• Асасий мақалилар
• 14 Қаңтар, 2021

Ассамблеядин тоққуз депутат сайланди

Дүшәнбә күни Қазақстан хәлқи Ассамблеяси тәвсийә қилған Қазақстан Җумһурийити Парламенти Мәҗлисиниң депутатлирини сайлаш бойичә Қазақстан хәлқи Ассамблеясиниң ХХVIII сессияси өтти.

Дөләт рәһбири Қасым-Жомарт Тоқаев Қазақстан хәлқи Ассамблеяси ХХVIII сессиясигә қатнишип, ҚХАдин сайлинидиған депутатларни яқлап аваз бәрди.
Шундақла Тунҗа Президент – Елбасы Нурсултан Назарбаев аваз бериш рәсмийитигә қатнашти. Шуниңдин кейин Елбасы Ассамблеяниң әһмийити тоғрилиқ тәпсилий тохталди. Тунҗа Президент умумхәлиқ сайлими өткүзүлүп, бирпүтүн хәлиқ сүпитидә дөләтниң келәчиги үчүн аваз бәргәнлигини қәйт қилди.
– Бу алдимиздики бәшжиллиқ программимизни бәлгүлигән сайлам болди. Сайламда Nur Otan партияси чоң утуққа йетип, хәлиқниң ишәнчисигә еришти. Шуңлашқа алдимизда кәңдаирилик ишлар туриду. Бүгүн Конституциямиз бойичә Қазақстан хәлқи Ассамблеясидин сайлинидиған 9 намзатни яқлап аваз бәрдуқ. Ассамблеямиз 25 жилдин бери елимиздики этнослар билән динларни бир-биригә йеқинлаштуруп, толерентлиққа тәрбийиләйдиған, бирликни тәшвиқат қилидиған, елимизни алға башлайдиған әҗайип органға айлиниватиду, – деди Елбасы.

Тунҗа Президент Нурсултан Назарбаев башқа дөләтләр Қазақстан тәҗрибисини үгиниватқанлиғини тәкитләп өтти. Шуңлашқа Ассамблеядин сайланған депутатлар әл бирлигини сақлап, қазақ хәлқиниң әтрапиға барлиқ милләтләрни бирләштүрүшкә зор үлүш қошиду.
Униңдин ташқири Сенат рәиси Мәулен Әшимбаев, Мәҗлис рәиси Нурлан Ниғматуллин, Һөкүмәт рәһбири Асқар Мамин, Премьер-министрниң орунбасари Ералы Тоғжанов, шундақла дөләтлик мәһкимиләр рәһбәрлири аваз бәрди.
ҚХА ХХVIII сессиясиниң ечилиш мәрасимида ҚХА Рәисиниң орынбасари — Кативат рәһбири Жансейит Түймебаев сөзгә чиқип, жиғинниң әһмийитигә тохталди.

