- Әхбаратлар еқими
- 31 Наурыз, 2021
Ройхәткә елиш қандақ жүргүзүлиду
Мәркизий коммуникацияләр хизмитидә болуп өткән мәтбуат конференциясидә Стратегиялик планлаш вә ислаһатлар бойичә агентлиқниң рәиси Қайрат Келимбетов бийил аһалини ройхәткә елишниң қандақ жүргүзүлидиғанлиғи тоғрилиқ әхбарат бәрди.
Қайрат Келимбетов аһалини ройхәткә елиш мәсилисиниң йеқинда болуп өткән Ислаһатлар бойичә алий кеңәш мәҗлисидә қаралғанлиғини тәкитлиди.
– Тәхминлиримизгә асасланған һалда, җүмлидин эпидемиологиялик әһвал һесапқа елинип, аһалини ройхәткә елиш 1-сентябрьдин тартип октябрь ейиниң ахириғичә жүргүзүлиду. Йәни ройхәткә елиш икки айни өз ичигә алиду. Премьер-министрниң биринчи орунбасари Әлихан Смайловниң рәислигидә мәхсус дөләт комиссияси қурулуп, комиссияниң бирнәччә мәҗлиси өткүзүлди, – дәп тәкитлиди у.
У шундақла бийилқи аһалини ройхәткә елишниң алаһидиликлиригиму тохтилип өтти.
– Аһалини ройхәткә елиш мүмкинқәдәр толуқ рәқәмләштүрүлиду, йәни 1-сентябрь вә 15-октябрь арилиғида Миллий статистика бюросиниң мәхсус sanaq.gov.kz сайти ечилиду. У ройхәткә елиш даирисидики барлиқ соалларға онлайн-тәртиптә җавап бериш имканийитини яритиду. Әнди октябрь ейиниң ахирқи икки һәптисидә интервьюерлар беваситә гражданларниң өйлирини арилап, мәлуматларни планшетларға киргүзиду, – деди агентлиқ рәиси.
Қайрат Келимбетовниң тәкитлишичә, планлиниватқан аһалини ройхәткә елишниң дәсләпки нәтиҗилирини мошу жилниң ахириғичә елиш көздә тутулмақта.
600 рет
көрсетілді14
пікір