• Әхбаратлар еқими
• 06 Мамыр, 2021

Бәрпакарлиқниң 30 жили

ҚУЯБ рәиси Рустәм Хәйриевниң ҚХАниң ХХІХ сессиясидә сөзлигән нутқи
 Һөрмәтлик Елбасы Нурсултан Әбишлулы, һөрмәтлик Қасым-Жомарт Кемелулы вә қиммәтлик Қазақстан хәлқи Ассамблеясиниң әзалири.
 Бүгүн пүткүл Қазақстан хәлқи Мустәқиллигимизниң 30 жиллиғини нишанлаватиду. Һәрбир әвлат мошу сәнәдә өзиниң алаһидә мәзмунини көриду. Мустәқилликниң бешида турған чоң әвлат вәкиллири үчүн – бу 30 жил таллаш вә илгириләш, бизниң Қазақстанниң қирлирини ениқлиған улуқ әмгәк жиллири. Яшлар үчүн болса – дуния хәритисидә илгиридинла бар мәмликәтниң өз тарихи. Әркин Қазақстанниң гражданлири Мустәқиллик – бу тарих сәһипилиридә орун егилигән чоң әвлатниң җасарити екәнлигини яхши чүшиниши лазим. Әнди «Тунҗа Президент» вә «Мустәқиллик» дегән сөзләр бирқатарда туруши керәк, улар синонимлардур.
 Һөрмәтлик Нурсултан Әбишулы! 
Сиз һәрдайим дөлитимизниң әң чоң байлиғи — униң адәмлири, униң әң асасий капитали — яшлар дәйсиз. Әң қийин вақитларда Сиз Қазақстанниң келәчиги үчүн инвестиция салдиңиз — йеңи әвлатқа, һәрбир қазақстанлиқ аилидә Сиз салған инвестицияләр намлири сақлақлиқ. Улар «Болашақ», «Дипломмен ауылға», «Жасыл ел», «Серпін», «100 жаңа есім» вә башқилар. Улар асасий үч мәсилини һәл қилиду – сүпәтлик билим, турақлиқ иш орни, әрзән турушлуқ өй.
 Әнди Қасым-Жомарт Кемелулы яшларға салған инвестицияләрни давамлаштурди — бу Президент кадр резерви, «Тәуелсіздік ұрпақтары» миллий лайиһилири даирисидә өткүзүлүватқан акцияләр. Буларниң һәммиси чоң имканийәтләр мәйданиға вә иҗтимаий лифтларға айланди. 
 Бүгүнки таңда яш қазақстанлиқлар NASA, GOOGLE, TESLA, Boeing охшаш чоң ширкәтләрдә кәшпиятчиләр сүпитидә лавазимлиқ орунларда олтириду. 
Бизниң яшлиримиз «алтун қошуқни» әкилип беридиғанларни күтмәйду, улар өзлири һәммә ишни қилиду, башқилар билән иш бөлүшиду, чүнки, һорун болмисаң, Қазақстанда иш көп екәнлигини билиду.
Әң муһими — Мустәқилликниң 30 жилида яшларниң аң-сәвийәсидә «қазақ» сөзиниң тарихий маһийити шәкилләнди. Демәк, һәрбиримиздә Әркинлик роһи, Вәтәнпәрвәрлик роһи вә Мустәқиллик роһи яшайду. 
 Мән Қазақстан уйғур яшлири бирлигидә ишләш җәриянида бизниң уйғурларниң қазақ хәлқи билән бир тәғдир болуп яшашқа интиливатқанлиғида чоң өзгиришләрниң болуватқанлиғини көрүватимән. Уйғур пидаийлири үч миңдин ошуқ тәминати начар аилигә ярдәм көрсәтти. «Халық алғысы» медалини биз жүригимиздә сақлаймиз. Қазақстан биз үчүн бәрикәтлик җайдур, биз, уйғурлар, бирпүтүн милләтниң аҗралмас қисми болдуқ. 
 Биз һәрхил, амма Сиз, Нурсултан Әбишулы, шәкилләндүргән бир милләт. Сизгә яшларға болған ишәнчиңиз үчүн көп рәхмәт!
 Биз Сизниң: «Өз елиңниң вәтәнпәрвәри болуш – бу Қазақстанни жүригиңдә елип жүрүш» дегән сөзүңизни дайим әстә сақлаймиз.
Рәхмәт!