• Әхбаратлар еқими
• 06 Мамыр, 2021

Қизиқиш һасил қиливатиду

Қазақстанда ишләп чиқирилған QazVac вакциниси билән аһалиға әмләткә селишниң башлиниши тоғрилиқ хәвәр чәт әлләрдә алаһидә қизиқиш һасил қилди.
Җүмлидин нурғунлиған әхбарат агентлиқлири вә нәширләр Қазақстан тәҗрибиси тоғрилиқ материалларни елан қилди. Уларниң арисида Reuters, The Guardian (Бүйүк Британия), Fortune (АҚШ), Agence France-Presse вә Le Figaro (Франция), EFE (Испания), ANSA (Италия), ТАСС (Россия), Anadolu (Түркия), шундақла МДҺ, Азия, Европа вә Йеқин Шәриқ әллириниң башқиму регионлуқ һәм миллий аммивий әхбарат васитилири бар. 
Мәсилән, «Қазақстан таҗсиман вирусқа қарши ички вакцинини чиқарди, мошу Мәркизий Азия мәмликитиниң саламәтликни сақлаш министри болса, уттур эфирда әмләткә салдурди», дәп язди The Guardian нәшри.
Бүйүк Британия журналистлири, шундақла Қазақстанниң «Спутник V» вакцинисини ишләп чиқарған дәсләпки мәмликәт болғанлиғини атап көрсәтти.
«Қазақстан COVID-19 инфекциясигә қарши ички вакцинини ишләп чиқип, уни тәвсийә қилған санақлиқ мәмликәтләр қатариға қошулди. QazVacниң чиқирилиши Мәркизий Азия мәмликитиниң илмий вә санаәт иқтидариниң яққал испати болуп һесаплиниду. Америка Қошма Штатлирини, Бирләшкән Корольлуқни, Хитайни, Россияни вә Һиндстанни қошуп һесаплиғанда, COVID-19 инфекциясигә қарши вакцина ишләп чиққан әлләр җиддий тәрәққий әткән ихтисатқа егә вә уларниң аһали саниму нурғун, –дейилиду Eureporter материалида.
Мақалиларда мәмликәтниң пандемиягә қарши күрәшкә қошуватқан һәссиси жуқури баһалиниду вә Қазақстанниң ички вакцинини ишләп чиқип, униң чиқирилишини йолға салған илғар мәмликәтләрниң қатариға киргәнлиги тәкитлиниду.