• Әхбаратлар еқими
• 21 Сәуір, 2021

Күн тәртивидә – медиация мавзуси

Йеқинда Қазақстан хәлқи Ассамблеяси җумһурийәтлик Медиация кеңиши онлайн-мәҗлис өткүзди.
Чарә-тәдбиргә Парламент Мәҗлиси Қанун чиқириш вә сот-һоқуқ ислаһити комитетиниң кативи Снежанна Имашева, Мәҗлис депутати Вакил Нәбиев, Мәҗлис депутати, Малийә вә бюджет комитетиниң әзаси Юрий Ли, «Тоқунушларни биртәрәп қилиш вә медиация институти» шәхсий мәһкимисиниң мудири Александр Пак, Қазақстан Җумһурийити Алий сотиниң судьяси, яраштуруш җәриянлири бойичә уйғунлаштурғучи Улбосын Сүлейменова, «Қоғамдық келісім» җумһурийәтлик дөләт мәһкимисиниң лайиһиләрни әмәлгә ашуруш вә ҚХА қурулумлири билән ишләш башқармисиниң рәһбири Талшин Италиева, шундақла ҚХА Медиация кеңишиниң әзалири, кәспий медиация мәркәзлириниң рәһбәрлири қатнашти. Онлайн-мәҗлискә ҚХА җумһурийәтлик Медиация кеңишиниң рәиси Наринэ Микаелян модератор болди. 
Мәҗлистә кәспий вә кәспий әмәс модераторларниң күндилик вәзипилирини конкретлаштурушқа, әгәр илгири тәрәпләр оттурисида шу дава (тоқунуш) медиация тәртивидә қаралған вә тәрәп (тәрәпләр) мүлүккә бағлиқ болмиған дава (тоқунуш) бойичә давани биртәрәп қилиш бойичә келишимни орунлимайватса (орунлимиған болса), медиация җәриянлиридин ваз кечиш әһваллирға мунасивәтлик мәсилиләр муһакимә қилинди. Шундақла кәспий вә кәспий әмәс модераторлар үчүн яш өлчимини тәңшәш мәсилилири қаралди.
Чарә-тәдбир давамида шундақла «Медиация тоғрилиқ» Қазақстан Җумһурийитиниң Қануниға тәклипләр вә қошумчилар қаралди, Қазақстанда ҚХАниң медиация институтини техиму тәрәққий әткүзүш мавзуси муһакимә қилинди.
Мәҗлис йәкүни бойичә ҚХАниң җумһурийәтлик Медиация кеңишиниң тәркивигә Вакил Нәбиев билән Юрий Ли киргүзүлди. Александр Пак ҚХАниң җумһурийәтлик Медиация кеңиши рәисиниң орунбасари, Талшин Италиева кативи болуп сайланди.