• Нәшрият төһписи
• 06 Мамыр, 2021

Латин йезиғида йоруқ көрди

Рашидәм МИРЗӘХМӘТОВА,
«Уйғур авази»

Йеқинда «TAUGUL PRINT» нәшриятидин Камунар Турсуновниң «Orunlighan yaxshilar, Negme-nawa naxshilar» намлиқ новәттики китави йоруқ көрди. Бу – иҗаткарниң буниңдин илгири китапханлар билән үз көрүшкән «Илһам булиғи» (2018) вә «Яхшиларға беғишлаймән» (2019) намлиқ шеирий топламлиридин кейинки үчинчи китави.
К.Турсуновниң бу қетимқи китави канадилиқ қандишимиз Шәмшинур Абдурешитниң тәкливи һәм маддий җәһәттин қоллап-қувәтлиши билән латин йезиғида нәширдин чиқти. Мәзкүр топламда муәллипниң иҗадий мәһсулатлиридин ташқири Қазақстан, Өзбәкстан дөләтлиридә һәм ШУАРда яшаватқан иҗрачиларниң нахша мәтинлири нотилири билән орун алған. Ейтмақчи, айрим нахшиларниң музыкисини муәллип өзи язған. Мошу йәрдә топламға киргүзүлгән нахшиларни нотиға чүшириштә һәвәскар композитор Ризайдин Сейитовниң, мәтинләрни латин йезиғиға көчириштә Гүлнарәм Аблизниң, китапни техникилиқ җәһәттин безәштә Хуршидәм Һезимованиң көп күч чиқарғанлиғини алаһидә тәкитлигүмиз келиду. Муәллип уларға, шундақла топламлириниң йоруқ көрүшигә һамийлиқ қилған Әркин Қурбанов, Турған Зайитов қатарлиқ сахавәтлик инсанларға, мәнивий җәһәттин қоллап-қувәтлигән қәләмдашлири Молутҗан Тохтахунов билән Абдулҗан Азнибақиевқа чәксиз миннәтдарлиғини билдүриду.