• Әхбаратлар еқими
• 31 Наурыз, 2021

Һаят узақлиғи өсиду

Йеқинда «Сағлам һаят тәризини шәкилләндүрүшниң йеңи яндишишлири бойичә 2022 – 2025-жилларға бәлгүләнгән миллий лайиһә» концепциясиниң лайиһиси вә уни әмәлгә ашуруш бойичә Чарә-тәдбирләр планини муһакимә қилиш мәсилилиригә беғишланған онлайн-кеңәшмә болуп өтти. 
Қазақстан Җумһурийити Саламәтликни сақлаш министрлиги Җәмийәтлик саламәтликни сақлаш миллий мәркизиниң башқарма рәиси Жәмилә Баттакованиң риясәтчилигидә өткән чарә-тәдбирниң мәхсити мәмликәтниң һәрбир граждининиң сағлам, узақ вә сүпәтлик яшишини тәминләштин, аһалиниң менталитетини саламәтлик пайдисиға өзгәртиштин, дөләт қурулумлириниң, җәмийәтлик фондларниң, ассоциацияләрниң, һөкүмәтлик әмәс тәшкилатларниң барлиқ дәриҗилиридә утуқлуқ идеологиялик иш вә аһали саламәтлигини яхшилашта секторларара өзара һәрикәтни жүргүзүштин ибарәт. 
Онлайн-кеңәшмидә Жәмилә Баттакова Җәмийәтлик саламәтликни сақлаш миллий мәркизи вә Саламәтликни сақлаш министрлиги ишләп чиққан Сағлам һаят тәризини илгирилитишниң йеңи яндишишлири бойичә 2022 –2025-жилларға бәлгүләнгән миллий лайиһиниң концепциясини тонуштурди. 
Шуни қошумчә қилиш керәкки, йеқинда Дөләт рәһбири Қасым-Жомарт Тоқаевниң Пәрмани билән миллий тәрәққиятниң 2025-жилғичә бәлгүләнгән миллий плани тәстиқләнди. Мәзкүр планда сағлам һаят тәризини шәкилләндүрүш биринчи новәттики вәзипә болуп һесаплиниду.
Жәмилә Баттакова концепция лайиһисини тонуштуруш даирисидә униң асасий йөнилишлирини атап көрсәтти. Мәсилән, әқилгә мувапиқ тамақлиниш, тамака чекиш вә һарақ ичишни қисқартиш, җисманий активлиқни риваҗландуруш, психикилиқ сағламлиқни қоғдаш, мәйиплиниш әһвалини төвәнлитиш, иҗтимаий тармақларниң ярдими билән аһалини кәң җәлип қилиш, дәсләпки медицинилиқ-санитарлиқ ярдәм дәриҗисидики чариләрни мукәммәлләштүрүш, сағламлиқ вә эпидемиологиялик назарәт программилирини җарий қилиш әйнә шу йөнилишләр җүмлисидиндур. 
2025-жилға қәдәр буниңдин күтилидиған нәтиҗиләр: гражданларниң һаят узақлиғи 75 яшқичә өсиду, сағлам һаят тәризигә әмәл қилғучи гражданлар үлүши 5 пайизғичә көпийиду, жуқумлуқ әмәс ағриқлар 7 пайизғичә төвәнләйду, аһалиниң саламәтлик мәсилилири бойичә савати 70 пайиз ашиду, салмиғи ошуқ вә семиз балиларниң үлүши 10 пайиз, бир тәвлүктә туз истимал қилиш 5 пайизғичә төвәнләйду.
Онлайн-кеңәшмидә Миллий лайиһә вә Чарә-тәдбирләр планини муһакимә қилишқа Миллий пәнләр академиясиниң академиги, Қазақстан тамақлиниш академиясиниң президенти Төрегелди Шарманов, «Җумһурийәтлик медицина палатиси» җәмийәтлик бирләшмисиниң башқарма рәиси Мақсут Қолжанов, Миллий медицина ассоциациясиниң пәхрий әзаси, Җәмийәтлик саламәтликни сақлаш миллий мәркизи байқиғучилар кеңишиниң әзаси, медицина пәнлириниң намзити Талапқали Измухамбетов, «Primary Health Care» миллий ассоциациясиниң президенти, медицина пәнлириниң доктори, профессор Төлебай Рахыпбеков, «Фонд диабетического просвещения» җәмийәтлик фондиниң иҗраий мудири Наталья Тукалевская, «Миллий медицина ассоциацияси» җумһурийәтлик җәмийәтлик бирләшмисиниң президенти, медицина пәнлириниң намзити Айжан Садықова, «Темекісіз» җәмийәтлик фондиниң мудири Жәмилә Садықова вә башқилар қатнашти.
Кеңәшмигә қатнашқучилар елимиздә сағлам һаят тәризиниң йеңи яндишишлирини илгирилитиш бойичә Миллий лайиһә концепциясигә өз тәклиплирини киргүзди.