• Йеңилиқлар
• 17 Ақпан, 2021

Күчлүк бизнес – күчлүк ихтисат

Дөләт рәһбири Samruk Business Forum елимиз тиҗарәтчилирини қоллап-қувәтләш форумиға қатнашти.
Қасым-Жомарт Тоқаев өз сөзидә форумни өткүзүшниң елимиз бизнеси вә «Самруқ-Қазына» үчүн әһмийәтлик екәнлигини тәкитлиди. Җүмлидин уттур оффтейк яки умумий баһаси 67 миллиард тәңгә болған алдин-ала шәртнамиләр вә стратегиялик келишимләр имзаланди. Президент фонд паалийитини иҗабий баһалиди.
– Он бәштин ошуқ йөнилиш бойичә наһайити яхши вә мәзмунлуқ планлар. Җүмлидин холдингни сетивелишни оптималлаштуруш бойичә чоң иш әмәлгә ашурулди, карханиларни, шундақла тохтап қалған карханиларни қоллап-қувәтләш программиси ишләнди, – дәп тәкитлиди Дөләт рәһбири.
Қасым-Жомарт Тоқаев чоң дөләт корпорациялири вә бизнес вәкиллириниң шериклигини қоллап-қувәтләш тоғрилиқ пикир ейтти, бу болупму пандемияниң ихтисадий ақивәтлиригә қарши күришиштә алаһидә әһмийәтликтур.
– Илғар технологияләр, мәһсулатни базарға чиқиришниң ойлаштурулған сәясити вә квалификациялик мутәхәссисләр – утуқ асаси. Бу принципларни иш йүзидә әмәлгә ашуруватқан нурғунлиған компанияләр бар. Карханилар адаләтлик риқабәтчиликтә узақ муддәтлик шәртнамиләрни қолға кәлтүрди. Бу Қазақстанда чиқирилған мәһсулат сүпитиниң жуқури екәнлигини испатлайду. Бирқатар компанияләр шундақла чәт әл базирини өзләштүрүватиду. Бирақ, етирап қилиш керәкки, мундақ карханилар анчила көп әмәс. Шуңлашқа дөләт вә дөләт корпорациялири тәрипидин турақлиқ ярдәм көрситилиду, – деди Дөләт рәһбири.
Президентниң сөзичә, елимиз санаитини тәрәққий әткүзүштә квазидөләт секториға, болупму «Самруқ-Қазына» фондиға муһим роль тәәллуқ. 
Дөләт рәһбири өз сөзидә бирләшкән инновациялик лайиһиләр имканийитини нәтиҗидарлиқ пайдилинишқа, фондниң чоң карханилири әтрапида қошулған баһа һалқисини вуҗутқа кәлтүрүшкә, инфрақурулумлуқ ярдәм қилишқа, инсан капиталини риваҗландурушқа, чәт әл базирини өзләштүрүшкә алаһидә диққәт җәлип қилинғанлиғини ейтип өтти.
Президент докладида шундақла дөләт мүлкини хусусийлаштуруш сәяситиниң үч асасий принципини атап көрсәтти.

– Биринчи – хусусийлаштуруш хусусий монополистларниң пәйда болушини истисна қилиши керәк. Әпсуски, биздә асасий инфрақурулум объектлирини нәтиҗидарсиз хусусийлаштуруш фактлири бар. Әқилгә мувапиқ болмиған хусусийлаштурушниң шундақ фактлириға яңливаштин йол қоюшқа болмайду, улар дөләтниң ихтисадий мәнпийәтлиригә зиян йәткүзиду. Буниң үчүн Һөкүмәт вә фонд җавапкәр. Иккинчи – активларни шәхсийләргә сетиш бюджетқа болған жүклиминиң азийишиға ярдәм қилиши керәк. Хусусий тиҗарәтчи өз пайдисиниң нурғун қисмини бюджет буйрутмилирини орунлимай, имтияз, грантлар вә башқа әвзәлликләрсиз базарда, мәһсулат вә хизмәтни экспорт қилиш арқилиқ ишләп тепиши керәк. Үчинчи – хусусийлаштуруш ениқ ихтисадий пайда бериши керәк. Һәрқандақ карханинини хусусийлаштурушниң маһийити униң нәтиҗидарлиғини ашуруштин, миллий ихтисатқа һәссисини көпәйтиштин ибарәт, – дәп билдүрди Қасым-Жомарт Тоқаев.
Президент бу йосунда хусусийлаштуруш җәрияниниң очуқлуғини тәминләш мәсилилиригә алаһидә тохтилип өтти.
– Дөләт мүлки хусусийлаштурулуватқанлиқтин, гражданлар униң барлиқ шәртлирини билиши керәк. Җәмийәтлик назарәт барлиқ дәриҗиләрдә нәтиҗидарлиқ вә очуқ хусусийлаштурушни жүргүзүшниң әмәлий қурали болуп һесаплиниду. Һөкүмәт вә фондқа тегишлик тапшурмилар берилди. Фондниң чоң компаниялиригә мунасивәтлик «хәлиқ IPOси» арқилиқ хусусийлаштуруш чоң актуаллиққа егә болмақта. Мәмликитимизниң өз мәблиғини нәтиҗидарлиқ сәрип қилишни халиған барлиқ гражданлири миллий байлиқниң бир қисмини сетивелиш имканийитигә егә болуши керәк, – деди Дөләт рәһбири.
Форумда шундақла «Самруқ-Қазына» акционерлиқ җәмийитиниң башқарма рәиси Ахметжан Есимов, «Ақ жол» партиясиниң рәиси Азат Перуашев, Қазақстан Машина ясиғучилар иттипақиниң рәиси Мейрам Пишембаев сөзгә чиқти.