– Һәммимизгә мәлумки, 2007-жили конституциялик ислаһат нәтиҗисидә қобул қилинған Конституциягә Қазақстан хәлқи Ассамблеясидин Парламент Мәҗлисигә 9 депутат сайлаш һоқуқи берилгән өзгиришләр вә қошумчилар киргүзүлгән. Бу қәдәм бизниң җәмийәтниң бирлигини күчәйтишкә, милләтләрниң мәнпийәтлирини билдүрүшкә, уларниң елимизниң иҗтимаий-сәясий һаятиға қатнишишини йүксәлдүрүшкә қаритилған. Бу Бирләшкән Милләтләр Тәшкилатиниң, Европидики бехәтәрлик вә һәмкарлиқ тәшкилатиниң вә башқиму хәлиқара пактлар, конвенцияләр даирисидә Қазақстанниң инсан қәдрийәтлири, гражданлиқ вә сәясий һоқуқ бойичә хәлиқара мәҗбурийәтлирини орунлаш җәрияниға кириду, – деди ҚХА Рәисиниң орунбасари.
Жансейит Түймебаевниң тәкитлишичә, Ассамблеяниң 9 депутати Қазақстанниң барлиқ этнослириниң, пүткүл хәлиқниң мәнпийәтлирини изһар қилиду. ҚХАниң депутатлиқ топи хәлиқниң иттипақи вә бирлигини күчәйтиш мәсилилири бойичә партияләрара һәмкарлиқниң парламентлиқ механизми ролини атқуриду. «Сайлам тоғрилиқ» Конституциялик қанунға мувапиқ, Ассамблея сайлайдиған Парламент Мәҗлисиниң депутатлиғиға намзатлар Ассамблея Кеңишиниң мәҗлисидә тәвсийә қилинди.
Униң ейтишичә, Ассамблея Кеңиши намзатлар тизимини тәйярлаш пәйтидә бирқатар муһим әһвалларға диққәт бөлди. Депутатлиқ корпусниң аһаңдашлиғи, регионларни тәминләш, гендерлиқ тәңпуңлуқниң тәминлиниши, яшларни җәлип қилиш, этник топларни диққәт нәзәридә тутуш, депутатлиқ корпуста икки муддәттин артуқ сайланмаслиққа әһмийәт берилди. Кеңәштә Парламент Мәҗлисигә депутатлиққа Ассамблеядин намзатлар тәвсийә қилиш тоғрилиқ қарари қобул қилинип, улар сайлам бюллетиниға киргүзүлди.
Қазақстан хәлқи Ассамблеяси тәвсийә қилған Парламент Мәҗлиси депутатлиғиға намзатларни сайлаш аяқлашқандин кейин Нур-Султан шәһәрлик сайлам комиссияси аваз бериш йәкүнлирини елан қилди.
Аваз беришкә қатнашқан ҚХА әзалириниң умумий сани – 351 адәм. Мәҗлис депутатлиғиға намзатлардин Сауытбек Абдрахманов — 298, Аветик Амирханян – 270, Илияс Буларов —274, Наталья Дементьева – 292, Юрий Ли — 282, Вакиль Набиев — 285, Шамиль Осин – 271, Владимир Тохтасунов — 277, Абилфас Хамедов 290 авазға егә болди.

Владимир Һемитахуноғли
ТОХТАСУНОВ

1953-жили 7-ноябрьда Алмута вилайити Уйғур наһийәсиниң Кәтмән йезисида туғулди. 1975-жили В.Ленин намидики Қазақ политехника институтини тамамлап, “Иссиқлиқ-газ билән тәминләш вә шамаллитиш” мутәхәссислиги бойичә инженер-қурулушчи квалификациясини егиләп чиқти.

Әмгәк паалийитини 1975-жили Алмута шәһәрлик исситиш тармақлири карханисида башлап, 1987-жилниң октябрь ейиғичә мәзкүр карханида һәрхил лавазимлиқ хизмәтләрни атқурди. Андин Алмута вилайәтлик “Облтеплокоммунэнерго” бирләшмисиниң баш инженери, Қазақстан Компартияси Алмута шәһәрлик комитети Қурулуш вә шәһәр егилиги бөлүминиң инструктори, “Алматыоблтеплокоммунэнерго” бирләшмисиниң баш мудири болуп ишлиди. 1999-жилниң март ейидин тартип 2007-жилниң май ейиғичә Алмута вилайити Уйғур наһийәсиниң һакими лавазимини егилиди.
2007 – 2009-жиллири “Алматыоблтеплокоммунэнерго” акционерлиқ җәмийитиниң президенти болди. 2009-жилдин тартип “ЖетысуОблгаз” ҖЧЙниң баш мудири.
“Құрмет” ордени, “Қазақстан мустәқиллигиниң 10 жиллиғи” вә “Тиң йәрләрниң өзләштүрүлгәнлигигә 50 жил” медальлири билән мукапатланған.