• 1-март – Миннәтдарлиқ күни
  • 25 Ақпан, 2021

Рәхмәт сизгә, ана!

Өйүмизниң нури, бәрикити вә байлиғи болған анимиз Гүлрүз бизни беқип қатарға қошқичә нурғун җапаларни тартти. Атимиздин әтигән айрилип, һаятниң боран-чапқунлириға ялғуз өзи бәрдашлиқ берип, бизни қанат астиға елип, һечнемидин тарчилиқ көрсәтмәй чоң қилди. Ениғирақ ейтсам, анимиз 1970-жили атимиз Зәйнидин Бавдинов билән турмуш қуруп, икки қиз, бир оғул сөйиду. Тәғдирниң язмиши билән атимиз 1982-жили йол һалакитидин көз жумуп, анимиз үч пәрзәнди билән тул қалиду. У чағда чоңимиз он яшта, кичигимиз әндила йәттә яшта едуқ. Техи ақ-қарини тонуп үлгәрмигән бәңваш чеғимизда балилиқтин анимизниң бешиға чүшкән еғирчилиқни сәзмигән екәнмиз. Бизгә һәм ата, һәм ана болған меһриванимизниң муһәббити билән житимлиқниң жиғисини төкмидуқ, қийинчилиқ көрмидуқ. Аңлиқ һаятини мәрипәт саһасиға бәхш әткән анимиз муәллим болуп ишләп, үчилимизниң заманға лайиқ билим елип, җәмийәткә ярамлиқ шәхс болуп йетилип чиқишимизға зәмин яратти. Анимизниң арқисида алий билим егиләп, бүгүнки күндә үчилимиз қәдирданимизниң басқан изини бесип, устаз болуп хизмәт қилмақтимиз. 
Анимиз шәрәплик хизмәт қилип, 2004-жилдин буян һөрмәтлик дәм елишқа чеқип, бу күнләрдә бәш нәврисиниң очумидин су ичип, тартқан мәшәқитигә чушлуқ һалавәт көрүп яшимақта. У узун жиллар бойи Дардамту оттура мәктивидә математика пәнидин дәрис берип, шагиртлириниң жүрәк төридин орун алған пешқәдәм устаз. «Әмгәк ветерани», «Қазақстан Җумһурийитиниң билим саһасиниң әлачиси» дегән медальларниң вә санап түгәткүсиз пәхрий ярлиқларниң саһиби. Биз анимиз билән һәқлиқ рәвиштә пәхирлинимиз. Устаз болғини үчүнла әмәс, әлвәттә, бизниң анимиз болғини үчүн... Җапаримизни тола тартип, мошу күнгичә ғемимизни йәп, отумизда көйүп, бағриға басқанлиғи үчүн... Һемишәм биз үчүн дуа қилип, аилимизниң чириғини яққанлиғи вә һәм ана, һәм ата болуп тәрбийилигәнлиги үчүн рәхмитимиз чәксиз. 
Чачлириға ақ кирип, үзлирини қатму-қат қоруқ басқан анимизниң һәрбир тал ақ чечиниң вә һәрбир қоруғиниң кәйнидә меһнәт бар дәп билимиз. Униң сирға толған көзлиридин өмүр кәчмишлирини көргәндәк болимиз. Иссиқ алиқини билән бешимизни сийписа, өзимизни қайтидин гөдәк болуп қалғандәк һис қилип, дәрт-муңимиз күл талқан болиду. У күлсә, пүткүл дуния нурлиниду. Чүнки анилар билән гөзәлдур һаят! 
Баһарниң дәсләпки күнигә тоғра кәлгән Миннәтдарлиқ күнини пайдилинип, қишниң ахирқи ейида йәтмиш бәшинчи баһарини қарши алған пасибанимизни тәбрикләймиз. Қәлбимиздики бар һиссиятни қәләм билән йәткүзүш мүмкин әмәс. Сәвәви, аниниң балиға болған чәксиз муһәббитини сөз билән изаһлаш мүмкин болмиғинидәк, бизниң анимизға болған миннәтдарлиғимизни бир мақалиға патқузуш мүмкин әмәс екән... Рәхмәт сизгә, Ана!

Шаһидәм БАВДИНОВА.

Уйғур наһийәси. 

475 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы