• "30 Тәуелсіздік жылдары"
  • 17 Ақпан, 2021

Пидаий болуш — жүрәкниң әмри

Уйғур наһийәсидики әң паалийәтчан яшлиримизниң бири – Сумбат Туғлуқова. У өзиниң тиришчанлиғи, әмгәксөйгүчлүги билән көзгә чүшүп, җәмийәтлик ишларниң алдида жүриду. Сумбат Маратқизи иштин бош вақтида пидаийлиқ билән шуғуллиниду. Қисқиси, бүгүнки күндә яш әвлатқа тәлим-тәрбийә бериш йолида хизмәт қиливатқан яш муәллимни қайси қиридин елип язсақму, ейтаримиз аз әмәс. Шундақла у Мустәқилликниң тәңтуши.

Сабирәм ӘНВӘРОВА, 
 «Уйғур авази»

Сумбат Маратқизи 1991-жили Уйғур наһийәсиниң Чонҗа йезисида дунияға кәлди. Дадиси – уйғур, аниси – қазақ. Кичигидин қош хәлиқниң тилини вә мәдәнийитини тәң үгинип өскән қиз 2009-жили Шуңқар оттура мәктивини тамамлап, Қазақ дөләт қизлар педагогикилиқ университетиниң филология факультетиға оқушқа чүшиду. 2013-жили бу алий билим дәргаһини әла баһалар билән түгитип, дәсләпки иш-паалийитини Ардолата оттура мәктивидә қазақ тили вә әдәбияти пәнлириниң муәллим болуп ишләштин башлайду. 
Арида икки жил өткәндин кейин Nur Otan партияси Уйғур наһийәлик шөбисигә эксперт мутәхәссис болуп ишқа қобул қилиниду. Қабилийәтлик һәм ишбиләрмән мутәхәссис наһийә даирисидики җәмийәтлик ишларниң барлиғиға дегидәк паал арилишип, партияниң үлгилик әзаси сүпитидә тонулиду. 2019 — 2020-жиллири Nur Otan партияси сәясий менеджмент мәктивиниң сертификатиға сазавәр болиду. Бир сөз билән ейтқанда, Nur Otan партияси Уйғур наһийәлик шөбисидә ишлигән бәш жил мабайнида өзиниң лидерлиқ қабилийәткә егә яшларниң бири екәнлигини дәлиллигән Сумбат 2020-жилниң 1-сентябридин башлап қайтидин устазлиқ паалийитини давамлаштуриду. Йәни, Чонҗа йезисидики 1-рус оттура мәктивигә муәллим болуп ишқа орунлишип, бүгүнки таңда рус тилида билим еливатқан қаракөзләргә дөләт тилини мукәммәл үгитиш йолида әмгәк қилмақта. 
Һәрдайим өзиниң Мустәқилликниң тәңтуши екәнлиги билән мәғрурлинидиған Сумбат Туғлуқова 2016-жили вилайәт даирисидә Мустәқилликниң тәңтушлириға беғишлинип өткүзүлгән тәнтәнигә наһийә намидин қатнишип, маддий вә мәнивий соғилар билән мукапатланди. Шундақла 2017-жили ЭКСПО көргәзмисигә наһийә яшлири намидин берип, елимиз тарихидики алаһидә вақиәни өз көзи билән көрүп, унтулмас тәсират билән қайтқанлиғини һеликәм һаяҗан илкидә әскә алиду. Бүгүн мәрипәт беғиниң бағвини сүпитидә яш әвлатқа заманға лайиқ билим бериватқан Сумбат Маратқизи 2017-жили қурулған «Қолқанат» пидаийлар топиниң вә «Жас Отан» яшлар қанитиниң әзаси. 
– «Қолқанат» пидаийлар топи пәқәт үч адәмдин тәркип тапқан. Биз 2017 — 2018-жиллири жигирмидин ошуқ житим вә имканийити чәкләнгән балиларни мәктәп формиси вә һаҗәтлик оқуш қураллири билән тәминлидуқ. Шундақла 1-октябрь — Қерилар күни һарписида ялғуз яшайдиған яшанғанларни мәйрими билән тәбрикләп, соғиларни тапшурсақ, Ж.Қудайбергенов намидики оттура мәктәп йенидики интернат оқуғучилириға беғишлап «Көңілді тапқырлар клубы» (КВН) оюнини уюштурдуқ. Амал болса, қолумиздин кәлгиничә йеза-йезилардики имканийити чәкләнгән гөдәкләргә соғиларни уюштуруп, муһтаҗ җанларға ярдәм беришкә тиришимиз. 2019-жилниң декабрь, 2020-жилниң январь, февраль, март айлирида наһийәмизниң мәркизий базиридики тиҗарәтчи  яшларни җәлип қилип, еғир ағриққа муптила болған гөдәк жутдишимиз үчүн хәйрихаһлиқ ишлирини уюштуруп, топланған ахчини униң давалиниши үчүн анисиниң қолиға тапшуруп бәрдуқ. Шундақла таҗсиман вирус пәйда болғандин башлап «Біз біргеміз!» акцияси даирисидә муһтаҗ аилиләрни озуқ-түлүк вә медицинилиқ қураллар билән тәминләп келиватимиз, – дәйду Сумбат.
Булту Сумбат Елбасы Н.Ә. Назарбаевниң Тәшәккүрнамиси билән тәғдирләнди. Оза Қазақстан Җумһурийитиниң Президенти Қ.К. Тоқаевниң Миннәтдарлиқ хетини алған еди. Шундақла униң архивидин наһийә, вилайәт һакимлириниң пәхрий ярлиқлирини учраттим. Уларниң һәммиси билән тонушуп чиқиш үчүн бираз вақит керәк. Һәрбир тәшәккүрнаминиң кәйнидә тәшәккүргә лайиқ әмгәк бар десәк, ашуруп ейтқанлиқ болмайду.
Хуласә шуки, «Қилған ишиңдин бәһирлинишниң сири – биригә чин нийитиң билән қайтурумини күтмәй яхшилиқ қилиш. Бир адәмниң иккинчи адәмгә көрсәткән ярдими билән аләмни өзгәртиш мүмкин әмәс, бирақ муһтаҗ болған бир бәндиниң җәмийәткә дегән пикрини өзгәртишкә болиду әмәсму?!». Мана бу Сумбатниң ой-тәпәккүридин туғулған сөзләр. «Пидаий болуш – жүрәкниң хаһиши, йәни һәқиқий нийәтниң көрүнүши» дәп Президентимиз Қасым-Жомарт Тоқаев ейтқандәк, жүриги билән нийити бир Сумбат Туғлуқовани елимизниң һәқиқий вәтәнпәрвәри десәк, һеч хаталашмаймиз. 

Уйғур наһийәси.

154 рет

көрсетілді

0

пікір
Алдыңғы мақала Өзини өзи йетилдүргән сәнъәткар
Келесі мақала Көп қирлиқ Хуршидәм

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

24 Ақпан, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы