• Әхбаратлар еқими
• 06 Мамыр, 2021

Достлуқ үлгиси

Алмута вилайәтлик ҚХА әзалири Қазақстан хәлқи Ассамблеясиниң XXIX сессиясидә қобул қилинған қарарлар даирисидә әмәлгә ашурулидиған иш планини муһакимә қилди.
Буниңдин кейинки иш Елбасы Қазақстан хәлқи Ассамблеясиниң XXIX сессиясидә оттуриға қойған бәш принцип – вәтәнпәрвәрлик, гражданлиқ тәңлик, дөләт тилиниң бирләштүргүчи күчи, интеркультурализм вә милләтни турақлиқ йеңилаш принциплири бойичә жүргүзүлиду.
Вилайәтлик ҚХА мәҗлисиниң қатнашқучилири – Журналистлар клубиниң рәиси Атсалим Идиговниң, «Жаңғыру жолы» яшлар һәрикити регионлуқ штабиниң рәһбири Руфина Усанованиң вә Әмгәкчиқазақ наһийәлик қурд этномәдәнийәт бирләшмисиниң вәкили Надо Надыровниң тәкитлишичә, Қазақстан хәлқи мошу принциплар әтрапиға җипсилишиши керәк. Улар миллитидин, диний вә башқа тәәллуқлуғидин қәтъий нәзәр, барлиқ гражданларға чүшинишлик.
– Течлиқта вә разимәнликтә яшаш бәхти һәммила хәлиққә әмәс, бәлки лидери бирлик, достлуқ, ишәнчиниң надир үлгисини тапалиған милләткила мунасип, – дәп тәкитлиди Атсалим Идигов. – Бу үлгини бизниң Елбасы тапти. Қазақстан хәлқи Ассамблеясиниң паалийити түпәйли Қазақстандики барлиқ этнослар мустәқил әлниң шәкиллиниш вә күчийишиниң паал қатнашқучиси болди, һәрқачан вақиәләр қайнимида вә ислаһатларниң алдинқи сепидә болуватиду. Биз өйүмиздики течлиқ үчүн тәғдирдин чәксиз миннәтдармиз! Бизниң вәзипимиз – мошуни сақлаш, көпәйтиш вә кәлгүси әвлатларға тапшуруш.
Өз новитидә Руфина Усанова яшларниң барлиқ йеңилаш җәриянлириниң һәрикәткә кәлтүргүчи күчи екәнлигини, уларниң өзини көрситиши үчүн җумһурийәттә зөрүр шараитниң яритилғанлиғини тәкитлиди. Униң атап көрситишичә, Йәттисуниң яш әвлади Милләт Лидериниң идеялирини толуқ қоллап-қувәтләйду вә һазирниң өзидила ихтисат, мәдәнийәт саһалирини тәрәққий әткүзүшкә, иҗтимаий проблемиларни бирлишип һәл қилишқа ат селишиватиду. Әң муһими, яшлар тәшәббуслирини һәртәрәплимә қоллап-қувәтләш керәк.