• Йеңилиқлар
  • 07 Қаңтар, 2021

«Мәслиһәтлишип пичилгән чапан калтә болмас»

«Көпмилләтлик болуш — бизниң бәхтимиз» дәп Елбасы — Тунҗа Президент Нурсултан Әбишоғли Назарбаев ейтқандәк, оттуз жиллиқ тарихқа егә Қазақ елиниң бүгүнки тәрәққияти – йүз оттуздин ошуқ милләтниң бирлигидин томур тартқан. Шуни мәғрурлиниш билән тилға алалаймизки, елимиздә өзгә этнос вәкиллири үчүн яритилған имканийәтләрниң арқисида җумһурийитимиздики һәрхил милләт вәкиллириниң мәдәнийити жилдин-жилға риваҗлинип, әҗдаттин- әвлатқа йетип, дөләтниң алаһидә ғәмхорлуғида алтун үзүктики яқут көздәк сақланмақта.
Шу җүмлидин көпмилләтлик әлдә бәхтияр һаят кәчүрүп келиватқан бәхитлик хәлиқләрниң бири – уйғурлар. Қазақстандики уйғурлар хәлиқ сани бойичә қазақ, рус, өзбәк, украинлардин кейинки бәшинчи орунда туриду. Алмута шәһири вә Алмута вилайити уйғурлар әң көп олтирақлашқан зимин һесаплиниду. Һә, Алмута вилайитиниң тәркивидики Уйғур наһийәсиниң орни бөләк.
Дәрвәқә, буниңдин бираз вақит илгири җумһурийәтлик Уйғур этномәдәнийәт мәркизиниң Уйғур наһийәлик шөбисигә йеңи рәис сайланғанлиғи һәққидә хәвәрлигән едуқ. Җавапкәрлиги зор хизмәтниң жүки узун жиллардин буян Чонҗа политехникилиқ колледжиниң мудири хизмитини атқуруп келиватқан Рәхмәтҗан Суджәковқа жүкләнгән еди. Йеңи рәисниң иш башлиғиниға анчә көп вақит болмисиму, ушбу қисқа вақит ичидә еғизға толтуруп ейтқидәк ишларни әмәлгә ашуруп үлгәрди. Рәхмәтҗан Савутоғлиниң икки-үч айлиқ паалийитидин хуласә чиқирип, йеңи жиллиқ иш-плани билән тонушуш мәхситидә мәркәз рәисини сөһбәткә җәлип қилған едуқ. Төвәндә диққитиңларға шу сөһбитимизни һавалә қиливатимиз.

Сабирәм ӘНВӘРОВА,

«Уйғур авази»

