• Әхбаратлар еқими
  • 03 Наурыз, 2021

Жут хизмитидики ханим-қизлар

Рашидәм РӘҺМАНОВА,
«Уйғур авази»

Мана, үч жилдин бери Әмгәкчиқазақ наһийәси Ғәйрәт йезисидики Ханим-қизлар кеңишини Хусийәтбүви Баһапова башқуруватиду. Кеңәшниң сабиқ рәиси, жутниң һәқиқий вәтәнпәрвәр вә милләтпәрвәр қизи Зәйтүнәм һәдә Турданованиң саламәтлиги сир берип, вәзипилирини башқа адәмгә тапшуруп беришни илтимас қилғинида, мәлиниң чоңлири узундин бери җәмийәтлик ишларниң активисти ретидә тонулған Хусийәтбүви һәдини бир еғиздин мошу хизмәткә сайлиди.
Хусийәтбүви Әркинҗанқизи Маливай оттура мәктивини тамамлап, иш издәп шәһәргә кәтмәстин, йезида қелип, ата-анисиниң йенида, тамака егилигидә ишлиди. Кейин ғәйрәтлик Бәһримҗан ака билән тәғдири қошулуп, өй-очақлиқ болди. Бәш пәрзәнт тепип, улардин 10 нәврә сөйди. Барлиқ аңлиқ һаяти мошу Ғәйрәттә өткәнликтин, жутқа қоюқ арилишип, өзиниң яқа жутлуқ екәнлигиниму унтиди. Ахири йеза активистлири билән бир қатарда җәмийәтлик ишларда пишип, йетилди. Көпниң көзигә чүшкән Хусийәтбүви һәдә әнди мана нураний аниларниң йол-йоруғи һәм мәслиһәтлири билән йезиниң ханим-қизларға бағлиқ барлиқ ишлириниң бешида туриду. Җүмлидин у яшларни урпи-адәт, әнъәнилиримизгә үгитип келиду. Әлвәттә, ана тилимиздики мәктәпләргә бала топлаш, гезит-журналларни таритиш, уларға яздуруш ишлириму шу ханим-қизлиримизниң зиммисидә.
 Ғәйрәттә миллий тәрәққиятимизниң җанкөйәри ретидә тонулған йәнә бир қериндишимиз бар. У – «Қазпочта» акционерлик җәмийити Ғәйрәт йезисидики шөбисиниң башлиғи Назугум Җаппарова. 
Назугум йезидики И.Саттаров намидики мәктәпни үлгилик тамамлиди. У кичигидинла җәмийәтлик ишларға актив арилашти. Идрәклик қиз билимини мукәммәлләштүрүш мәхситидә оттура мәктәптин кейин Алмута ихтисат колледжиниң «Бухгалтерия» бөлүмигә оқушқа чүшүп, уни сетиқчи мутәхәссислиги бойичә түгәтти. Андин Алмута шәһиридә, Челәк вә Ғәйрәт йезилирида сода-сетиқ саһасида ишлиди.
2018-жили Назугум жутдашлириниң илтимаси вә йәрлик һакимийәтниң тапшурмиси билән почта бөлүминиң башлиғи болуп тайинланди. Өз ишиға жуқури җавапкәрлик билән қарайдиған у көпчиликниң ишәнчини ақлап келиватиду. У йеңи ишиға киришиши биләнла почтиниң интайин конириған бенасини җөндәш тәшәббусини көтәрди. Уни бузуп, қайтидин салмисиму, чүшкән тамлирини сугитип, ақартип, сирлиди. Ичи һәм әтрапини паскиничилиқтин тазилап, заманға маслаштурувалди. Ихтисат колледжида билим алғанлиқтин, почтиниң электронлуқ системисиниму үгинивалди. Шу арқилиқ йеза турғунлиридин барлиқ төләмләрни сүпәтлик қобул қилип, айлиқ, пенсия вә башқиму мәбләғ түрлирини вақтида таритип беришни билди. Иш орни йоқниң орнида һесаплинидиған мәлә турғунлири үчүн бу интайин зөрүр мәсилә, әлвәттә. Әң муһими, Назугум чоң-кичик билән силиқ муамилә қилиду. Чүнки у кичик пейил, дилкәш, әмгәксөйгүч инсан. Униң мүҗәзи юмшақ, авазини көтирип гәп қилишни дурус көрмәйду һәм ата-бовимиздин қалған «Чоңға – һөрмәт, кичиккә – иззәт» билән муамилә қилишни яхши билиду. Бир сөз билән ейтқанда, исмиға җисми ярашқан җан. Шу мунасивәтлик у қисқа вақит ичидә йеза турғунлириниң һөрмитигә сазавәр болди. Кәспий утуқлири үчүн Назугум һәрхил дәриҗидики пәхрий ярлиқлар, маддий мукапатлар билән тәғдирләнди. 
– Уйғур хәлқиниң бир вәкили болғанлиғим сәвәплик ана тилимизни сақлап қелишни өзәмниң инсаний борчум дәп билимән, – дәйду Назугум.
– Әң әвзили, жутдашлиримиз ана тилимиздики гезитларни чоң иштияқ билән яздурувалиду. Гайида муштири топлаш мәсилиси билән өйлиригә кирип қалсиңиз, «бир чинә чай ичип кетиңлар» дәп тутувелип, гезиттики көңлигә яққан мақалилар һәққидә сөзләйду. Әлвәттә, мундақ турғудики сөзләр көңлүмизни көтириду, – дәйду Хусийәтбүви һәдә Назугумни қоллап. 
Һә, Хусийәтбүви һәдә билән Назугум пәқәт муштири топлаш кампанияси мәзгилидила әмәс, бәлки башқа вақитлардиму йезидики ақсақаллар кеңиши, жигитбеши вә яшлар комитетиниң рәислири билән алақида болуп, жутниң һәммә ишлириға дегидәк арилишиду. Улар қолидин кәлгән ярдимини жутдашлиридин айиған әмәс.
 
СҮРӘТТӘ: Назугум Җаппарова вә Хусийәтбүви Баһапова. 
Әмгәкчиқазақ наһийәси.

125 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы