• Замандаш
  • 03 Наурыз, 2021

Аниға қарап қиз өсиду

Дәрваза сиртидики бәлдиңдә муңдишип олтарған мөтивәрләр – йезиға бәрикәт киргүзүп турғандәк, көзгә бөләкчә иллиқ көрүниду. Егилип салам бәрсәк, алиқан йейип дуа берип, теги-тәктимизни сүрүштүрүп, гәпни ата-бовилиримиздин башлайдиған яшанғанларниң һәр һекайисидә чоң мәна бар. 

Сабирәм ӘНВӘРОВА, 
 «Уйғур авази»

Җүмлидин мана шундақ жутниң ғәзниси, әқилчиси болған ақ ромаллиқ Маһинур Ниязовани чоң-кичик алаһидә һөрмәт қилиду. Гөзәл баһар пәслиниң дәсләпки күнлиридә туғулған күнини қарши алидиған нураний ана бийил тохсән яшниң даваниға қәдәм ташлиди. 
Һаятниң җапа-мәшәқитини тола тартип, әмгәк билән тавланған Маһинур ана  1931-жили Уйғур наһийәсиниң Түгмән йезисидики инавәтлик  аилиләрниң биридә дунияға кәлди. Атиси Имәрбақи, аниси Мерван, әмгәк адәмлиридин болған. Мәлум бир сәвәпләргә бағлиқ, Маһинур ана дадисиниң акиси Нияз дегән кишиниң қолида тәрбийилиниду. Балилиғи рәһимсиз уруш жиллириға тоғра кәлгәчкә, ачарчилиқ билән йоқсизчилиқниң дәрдини тола тартқан у он йешидин башлап етиз-ериқ ишлириға арилишип, күн-түн демәй әмгәк қилиду.
– Уруш бизни әтигән чоң қилди. Һаятимизниң әң зилва чеғидики шат-хорам күнлиримизни жүригимизгә яра салидиған еғир күнләргә алмаштурушқа тоғра кәлди. У жиллири һечким қери-яш дәп бөлүнмиди. Күндүзи колхозниң тирикчилигидә болсақ, кечиси жип-жиңнини қолумиздин ташлимай таңни атқузаттуқ. Йешим кичик болсиму, колхоз ишлириға паал қатнаштим. Қирғизсай йезисидики «Қизил Туғ» колхозида, андин Ленин намидики колхозда сеғинчи болуп ишлидим, – дәп өткән күнләрни әскә алди ана. – Һазир шу бир еғир жиллар артта қелип, баяшәтчиликтә һаят кәчүрүватимиз. Һазирқи яшлар сийир сеғиш бир чәттә турсун, һәтта «колхозниң» немә екәнлигидин бехәвәр. Силәрниң тәлийиңларға һәрдайим заманимиз теч, асминимиз очуқ болғай!
Уруштин кейин Баһавдун Нурдунов дегән киши билән турмуш қуруп, он балини дунияға елип кәлгән нураний ана бу күнләрдә жигирмә бәш нәврә, оттуз чәврә, үч қәврә сөйди. Пәрзәнтлириниң барлиғи һаяттин өз орнини тапқан, бир-бир саһаниң мутәхәссиси. 
Маһинур ана 1971-жили «Қәһриман Ана» медалиға, 2006-жили «Алтун һалқиға» сазавәр болди. Уруш жиллиридики әмгиги етиварға елинип, Улуқ Ғалибийәтниң бирқатар тәвәллудлуқ медальлири билән тәғдирләнди. 

***
«Тәбиәт аялға мундақ деди: қолуңдин кәлсә гөзәл бол, халисаң дана бол, һә, сәвийәлик, әқиллик болушқа миннәтликсән». Бу -- атақлиқ француз драматурги Пьер де Бомаршениң сөзи. Һәм назук, һәм қәйсәр яралған аялларниң бойида тилсим бир қабилийәт бар. Шуңа улар өйниң түгимәс тирикчилиги билән кәсипниң җапалиқ жүкини тәң көтирип маңалайду. Узун сөзниң қисқиси, мәзкүр мақаләмгә чекит қоюштин авал Маһинур аниниң қизи Саһидәм һәдә һәққидә икки еғиз ейтип өтүшни тоғра көрдүм. Чүнки у Уйғур наһийәсидә узун жиллардин буян рәһбәрлик хизмәттә болуп, көч бешида жүргән абройлуқ инсанларниң бири...
 Саһидәм Баһавдунқизи Уйғур наһийәлик ғәзничилик башқармисиниң башлиғи. 1978-жили Илия Бәхтия намидики 3-Чонҗа оттура мәктивини Алтун медальға тамамлиған у Алмута шәһиридики һесап вә несийә техникумини тамамлайду, арида 2005-жили Қазақстан әхбаратлиқ технологияләр вә башқуруш институтида (КазИИТУ) оқуйду. Әмгәк йолини 1980-жилдин башлиған Саһидәм Нурдунова бүгүн бу саһаниң әң тәҗрибилик мутәхәссислириниң бири. 
Қириқ жилдин ошуқ иш-паалийитидә пәқәт бир кәсипниң жүкини һапашлап, аддий кассирдин башқарма башлиғиғичә көтирилип, адил әмгиги билән әл тәрәққиятиға һәссә қошуп келиватқан Саһидәм Нурдунованиң йәткән утуқлири  аз әмәс. Униң җумһурийәт, вилайәт, наһийә даирисидә алған мукапатлирини тизип чиқсақ йәнә бир мақалә чиқар еди... Әң муһими, у аилисиниң жүриги, меһриван ана, вападар яр. Һәрқандақ аял үчүн буниңдин артуқ мукапат йоқтур...
Мошу йәрдә Саһидәм һәдиниң әмгәксөйгүчлүги Маһинур аниниң ақ сүти билән берилгән қабилийәт десәк, мубалиғә болмас. Бир сөз билән ейтқанда, аниси қизи билән, қизи аниси билән пәхирлиниду. 
 
 

12563 рет

көрсетілді

139

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы