• Асасий мақалилар
• 03 Наурыз, 2021

Һәмкарлиқниң йеңи дәриҗиси

Дөләт рәһбири Қасым-Жомарт Тоқаев Қазақстанға дәсләпки дөләт сәпири билән кәлгән Қирғизстан Президенти Садыр Жапаров билән музакириләрни өткүзди.

Қасым-Жомарт Тоқаев Садыр Жапаровқа илтипат билдүрүп, униң Қирғизстан Президенти сүпитидә мәмликитимизгә қилған дәсләпки дөләт сәпириниң муһим әһмийәткә егә екәнлигини тәкитлиди.
– Биз бу қәдәмни Қазақстанға билдүрүлгән һөрмәт сүпитидә баһалаймиз. Бу наһайити чоң әһмийәткә егә. Униң икки мәмликәт оттурисидики мунасивәтләрниң техиму тәрәққий етидиғанлиғиға түрткә болидиғанлиғиға үмүт қилимиз. Сәпириңизниң программиси наһайити бай, – деди Дөләт рәһбири. 
Қазақстан Президенти мәмликәтлиримиз оттурисидики әнъәнивий достлуқ мунасивәтләрни тилға елип, Қазақстанниң Қирғизстанни пәқәт иттипақдаш сүпитидила қобул қилип қалмай, бәлки қериндаш дөләт дәп билидиғанлиғини ейтти.
Өз новитидә Қирғизстан Президенти Қасым-Жомарт Тоқаевқа Қазақстанни дөләт сәпири билән зиярәт қилишқа тәклип қилғанлиғи үчүн миннәтдарлиқ билдүрүп, икки хәлиқниң йеқин екәнлигини тәкитлиди. Садыр Жапаров улуқ қазақ шаири Жубан Молдағалиевниң қазақ вә қирғиз хәлиқлириниң йеқинлиғи күйләнгән поэмисидин үзүндә кәлтүрди.
Президентлар учришиш давамида сәясәт, сода вә ихтисат, инвестиция, транспорт-логистика, су-энергетика, мәдәний-гуманитарлиқ һәмкарлиқ саһалири охшаш иккитәрәплимә стратегиялик шерикликниң кәң даирисини, таҗсиман вирусқа қарши бирлишип күришиш, шундақла Евразиялик интеграция вә көптәрәплимилик қурулумлар йөнилиши бойичә өзара һәрикәт мәсилилирини муһакимә қилди. 
Андин кейин музакириләр кәңәйтилгән тәртиптә давамлашти. Президентлар стратегиялик шериклик билән иттипақдашлиқни техиму күчәйтиш истиқбалини муһакимә қилди, шундақла регионлуқ һәм хәлиқара күн тәртивиниң муһим мәсилилири бойичә пикирләшти. Буниңда сода-ихтисадий шерикликни күчәйтишкә вә сәясий, энергетика, мәдәний-гуманитарлиқ саһалиридики қоюқ өзара һәрикәткә асасий диққәт бөлүнди.
Тәрәпләр иш бабидики алақиларни һәртәрәплимә кәңәйтишниң, инвестициялик өзара һәрикәтни тәрәққий әткүзүшниң, икки мәмликәтниң транспорт-транзит иқтидарини бирлишип пайдилинишниң, шундақла рәқәмләштүрүш саһасида бирләшкән лайиһиләрни әмәлгә ашурушниң зөрүр екәнлигигә келишти. 
Музакириләр йәкүни бойичә Президентларниң Бирләшкән билдүрүши вә башқиму бирқатар муһим һөҗҗәтләр имзаланди.
Қасым-Жомарт Тоқаев билән Садыр Жапаров музакириләр аяқлашқандин кейин бирләшкән мәтбуат конференциясини өткүзди.
Мәтбуат конференциясидә Дөләт рәһбири музакириләрдә муһакимә қилинған башқа мәсилиләр билән бирқатарда мәдәний-гуманитарлиқ һәмкарлиқ истиқбалиға тохталди.
– Биз Қазақстан вә Қирғизстан Мәдәнийәт күнлирини өткүзүшкә келиштуқ. Бишкекта Абайға ядикарлиқ, Нур-Султанда Манас вә Чиңғиз Айтматов монументлири қәд көтириду. Униңдин ташқири хәлиқлиримизниң бай тарихий мирасини тәтқиқ қилиш вә аммибаплаштуруш үчүн күч-қувәтни бирләштүримиз, – деди Қасым-Жомарт Тоқаев.
Қирғизстан Президенти шундақла Қазақстанниң Тунҗа Президенти – Елбасы Нурсултан Назарбаев вә Парламент Мәҗлисиниң Рәиси Нурлан Нығматулин вә Премьер-министр Асқар Мамин билән учришип, музакириләрни өткүзди.
Қирғизстан Президенти дөләт сәпириниң  ахирқи күнидә Қасым-Жомарт Тоқаев билән Садыр Жапаров “Астана” Хәлиқара малийә  мәркизини зиярәт қилди. Президентлар Хәлиқара малийә мәркизи Хәлиқара сотиниң вә  Арбитраж мәркизиниң,  Малийә хизмәтлирини тәңшәш комитетиниң,  Ислам  малийә вә бизнес мәркизиниң,  Йешил малийә  мәркизиниң,  Экспат-мәркәзниң, Малийә мәркизий биржисиниң, Үзлүксиз кәспий тәрәққият бюросиниң вә  Малийә технологиялири мәркизиниң паалийити билән тонушти.