• Әхбаратлар еқими
• 31 Наурыз, 2021

Жуқури дөләт мукапити тәсис қилинди

Қазақстан Җумһурийитиниң Президенти Қасым-Жомарт Тоқаевниң тапшурмиси даирисидә дәсләпки қетим “Қазақстанның еңбек сіңірген ұстазы” дөләт мукапити тәсис қилинди вә мәмликәтниң барлиқ регионлиридин 20дин ошуқ хизмәт көрсәткән муәллим униң саһиби аталди.
Педагогларға дөләт мукапитини билим вә пән министри Асхат Аймағамбетов тапшурди. Министр әң яхши муәллимләрни жуқури мукапат билән тәбриклиди.
– Дөләт педагог кәспи мәртивисиниң вә абройиниң өсүшигә алаһидә диққәт бөлүватиду. Дөләт рәһбириниң тапшурмиси бойичә дәсләпки қетим “Қазақстанның еңбек сіңірген ұстазы” дөләт мукапити тәсис қилинди. Өсүватқан әвлатни тәрбийиләш йолида атқуруватқан әмгигиңларға миннәтдарлиқ билдүримән. Силәрни мукапат билән тәбрикләймән вә саламәтлик, хатирҗәмлик һәм талантлиқ оқуғучилириңларниң көп болушини тиләймән, – дәп мураҗиәт қилди Асхат Аймағамбетов муәллимләргә. 
Билим вә пән министри шундақла кейинки жилларда җумһурийәттә билим бериш саһасида жүргүзүлүватқан өзгиришләргә тохтилип өтти. Мәсилән, муәллимләр иш һәққиниң ашурулуши, һесаватниң вә жүклиминиң азийиши, йеңи оқуш программилирини, мәктәп дәрисликлирини тәйярлашқа болған тәләпниң күчийиши әйнә шу өзгиришләр җүмлисидиндур. 
 “Қазақстанның еңбек сіңірген ұстазы” пәхрий нами муәллимләргә қолға кәлтүргән жуқури утуқлири вә дөләт алдидики алаһидә хизмити үчүн берилиду. Мундақ жуқури намға сазавәр болған педагогқа шундақла 1 000 айлиқ һесап көрсәткүчи мөлчәридә бирвақитлиқ ярдәм пули берилиду.