айрилип, житим қапту. Турсунайни һәдиси Тохтихан ана чоң қилип қатарға қошупту. Қазақстанға кәлгәндин кейинму икки қериндаш бир йезида, һәтта бир кочида яшиди.
Тохтихан ана һәққидә икки еғиз сөз қилсам, у аял 92 йешида бу дуниядин өтти. Әҗайип дилкәш, меһриван аял еди. Шундақ анилар аримизда көпирәк болса, наһайити яхши болатти. Амма, миң әпсус... Тохтихандәк ана тәрбийилигән Турсунайму бәхитлик һаят кәчүрди. Йезимизға кәлгән заманла совхозниң Иврайим Һаширов башқурған 5-бригадисиға ишқа кирди. Тиришчанлиғи түпәйли тамака пәрвиш қилишниң қир-сирини үгинивалди. «Кейин чиқти, лекин қийин чиқти» дегинидәк, бар вуҗуди билән әмгәк қилди. Яхши ишлигәчкә, совхоз уларға йеник автомашина соға қилди. Үлгилик әмгәк қилғанлиғи үчүн Турсунай талай қетим йолланмилар билән тәғдирлинип, Москва, Ленинград, Ташкәнт қатарлиқ чоң-чоң шәһәрләрни арилап, зиярәт қилип кәлди.
Мирғияс билән Турсунай һаҗимлар Турғанҗан исимлиқ оғул, Адаләт, Саламәт, Гүлназ, Гүлҗәһрәм, Айгүл вә Реһимбүви исимлиқ қизларни тәрбийиләп, қатарға қошти. Әр-аял иккиси пәрзәнтлириниң оқушиға көп көңүл бөлди.
Жиллар өтүп, Мирғияс вә Турсунай йезимизниң абройлуқ мөтивәрлиригә айланди. Улар кәлмәй, жут дәстихиниму селинмайдиған. Иккиси Мәккә-Мәдинигә сәпәр қилип, һаҗим болуп кәлди. Зәм-зәм сулиридин елип келип, жутдашлириға еғиз тәккүзди. Конилар ейтқандәк, һаятта қайғу вә хошаллиқ қатар жүриду. Дәл шундақ болди. Раса һалавәт көридиған мәзгилдә Мирғияс һаҗим дуниядин өтти. Мән бу вақитларда уларниң Гүлҗәһрәм исимлиқ қизини келин қилип үлгәргән едим.
Йеқинда Турсунай һаҗимниң 85 яшлиқ мәрикиси болди. Қуда ретидә тәбрикләп берип, униң һәқиқий мәнасида бәхитлик ана екәнлигигә көз йәткүздүм. Пәрзәнтлири, нәврә-чәврилири, уруқ-туққан вә жутдашлириниң жуқури һөрмәт-еһтирамиға бөләнгән ана, әлвәттә, бәхитлик! Илаһим, жутлиримизда шундақ анилар көп болғай!

Ризвангүл ҒЕНИЯРОВА,
пешқәдәм устаз.

Әмгәкчиқазақ наһийәси.