• Асасий мақалилар
• 06 Мамыр, 2021

Лайиһә ғалиплири билән учрашти

Йеқинда «Қазақстандики 100 йеңи исим» лайиһисиниң йәкүни чиқирилди. Униңда 30 адәм ғалип аталди. Бийил финалға чиққанларниң арисида муәллимләр, врачлар, пидаийлар нурғун болди.

Қазақстан Президенти Қасым-Жомарт Тоқаев лайиһә ғалиплири билән учрашти.
– Елбасыниң тәшәббуси билән әмәлгә ашурулуватқан «Қазақстандики 100 йеңи исим» мана төрт жилдин буян мәмликәтни истедатлиқ вә мәхсәтчан яшлар билән тонуштуруватиду. У әмәлгә ашурулуватқан вақит ичидә лайиһигә 7,5 миңдин ошуқ адәм қатнашти. Уларниң һаят йоли, йеши вә миллити һәрхил, паалийәтниң һәрхил саһалириға, Қазақстанниң җай-җайлириға вакаләтлик қилиду. Бирақ уларни охшаш қәдрийәтләр һәм көзқарашлар – әмгәксөйгүчлүк вә бәрпакарлиққа интилиш, өзигә болған ишәнчә вә сөйүмлүк ишиға толуқ берилиш бирләштүриду, – деди Президент.
Дөләт рәһбири лайиһә ғалиплирини тәбриклиди вә уларниң өз таланти билән хәлиқ иззәт-икрамиға еришип, дөләтниң тәрәққиятиға һәссә қошқанлиғини тәкитлиди. Президентниң қәйт қилишичә, улар хәлқимизниң пәхри болуп һесаплиниду вә башқа әлләр улар арқилиқ Қазақстанға баһа бериду. 
– Бирнәччә адәм лайиһә ғалиби аталди, улар пүткүл дунияға Қазақстан хәлқини тонуштуриду. Биз түрлүк саһаларда утуққа йәткән вәтәндашлиримизниң ишини мунасип баһалишимиз керәк. Утуқлуқ адәмләрниң тәҗрибиси һәрқачан башқилар үчүн үлгә болуп хизмәт қилиду. Өскиләң әвлат силәрни әгишип маңиду. Мән мәмликитимизниң һәрбир граждининиң силәр охшаш утуқ қазинишини тилигән болар едим, – дәп тәкитлиди Президент.
Дөләт рәһбири чоңқур билимини илғар тәҗрибә билән бирләштүрүшни билидиған адәмләрниң мәмликәтни алға башлап маңидиғанлиғиға ишиниду. У Қазақстанниң мустәқиллиги жиллирида өсүп йетилгән яшларниң қабилийитини жуқури баһалиди.
– Билимлик вә идрәклик әвлатни тәрбийиләш муһим дөләт вәзиписи болуп һесаплиниду. Мәмликәтниң келәчиги истедатлиқ вә вәтәнпәрвәр яшларниң қолида болуши керәк. Шундақ болидиғанлиғиға ишинимән. Мошу стратегиялик мәхсәткә йетиш үчүн системилиқ ислаһатлар давамлаштурулиду, – дәп тәкитлиди Қасым-Жомарт Тоқаев.
Президентниң пикричә, җәмийәттики бирлик вә разимәнлик, барлиқ қазақстанлиқларниң бәрпакарлиқ әмгиги түпәйли мәмликәт җиддий тәрәққиятни қолға кәлтүрди. 
– Бу йәрдә утуқлиримизни әкис әттүридиған нурғунлиған рәқәм вә фактларни кәлтүрүшкә болиду, лекин һәммә нәрсиниң адәмләр арқилиқ –уларниң хатирҗәмлиги, утуқлири вә интилишлири билән өлчинидиғанлиғини әстә тутуш муһим. Силәр – бизниң муқәррәр байлиғимиз, нәқ силәргә гүлләнгән, адаләтлик, тәрәққийпәрвәр Қазақстанни қурушқа тоғра келиду. Шуңлашқа инсан капиталини һәртәрәплимә күчәйтиш дөлитимизниң асасий әвзәллиги болған вә шундақ болиду, – дәп билдүрди Дөләт рәһбири. 
