• "Рухани жаңғыру"
• 21 Сәуір, 2021

Меһнәткәш ана

Жутумизда көпни көргән, бешидин иссиқ-соғни өткүзгән, мәзмунлуқ һаят кәчүрүп, бизгә вә кәлгүси әвлатқа үлгә болғидәк из қалдуруватқан анилар аз әмәс. Шуларниң қатарида биз дәсләпкиләрдин болуп Зиләйхан Һашимовани тилға алимиз. Чүнки анимиз барлиқ аңлиқ һаятини жутиниң иҗтимаий-ихтисадий саһасини тәрәққий әткүзүшкә сәрип қилди. Шуниң билән биллә арқа сәптә җасарәтлик әмгәк қилғанларниң бири. 

Гөһәрбүви ИСМАЙИЛҖАНОВА,
«Уйғур авази»

Жигитбеши Қәһриман Хизмәтов билән аниниң қутлуқ өйгә бардуқ. Аниниң өйидә Һакимҗан, Радик дегән хошнилири бар екән. Зиләйхан ана уларни өз пәрзәнтлири билән тәң көрүп, “буларму мениң балилирим” дәп тонуштурди. 
— Мениң балилиқ дәврим қенипқинә ойнап-күлүп, хошал-хорам өтмиди десәмму болиду. Чүнки биз уруш жилиниң балилири болғачқа, ата-анимизға әркиләшниң орниға уларниң мәйүс чирайиға тәлмүрүп чоң болдуқ, – дәйду ана. 
Әсли Чонҗа йезисида туғулуп өскән Зиләйханниң кейинки һаяти Яркәнт тәвәсидә өтти. Яркәнт шәһиридики Луначарский намидики мәктәптә билим алди. Идрәклик Зиләйхан мәктәптә пәқәт әла баһаларға оқуди. Болупму математика пәнигә болған қизиқишиниң үстүнлүгини байқиған устазлири келәчигигә үмүт билән қариди. У жиллири тәвәдики Красный Восток артелида алтә айлиқ бухгалтерларни тәйярлайдиған курс моҗут еди. Әйнә шу курста оқуп, Яркәнт шәһиридики мәиший хизмәт көрситиш комбинатиға ишқа орунлашти. Шу шу болдидә, у бу йәрдә 38 жил ишләп, һөрмәтлик дәм елишқа чиққичә әмгәк қилди. Арилиқта ихтисатчиларни тәйярлайдиған мәхсус курсларда билимини мукәммәлләштүргән З.Һашимова 1982-жилдин башлап мәзкүр комбинатта ихтисатчи болди. Яркәнтликләрниң ядида болса, у жиллири мәзкүр мәиший хизмәт көрситиш комбинати наһийәдики әң чоң мәһкимиләрдин болуп, аһалиға хизмәт көрситиш даириси жилдин-жилға кәңәйди. Тәкитләш керәкки, дәсләп кийим-кечәкни буйрутма бериш арқилиқ тикиш қолға елиниведи, сатрашхана, моздузхана, саат ясаш охшаш һәрхил хизмәт көрситиш пәқәт мәзкүр комбинат тәрипидин әмәлгә ашурулатти. 
— Мәзкүр комбинатқа узун жиллар давамида Галина Катаева рәһбәрлик қилди. Шу дәвирниң тили билән ейтқанда, бизгә вилайәттин мәҗбурийәт бериләтти. Мана шу мәҗбурийәтни бизниң шөбә һәрқачанла йүз пайиз орунлаттуқ. Шуниң үчүнму бирнәччә қетим “Илғар комбинат” дегән атақни қолдин бәрмидуқ, – дәйду ана шу жилларни әсләп. 
Зиләйхан яркәнтлик Пәйзулла Һашимов билән 1959-жили аилә қуруп, үч пәрзәнт сөйди. Мәрһум Пәйзулла атини яркәнтликләр убдан тонуйдиған. Мәзкүр комбинатта яғашчи болуп ишлигән у кейинирәк Кербулақ җиһаз фабрикисиниң Яркәнттики шөбисигә рәһбәрлик қилди. Үч пәрзәндини заманға лайиқ оқутуп, тәрбийиләп, қатарға қошти. Пәрзәнтлиридин 9 нәврә 14 чәврә сөйди. 
 Сөһбитимиз мавзуси жигитбашлири, миллий маарип, мәдәнийәт, мәтбуатқа кәлгәндә Зиләйхан ана мундақ деди: 
— Қизим, мәһәллимизниң жигитбеши Қәһриман тәдбирчан жигит. Биз охшаш яшанғанларниң көңлини елип, яшларға үлгә болғидәк ишларни қиливатиду. Болупму гезитқа муштири топлаш вақтида өй көрмәй жут арилайду. Шуниң ақивитидин бу жили бизниң мәһәллимиздики 60 аилидин 42си «Уйғур авази» гезитиға йезилди. Әзәлдин достлуғи ярашқан бу жутта башқа милләт вәкиллириму бар. Пат-патла баш қошушларни уюштуриду. Ундақ чағларда мәнму қалмаймән. Гезит-журналларға йезилишқа, келәчәк егилири болған яшларни елимизниң вәтәнпәрвәрлиридин болуп йетилишидә тәрибийиләшкә мәнму икки еғиз гепим билән үлүшүмни қошуп келиватимән, — деди.
 «Һиммити барниң – иззити бар» демәкчи, Зиләйхан анини жигитбеши вә мәһәллә турғунлири шу күни туғулған күни билән тәбрикләп гүлдәстиләрни тутти.

Панфилов наһийәси.