– Рәхмәтҗан Савутоғли, авал сизни вә сиз башқуруп келиватқан этномәдәнийәт мәркизиниң барчә вәкиллирини «Уйғур авази» гезитиниң тәһрирати намидин Йеңи жил мәйрими билән тәбрикләймиз! Йеңи жил йеңи утуқларни елип кәлгәй!– Рәхмәт!..– Йеңи җәмийәтлик вәзипигә сайланғиниңизға бираз вақит болди, тәсиратиңиз қандақ?– Ейтқиниңиздәк, бу паалийәткә киришкинимгә техи бирқанчә ай болди. Лекин мошу қисқа вақитниң өзидә мән зиммәмгә жүкләнгән мәсъулийәтниң нәқәдәр еғирлиғини һис қилип үлгәрдим десәмму болиду. Көпжиллиқ иш-тәҗрибәмдә башчилиқ хизмәтниң қир-сиридин хәвәрдар болсамму, этномәдәнийәт мәркизини башқуруш, мән ойлиғандәк, оңай болмиди. Бу тамамән башқа саһа екән. Колледжда арзу-арманлирини рояпқа чиқириш үчүн кәлгән студентларға вә уларни чоң һаятқа учум қилидиған устазларға йол башлайдиған болсам, бу йәрдә миллитимизниң тәғдири үчүн тәр төкүшүмгә тоғра келиду. Этномәдәнийәт мәркизиниң рәиси сүпитидә йеңи бир даванға қәдәм басқанлиғимни чүшәндим. Қисқиси, өткән вақит арилиғида йеңи хизмитимниң мусъулийити еғир, җавапкәрлиги зор екәнлигини чоңқур һис қилдим һәм мошундақ улуқ вәзипини хәлқимниң маңа ишинип тапшурғанлиғидин толиму мәғрурландим. Әлвәттә, алдики вақитта әл үмүтини ақлашқа тиришимән.– «Һәр ишниң башлиниши қийин» дәйду, Уйғур наһийәлик Уйғур этномәдәнийәт мәркизиниң рәиси сүпитидә дәсләпки иш-паалийитиңизни немидин башлидиңиз? – «Немә қилишим керәк? Ишни немидин башлисам бола?» дегән соалларға җавап издәп, мәдәнийәт мәркизиниң рәисигә жүкләнгән вәзипиләр билән тонуштум. Бу йеқидин маңа наһийәлик Уйғур этномәдәнийәт мәркизиниң вәкиллири билән жигитбашлириниң ярдими тәгди. Көпчиликниң пикрини билип, мәдәнийәт мәркизидики мәсилиләрни етиварға алғандин кейин, әң биринчи, йеңи идарә мәсилисини һәл қилишқа бәл бағлидим. ҖУЭМниң наһийәлик шөбисигә рәис болуп тайинланғанлиғимдин хәвәрдар болған тиҗарәтчи достум Максим Кардалиев йеңи хизмитимгә йеңи ишхана издәштүрүватқанлиғимни аңлап, Чонҗиниң мәркизий кочилириниң бири һесаплинидиған Һашим Арзиев кочисиниң бойидики бош турған бенасини бемалал пайдилинип турушумни ейтти. Ағинәмниң ушбу сөзидин кейин қазақ хәлқиниң кәңлигидин йәнә бир мәртә хурсән болдум. Хошаллиқтин бешим көккә йәткәндәк болуп, дәрру йеңи ишханиға көчүш ишлирини башлавәттим. Шундақ қилип, бурунқи «Атамекен» тиҗарәтчиләр палатиси наһийәлик шөбисиниң мәһкимиси болған имарәткә «ҖУЭМниң Уйғур наһийәлик шөбиси» дегән тахтайчини илип, «бисмилла» дәп босуғисидин атлидуқ. Рәтлинип, көчивалғандин кейин қәғәз-һөҗҗәт ишлирини сәрәмҗанлаштуруп, йеңи иш орнимизға телефон орнитип, Интернет қошқуздум. – Йеңи ишханидин башқа йәнә қандақ йеңилиқлириңиз бар?– Орунбасарлирим Ульян Қурбанниязов вә Арлен Османов билән бирликтә мәлиләрни арилидуқ. Карантинға бағлиқ, чоң жиғинларни уюштуруш мүмкин болмиди. Бирақ һәр жутниң активистлири билән баш қошуп, жигитбашлири вә ханим-қизлар кеңәшлириниң рәислири билән мәслиһәтләштуқ. Он төрт йезилиқ округтики иш сәпиримиздин кейинки жиғинларни онлайн түрдә өткүзүп турдуқ. Хәйрихаһлиқ акциялиригә паал ат селишип, наһийәдики җәмийәтлик ишларниң бешида болдуқ. Мәйрәмдин-мәйрәмгә улишип, икки-үч ай көзни ечип-жумғичә өтүп кәткини раст. Пандемияни демигәндә, жил ахириға планланған ишларниң барлиғи ойдикидәк әмәлгә ашти. Мисалға кәлтүрсәк, мәйрәм һарписида мәдәнийәт мәркизи тәрипидин наһийәдики тәминати начар көпбалилиқ аилиләрниң балилири билән имканийити чәкләнгән гөдәкләргә йеңи жиллиқ соға тапшурдуқ. Җәми икки йүз әлликтин ошуқ балиға соға әвәттуқ. – Ишниң башлиниши яман әмәстәк, әнди келәчәккә, йәни 2021-жилға планлириңиз қандақ?– План демәкчи, мәдәнийәт мәркизиниң бир түркүм вәкиллириниң бешини қошуп, жиллиқ план түзүшни ойлаштуруватимиз. Худа халиса, «Ұрпақ парызы» җәмийәтлик бирләшмиси билән бирликтә Абай Қунанбаевниң 175 жиллиғиға даир өткүзидиған чарә-тәдбиримизниң сценарийи тәйяр. Буниңдин бөләк, вәзийәт турақланса, әтиязға қарита Мәшүр Җәлиловниң 90 жиллиғини наһийәдә дағдуғилиқ атап өтүшни планлаватимиз. Ханим-қизлар кеңиши йеңи ишханиниң бир бөлмисини уйғурчә безәп, ихчам мирасгаһ қилип ясимақчи. Мәдәнийәт мәркизи йенидики “Яшлар клубиниң” ишини җанландурушни ойлаштуруватимән. Чүнки биздә чарә-тәдбирләрниң толиси чоңлар билән өтиду. Яшлар билән атқурулуватқан ишлар йоқниң орнида. Мошу бошлуқниң орнини толтуруп, келәчәктә яшлар тәрбийисигә көңүл бөлүп, уларни билимгә, спортқа, сәнъәткә җәлип қилиш ишлирини қолға алсам дәймән.– Ахирқи соал, кона жил қандақ утуқлар билән йәкүнләнди? – Жил ахирида наһийәлик Уйғур этномәдәнийәт мәркизиниң бир түркүм вәкиллириниң әмгиги мунасип баһалинип, ҖУЭМ тәрипидин медаль һәм пәхрий ярлиқлар билән тәғдирләнгән еди. Бу бизниң ортақ утуғимиз дәп билимән. Атап ейтқанда, җәмийәтлик ишларниң бешида жүргән Зилавдун Бавдинов, Гүлминәм Тохтаева, Абдуманап Аблизов җумһурийәтлик Уйғур этномәдәнийәт мәркизиниң «Сахавәт» медалиға сазавәр болса, Зәйнидин Шәмиев, Турғанҗан Имиров, Нурмәһәмәт Арипов, Хәринсахан Иминова, Халима Майлыбаева, Алимҗан Һашимов, Әзиз Палтахунов, Адилҗан Һаширов, Зарина Сайдамова, Ясмина Рамилева ҖУЭМ рәисиниң тәшәккүрнамиси билән мукапатланди. Пурсәттин пайдилинип, мошу йәрдә таҗсиман вирус күчкә киргән пәйттә ниқап тикип таратқан 15 яшлиқ ғунчимиз Ясмина Рамилеваға алаһидә миннәтдарлиғимни билдүргүм келиду. Мошу хилдики утуқларға пәқәт бирлигимиз арқилиқ йәттуқ. Йәнә бир атап кетидиған нәрсә, «Мәслиһәтлишип пичилгән чапан калтә болмас» демәкчи, наһийә рәһбәрлиги һәм наһийәлик Ички сәясәт бөлүми билән зич бағлиништа паалийәт елип бериватимиз. – Сөһбитиңизгә рәхмәт.  Кәлгүси ишлириңизға муваппәқийәтләр тиләймиз. 

 

 

 

740 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы