• Спорт
• 25 Ақпан, 2021

Келәчигидин үмүтләндүриду

Бу күнләрдә балилиримизниң спортниң у яки бу түри билән турақлиқ шуғуллиниватқанлиғи қайил қилиду. Буни биз, биринчидин, елимиз Президентиниң яшларни сағлам һаят тәризигә җәлип қилиш мәхситидә, һәр йезида, һәр шәһәрдә спорт клублири билән спорт мәйданчилирини көпләп пайдилинишқа бериш охшаш тапшурмилириниң әмәлиятта өз әксини тепиватқанлиғи дәп чүшинимиз. 

Гөһәрбүви ИСМАЙИЛҖАНОВА,
«Уйғур авази»

 Спорт мәктәплири билән спорт клублирида биз шахмат, шашка, тоғызқумалақ, волейбол, футбол, баскетбол, әркин күрәш, бокс, кик-боксинг, дзю-до билән шуғуллиниватқанларни көпләп учритимиз. Уларниң арисида оғуллар шунчә көп болса, кейинки бәш-он жилда қизларниңму қизғин шуғуллиниватқанлиғи һәркимни хошал қилмақта. 
 Гүлминәм Иминова — әйнә шундақ спортни сөйгән қизларниң бири. У спортниң джиу-джитсу түри билән шуғуллиниватиду. Һазир онинчи синипта оқуватқан қизимиз нурғунлиған турнирларға қатнишип, ғалип чиқти. 
Тәкитләш керәкки, төрт жил ичидә Г. Иминова җәми 37 турнирда мувапәққийәт қазанди. Әнди у он төрт йешида Бириккән Әрәп Әмирлигидә өткән хәлиқара турнирда ғалип чиқип, бирдинла спорт маһири аталди.
— Спорт — мениң һаятим десәм, ашуруп ейтқанлиқ әмәс. Һәр күнүмни мәшиқсиз тәсәввур қилалмаймән. Һазир «Стрела», «Альянс» спорт клублирида мәшиқлиниватимән. Мениң бу спорт клублириға берип мәшиқлинишимгә шараит яритип, дайим қоллап-қувәтләватқан бова- момилирим билән ата-анамлин чәксиз миннәтдармән. Чүнки һәрқандақ мусабиқигә берип-келишимизниң өзи мәлум дәриҗидә мәбләғни тәләп қилиду. Дайим һамийлиқ қиливатқан бова-момилирим, ата-анам билән устазлиримниң, мәшиқләндүргүчилиримниң үмүтини ақлашқа тиришиватимән, – дәйду  талантлиқ спортчи. 
 Гүлминәм йәттинчи синипқичә Яркәнт шәһиридики Җамбул намидики оттура мәктәптә оқуди. Һазир ата-аниси билән Алмутида туриду. 
Елимиздила әмәс, бәлки пүткүл дунияни вәһимигә салған пандемия тәсиридин Гүлминәм мәшиқлиниватқан «Стрела» спорт клубиниң әзалири Абу-Даби вә Португалиядики турнирларға җиддий тәйярлиқ көрүведи, пандемиягә бола, улар өтмиди. Клуб әзалири һазир карантин чарилиригә риайә қилған һалда мәшиқлинишни давамлаштуруватиду. 
 
Панфилов наһийәси. 
Турсунмәһәммәт МӘШҮРОВ чүшәргән сүрәт.