• Әхбаратлар еқими
• 07 Қаңтар, 2021

Пәнҗимдә йеңи амбулатория ечилди

Йеқинда Пәнҗим йезисиниң турғунлири чоң хошаллиқниң гувачиси болди. Йезида 50 орунлуқ йеңи давалаш амбулаторияси селинип, пайдилинишқа берилди. Карантин чарилиригә әмәл қилған һалда наһийә рәһбәрлири пәнҗимликләрни бу хошаллиғи билән тәбриклиди.

Гөһәрбүви ИСМАЙИЛҖАНОВА,
«Уйғур авази»

Амбулаторияниң ечилиш тәнтәнисидә дәсләп сөз алған Панфилов наһийәсиниң һакими Талғат Өмирәлиев мундақ деди:
— Пәнҗим — Улуқ Ипәк йоли бойиға җайлашқан тәвәдики әң қедимий, һәм әң чоң йезиларниң бири. Аһалисиниң сани жилдин-жилға өсүп, күндин-күнгә тәрәққий етиватиду. Йеза турғунлириниң асасини уйғурлар билән қазақлар тәшкил қилиду. Әзәлдин достлуғи ярашқан бу жутниң адәмлири – дехан билән чопанниң нәсли. Улар деханчилиқ билән чарвичилиқта өзлирини синап, ата кәспигә садақәтлиги түпәйли, йеза егилиги саһасини тәрәққий әттүрүватқанлиғи һәммигә мәлум. Кейинки бәш-он жилда Пәнҗим тониғусиз өзгәрди. Округ тәркивидики Ават, Төвәнки Пәнҗим йезилирида селинған йеңи заманивий мәктәпләр билән фельдшерлиқ амбулаториялик пунктлар дөләт программилири асасида қәд көтәрди. Әнди йезилардики мәрт-мәрданә хәйри-еһсанлиқ жутдашлар тәрипидинму мечитлар селинип, диний етиқатимизға мүмкинчиликләр яритиливатиду. Тиҗарәтчи жигит-қизлар кафе, ашхана, дукан, дориханиларни селип, йеза тәрәққиятиға тегишлик һәссисини қошуватқанлиғи һәркимни хошал қилиду.
Әнди мана бүгүн болса, биз елимиз Президенти Қасым-Жомарт Тоқаевниң Мәктүбидики көрсәтмә, вәзипиләрниң жутумизда әмәлгә ешиватқанлиғиниң гувачиси болуватимиз. Бу һәқтә йеза турғунлири һәрхил баш қошушларда наһийә рәһбәрлиригә бир әмәс, бирнәччә қетим мураҗиәт қилған еди. Чүнки өз дәвридә, йәни Кеңәш Иттипақи дәвридә селинған дохтурханиларниң конирап, заманивий әсвап-үскиниләрниң йетишмәслиги, йәни хәлиққә бүгүнки күн тәләплиригә лайиқ хизмәт көрситишкә мувапиқ әмәслиги һәққидә жут турғунлири тәрипидин ейтилип, илтимас қилинған еди. Һәқиқәтәнму тәркивигә Пәнҗим, Қорғас, Төвәнки Пәнҗим вә Ават йезилири киридиған округ турғунлириниң сани он икки миңдин ешип, уларниң мундақ давалаш амбулаториясигә муһтаҗ болуватқанлиғи ениқ.
— Бу хошаллиққа биз Йеңи жил һарписида йәттуқ. Жутдашлар намидин вилайәт вә наһийә рәһбәрлиригә миннәтдарлиғим чәксиз. Адәм саламәтлиги һәммидин қиммәт. Мана мошундақ қийин-қистақ заманда Гиппократ қәсәмядиға садақити билән хәлиқ саламәтлигини күзитиватқан ақ халатлиқ шипакарларға чидам, ғәйрәт, аманчилиқ тиләймән, — деди сөз новитини алған пешқәдәм устаз, жут мөтивәри Әхмәтҗан Надиров.
Пәнҗим йезиси давалаш амбулаториясиниң баш дохтури Имәрҗан Абдурусулоғлиниң ейтишичә, 50 орунлуқ давалаш амбулаториясидә 30 кабинет бар. Медицинилиқ кабинетлар заманивий әсвап-үскиниләр билән тәминләнгән. Жутдашлар саламәтлиги күзитидә 47 саламәтлик сақчиси хизмәт қиливатиду. Уларниң төрти алий билимлик, алий дәриҗилик дохтурлар. Ейтайлуқ, Пәнҗим йезиси үчүн Реһангүл Абдулакимова, Төвәнки Пәнҗим билән Қорғас йезилириға Мәйнүрәм Җәлилова, Ават йезисиға Манат Өсербаева қатарлиқ алий билимлик, алий дәриҗилик, тәҗрибилик дохтурлиримиз билән һәмширилиримиз хәлиқ саламәтлиги үчүн кечә-күндүз хизмәт қиливатиду.
Һәқиқәтәнму бу күни Пәнҗим йеза округиниң турғунлири хошаллиқниң шаһиди болди. Чүнки улар әнди давалиниш үчүн шәһәр мәркизидики дохтурханиларға әмәс, өз йезисидики заманивий давалаш амбулаториясигә баридиған болиду.

Панфилов наһийәси.