• Спорт
• 25 Ақпан, 2021

Әләнур – Қазақстан чемпиони

Рашидәм РӘҺМАНОВА,
«Уйғур авази»

14 яшлиқ Әләнур Турғанова (сүрәттә) – Әмгәкчиқазақ наһийәси Қорам оттура мәктивиниң 9-синипида ана тилида билим алиду. Синип йетәкчиси Гүлчеһрәм Садированиң ейтишичә, барлиқ пәнләрдин әла баһаға оқуйду. Әләнур оқуштин қоли бошиған пәйттә бокс билән шуғуллиниду. У һазир мәшиқләндүргүчи Самат Ахметниң қолида тәрбийилиниватиду. Таусүгир йезисидин Қорамға қатнап, йеза балилирини боксқа үгитиватқан бу инсандин қорамлиқлар интайин рази. 
Әләнур йеқинда бокстин Алмута шәһиридә өткән 2005 — 2006-жиллири туғулған өсмүрләр арисидики Қазақстан чемпионатиға қатнишип, чемпион аталди. Мәзкүр күч синишишқа елимизниң барлиқ вилайәтлиридин 400дин ошуқ яш спортчи иштрак қилди. 
Атап кетиш керәкки, яш спортчи мошу кәмгичә қатнашқан һәрқандақ мусабиқидә рәқивини биринчи раундтила йеңивалатти. Бу қетим Әләнур яшлар арисида тонулған боксчи Мәншүк Турғанбай билән йәкму-йәккә чиқти. Йеза шараитида аддий залларда спортниң қир-сирини үгәнгән Әләнур үчүн мәхсус залларда чиниққан спортчи билән күч синишиш оңай болмиди, әлвәттә. Бирақ мундақ синақта күчлүкниң йеңиши сөзсизғу?! Әләнур мәшиқлиниш давамида үгәнгән вә бурунқи мусабиқиләрдә топлиған техникилиқ билими вә тәҗрибилирини толуқ намайиш қилип, рәқивини үчинчи раундта тиз пүктүрүп, Қазақстан чемпиони аталди. 
 Вилайәтниң шәнини қоғдап, ғалип чиққан Әләнур Турғановани аилиси, барлиқ жутдашлири, мәктәптики муәллимлири вә достлири қарши алди. Қорам йеза округиниң һакими Турсынбай Еменбаев яш спортчи қизға Миннәтдарлиқ хетини тапшуруп, буниңдин кейинму егиз чоққилардин көрүнүшигә тиләкдашлиқ билдүрди. 

Әмгәкчиқазақ наһийәси.