• "Рухани жаңғыру"
• 21 Сәуір, 2021

Депутат, тиҗарәтчи вә ...

Бийил Уйғур наһийәлик мәслиһәткә депутат болуп сайланған Алимҗан Һашимов – хәлиқниң хизмитидә болуп, адил әмгиги билән көпниң һөрмитигә еришкән инсан. У тапқан тапавитиниң бир бөлүгини хәйрихаһлиққа хәшләшни адәткә айландурған. Бирақ «Оң қолуң бәргәнни, сол қолуң билмисун» дегән хәлиқ даналиғиға әмәл қилип яшайдиған Алимҗан ака қилған яхшилиқлирини җар селиштин жирақ... 

Сабирәм ӘНВӘРОВА,
«Уйғур авази»

Елбасы Нурсултан Әбишоғли Назарбаевниң «Келәчәккә нишан: мәнивий йеңилиниш» намлиқ мақалисида «Келәчәктә милләтниң тапавәтлик болуши – униң тәбиий байлиғи билән әмәс, адәмләрниң риқабәткә қабиллиғи билән ениқлиниду» дейилгән еди. Үзлүксиз өзгириш, йеңилиниш үстидә тәрәққий етиватқан ХХІ әсирдә өзини өзи риваҗландуруп, заман еқимиға лайиқ әмгәк қилған инсанларла утуққа йетиду әмәсму. Хош, Елбасыниң мәзкүр мақалисида әйнә шундақ утуқ қазинип, тапқан-тәргининиң бир қисмини туғулған йери үчүн сәрип қиливатқан мәрт-мәрданә қазақстанлиқларни қоллап-қувәтлишимиз керәклиги тәкитләнгән. Җүмлидин шуни асасқа алған һалда бүгүн биз әмгиги көпкә үлгә Алимҗан ака Һашимов һәққидә қәләм тәврәтмәкчимиз. 
Авал бүгүнки қәһриманимизни қисқичә тонуштуруп өтидиған болсақ, Алимҗан Тохтиоғли Уйғур наһийәсиниң Чонҗа йезисида дунияға кәлгән. Әмгәк паалийитини 1993 — 1995-жиллири әркин күрәш бойичә мәшиқләндүргүчи болуп ишләштин башлиған у Қазақ аграрлиқ университетида ветеринария мутәхәссислиги бойичә билим елип, кейинирәк Қазақ спорт вә туризм академиясини тамамлайду. Алий билимлик яш мутәхәссис 2002-жили шәхсий тиҗарәт билән шуғуллинип, һаят йолида йеңи бурулуш һасил қилиду. Бүгүнки күндә у «Ашимов А.Т» ширкити билән «Атилла – әл-Фараби» ҖЧЙниң мудири. Шундақла кәпшәләш цехиниң ғоҗайини. Мәзкүр цехта 20 адәм турақлиқ иш билән тәминләнгән. Һәрхил металл буюмлирини ишләпчиқирип, наһийә хәлқи вә хошна наһийәләргә хизмәт көрситип келиватқан Алимҗан Тохтиоғли буниңға қошумчә қурулуш материаллирини сетиш билән бәнт. Шундақла у – наһийә аһалисини  медицинилиқ кислород баллонлири билән тәминләватқан бирдин-бир тиҗарәтчи. Өткән жили пандемия башлинип, хәтәрлик ағриқ хәлиқни һәләйкүмгә салғанда, Алимҗан ака наһийәлик мәркизий дохтурханиға он миллион тәңгилик медицинилиқ кислород баллонлирини йәткүзүп, онлиған инсанниң һаятини сақлап қелишқа зор һәссә қошти. 
Атисиниң вәсийити, анисиниң ақ дуаси билән хәлиқниң ғемидә жүргән оғлан өткән жили наһийә мәркизидики чоң мечит йенида диний сават ечиш мәдрисиси билән үч йүз орунлуқ нәзирханиниң һулини тикләп, пайдилинишқа бәрди. 
Наһийәлик мәслиһәтниң депутати, көрнәклик тиҗарәтчи Алимҗан ака Һашимовниң йәнә бир кәспи – бағвәнчилик. Әсли бу һәр уйғурниң қенида бар хисләт. Әллик гектар йериниң жигирмә гектариға наһийәниң бренди һесаплинидиған абрикос көчитини (он миң түп), қалғиниға шаптула, алма, қариөрүк қатарлиқ һәрхил мевә дәрәқлирини өстүрүп, мол һосул еливатиду. Бағвән бәш гектар йәргә питомник ясап, жилда әллик миң көчәтни базарға әчиқиду. Абрикосниң он сортини өстүрүп, жиллиқ һосул билән көчәтлирини елимизниң тәвә-тәвәлири билән чәт әлләргә сатиду. Алимҗан ака бағни пәрвиш қилиш үчүн он адәмни турақлиқ ишқа алған болса, мәвсүм вақтида мевә беғида икки йүз адәм ишләйду. Дәрвәқә, йеқинда у Чонҗа йезисидики 1-2-3-5-билим дәргаһлириға мевә көчәтлирини һәқсиз ианә қилди. Келәчәктә мәктәпләргә тикилгән көчәтләр мевә берип, униңдин чүшкән пайда мәктәпниң керәк-яриғиға ишлитилсә, дегән нийәттә яхши бир башланмининиң дәвәтчиси болған бағвән көчәтләрни тикиш җәриянини көздин кәчүрүп, билим-тәҗрибиси билән бөлүшти (сүрәттә). 
Бир әмәс, бирнәччә ишниң һөддисидин чиқип, турмуш-тирикчилигидин бөләк, депутатлиқ вәзиписини зор җавапкәрлик билән атқуруп келиватқан Алимҗан ака Һашимовниң хәлиқ үчүн төккән тәри инавәткә елинип, Президентимиз Қасым-Жомарт Тоқаевниң, Елбасы Н.Ә. Назарбаевниң тәшәккүрнамилири билән тәғдирләнди. Буниңдин сирт вилайәт, наһийә рәһбәрлиридин алған грамотилириниң санида чәк йоқ. Җүмлидин өткән жили у турақлиқ сахавәтлик паалийити түпәйли «Жомарт жүрек» мукапитиниң саһиби атилип, вилайәт һакиминиң хатирилик соғиси билән тәғдирләнди.
Һаяттики қолға кәлтүргән утуқлириниң барлиғини мәрһум атиси Тохти һаҗим билән аниси Бәхтихан Абдуҗәлилованиң тәлим-тәрбийисидин дәп билидиған Алимҗан акиға мечит вә мәдрисә селишни атиси аләмдин өтәрдә вәсийәт қилип кәткән екән. Биринчи Алланиң, кейин ата-анисиниң разилиғи үчүн адил әмгәк қилип, һөрмәткә сазавәр болған Алимҗан ака адимийлик хисләтләрни һәммидин жуқури қойиду. 
Бир дана «Бәргидә дени бар буғдайниң башиғи һәрқачан төвән қарайду, пәқәт дени йоқ буғдайла тик туриду» дәп бешида билими йоқ инсанларни әйнә шу дени йоқ буғдайға охшатқан екән. Буни Елбасы өз мақалисида «Прагматизм» дәп чүшәндүриду. Һәқиқәтәнму, әмгәкниң қәдрини чүшинидиған сахавәтлик, әқиллик инсанлар һечқачан көкрәк керип, ғадаймайду. Бәлки Алимҗан ака Һашимовтәк кичикпейиллиғи, меһнәткәшлиги, мәрт-мәрданә вә меһриванлиғи билән хәлиқниң иссиқ ихласиға еришип, әмгәктин камаләт тапиду.