Андин кейин Президент лайиһигә қатнишип, әлгә вә дунияға тонулған қазақстанлиқларни мисалға кәлтүрди. 
– Лайиһә түпәйли мәмликәт өзиниң надир давалаш методикиси арқилиқ нурғунлиған адәмләрни балилиқ болуш бәхтигә йәткүзгән врач-репродуктолог Айдос Ибрагимов тоғрилиқ билди. Музыкант, 2019-жилқи лайиһә финалисти, йеқинда әң абройлуқ Grammy мукапитини алған Иманбек Зейкеновниң исми, умумән, пүткүл дунияға яңриди. Униң утуқлири пәқәт Қазақстан үчүнла әмәс, бәлки пүткүл МДҺ үчүн мисли көрүлмигән мукапат болуп һесаплиниду. Лайиһиниң бийилқи, төртинчи мәвсүмидә ғалип чиққанларниң һаятидики вақиәләрму зор тәсират қалдуриду, – дәп тәкитлиди Қасым-Жомарт Тоқаев.
Дөләт рәһбири лайиһә ғалиплириға мураҗиәт қилип, уларниң утуғиниң Қазақстан утуғини әкис әттүридиғанлиғини, уларниң паалийәтчан вәтәнпәрвәрлик үлгиси барлиқ қазақстанлиқларни утуққа дәвәт қилидиғанлиғини алаһидә атап көрсәтти. 
– Силәрниң һаятиңлардики вақиәләр һәрқандақ статистикидин ишәшлигирәктур. Шундақла мәзкүр әҗайип лайиһиниң силәргә йүксилиш үчүн җиддий күч-қувәт берип, җәмийәт вә мәмликәт пайдиси үчүн йеңи идеяләрни әмәлгә ашурушниң кәң имканийәтлирини ачқанлиғиға ишәнчим камил. Қазақстан өзиниң әң яхши вәкиллири билән пәхирлинәләйду вә пәхирлиниши керәк, ундақлар яшларниң арисида наһайити нурғун. Қазақстанниң келәчиги нәқ силәргә, тәрәққийпәрвәр, истедатлиқ вә вәтәнпәрвәр яшларға тәәллуқ. Силәр дөлитимизни башқурушни өзәңларға елишқа тәйярлинишиңлар лазим. Бизгә кәлсәк, биз буниң һәқиқәтәнму шундақ болуши үчүн мүмкин болған һәммә нәрсини әмәлгә ашуримиз, – деди Президент. 
Дөләт рәһбириниң пикричә, лайиһиниң барлиқ қатнашқучилири вә ғалиплири өзлириниң әң есил хисләтлирини намайиш қилди, кәспий вә җәмийәтлик паалийәттә чоң утуқ-муваппәқийәтләрни қолға кәлтүрди.
Президент өз сөзидә «Қазақстандики 100 йеңи исим» лайиһиси қазақстанлиқ арманни рояпқа чиқиридиғанлиғини тәкитләп өтти.
– Лайиһә һәрбир истедатлиқ, мәхсәтчан адәмниң заманимизниң қәһримани вә милләтниң пәхри болуш арминини әмәлгә ашуриду. Бизниң талантлиқ яшлиримизниң өз кәспиниң йеңи чоққилирини бойсундуридиғанлиғиға вә Вәтинимизниң байриғини техиму егиз көтиридиғанлиғиға камил ишинимән, – дәп хуласилиди Қасым-Жомарт Тоқаев.
Онлайн-тәртиптә өткән учришишта «Қазақстандики 100 йеңи исим» лайиһисиниң ғалиплири – студент-пидаий Дарын Әбилжанов, алим, адәмләр вә һайванлар үчүн вакцина ишләп чиққучи Қайсар Табынов, IT-мутәхәссис, робототехника мәктивиниң асасини салғучи Дамир Нуркежанов, яш химия пәни муәллими Улан Усенов, сизиш пәниниң муәллими, өз йезисида көрүк селиш тәшәббусини көтәргән Ахат Рақишев, инженер-кәшпиятчи Санжар Тайжан, АҚШта хоккей клубиниң мәшиқләндүргүчиси болған дәсләпки қазақстанлиқ қиз Булбул Қартанбай, эколог Екатерина Вибе, шундақла шаир, җаһан әдәбияти әсәрлирини тәрҗимә қилған Серикжан Қажытай сөзгә чиқти.